1 Yesu akinjilaje ku muji gwa Yeliko, akavaje anlutila mung'asi tsa muji ugo. 2 Kuko kwavaga na munu yumwe yoachemwaga litawa lyake Tsakayo, nayo avaga muvina va vakongotsa kodi, na kaha avaga mufuchifu. 3 Nayo aganaga atsele kuta Yesu avaga munu va chinya ndawuli, lechelelo akalemwaje kumuwona kwasawuli avaga mufupi na kaha vanu vavaga wolofu ndalahela. 4 Ihyo akalongolaje luvilo kulutalo, akakwinaje kilanga ku mubichi gwa mutsombe ili avetse kumuwona, kwasawuli atselaga kuta Yesu akukola ku ng'asi yila. 5 Ihyo Yesu avaga kufika hono hala, akalolaje kilanga akamulonjelaje, "Tsakayo, wangufitse kwika, kwasawuli munyiguno nguva mujentsi mu nyumba yako." 6 Ihyo Tsakayo akangufitsaje kwika, akamulibulitsaje Yesu kukaye yake kwa wusangalo. 7 Vanu veka vavaga kuwona hila, vakantsaje kukalala vakalongaje, "Yesu ahele kuva mujentsi va munu munya ndongwa ntsibi."

8 Lechelelo Tsakayo akimaje na kumulonjela Mutwa, "Lave, heni nguvapela vagayu lifungu limwe mu mafungu gavili ga mali tsangu, na manyi ntsimusukwe munu yoyuve chinu chochive, ngumupilulila mala katayi."

9 Yesu akamulonjelaje, "Munyiguno wukuluso wufisile mu nyumba yino, kwasawuli uyu nayo mwana va Ibulahimu. 10 Kwasawuli heni Mwana va Munu ntsitsitse kusaka na kukulusa fyo fiyatsile."

11 Vanu wovavaga vangumuhulikitsa Yesu vavaga habehi na kufika ku Yelusalemu, vatijilaga kuta Wuntsajila wa Mulungu wulihabehi. Ihyo Yesu akavalonjelaje muhwano kuta, 12 "Kwavaga na munu yumwe va lukolo lwa chintsajila yoavaga ahele ku lujendo lwa inyi ya kutali ili avikwe kuva muntsajila. 13 Hoavaga ang'ali kuwuka akavachemaje vatantsi vake kumi na kuvapela magobole molofu na kuvalonjela, Mutsiditile katsi mbaka ho nguwuya. 14 Lechelelo vanu va inyi yake vakamuvipilaje, ihyo vakatumaje vajumbe vabite vakalonje kuta, Tulema munu yuno ave muntsajila vetu."

15 Yesu akalongaje, "Nambe ihyo munu uyo apasile wuntsajila na kuwuya ku inyi yake, kahi akavachemaje vala vatantsi vake wo avagavye magobole gala ili atsele chila yumwe cho apatite. 16 Mutantsi va kwantsa akatsaje na kulonga hino, Mutwa, luhuma ku magobole go ukamelye, masile mafungu kumi mu lifungu limwe lyo wamelye. 17 Muntsajila yula akamulonjelaje, Udisile finofu mutantsi munya kwihuvila. Kwasawuli uveye munya kwihuvila kwa finu fidodo, Ngukuvika uve muvina va miji kumi. 18 Mutantsi va kavili akatsaje na kulonga hino, Mutwa, masile mafungu gahanu mu lifungu limwe lyo wamelye. 19 Muntsajila vake akamulonjelaje hihilaga kuta, Heve nave ntsingukupela wuvina wa miji jihanu. 20 Mutantsi yunji akatsaje, akalongaje, Mutwa, lino hano ligobole lyako, ngali ngufihye hono hanofu muchitambala. 21 Kwasawuli ngogwipe heve kuta uli munu mutalamu. Utegulaga hala ho siulavika, na ubetaga hala ho siulayala." 22 Yesu akendelelaje kulonga kuta, "Muntsajila yula akamulonjelaje kuta, Heve mutantsi mubi, ngukuhiga kwa ndongwa tsako! Manyi watselaga kuta heni ntsi munu mutalamu, yo negulaga finu fyo sintsilavika na kubeta fila fyo sintsayatsile. 23 Kwasawuli ya chichi, siukavisise ligobole lyangu kwa vanya liba vaditile katsi, ili honguva mbutsile negule ligobole lyangu na fwayida yake?" 24 Iho yula muntsajila akavalonjelaje vala wovavaga vimile hala, "Mumusukule igobole ilyo na mukamupele yula yoapasile fwayida mala kumi." 25 Nawo vakamulonjelaje kuta, "Mutwa, mbona mwanga anago mafungu kumi!" 26 Nayo akavalonjelaje, "Ntsinguvalonjelani, chila munya chinu akupelwa na kulutitsilwa. Lechelelo yula yo alihela chinu, nambe chila cho anacho chikusukulwa. 27 Ila iwo vatelani vangu wo sivaganije ntsive muntsajila vawo, muvalete na kuvakopola halutalo hangu."

28 Yesu avaga kulonga ihyo, akalongolaje kubitila ku Yelusalemu. 29 Akavaje kufika habehi na miji ja Besifwaje na Besaniya, habehi na chidunda cho chinchemwa Mitseyituni, akavatumaje vadahitswa vake vavili na kuvalonjela kuta, 30 "Mubite mu chijiji chochili kulutalo, na homukuva munkwinjila mu chijiji icho, mukuyifika ntsana ya ntsove yiwopitwe yo ying'ali kukwinwa na munu yoyuve ayijendele. Muyiwopole na mundetele. 31 Manyi munu avaputse kuta munguyiwopola kwasawuli ya chichi, mumulonjele kuta, ‘Mutwa anguyigana.’ " 32 Vala yovatumilwe vakabitaje, vakafikaje chila chinu chili hihilaga kota Yesu fyo avalonje. 33 Hovavaga vanguyiwopola yila ntsana ya ntsove, munya ntsove akavaputsaje, "Kwasawuli ya chichi munguyiwopola yino ntsana ya ntsove?"

34 Nawo vakavalonjelaje kuta, "Mutwa anguyigana." 35 Duve vakamusindichilaje Yesu yila ntsana ya ntsove. Vakatandikaje myenda jawo mwilanga mwa iyo ntsana ya ntsove, vakamukwinitsaje Yesu mwilanga. 36 Yesu hoavaga ankwendelela na lujendo kuno akwinile yila ntsana ya ntsove, vanu vakatandikaje myenda jawo mubalabala. 37 Hovavaga kufika habehi na ku Yelusalemu ho lunkwantsila lwisa lwa chidunda cha Mitseyituni, vanu veka hamwe na vadahitswa vake vakantsaje kumulumba Mulungu na kumutsumitsa kwa litsi likomi kwasawuli ya ndongwa ngomi tseka tsovatsiwene, 38 vakavaje vankwimba hino, "Aditilwe wuwuya na Mulungu Mutwa yo ankutsa kwa Litawa lya Muntsajila. Wusichimafu wuli kilanga kwa Mulungu, na wumelemo wuli kilanga ndalahela!" 39 Iho Mafwalisayo vamwinga wovavaga mwilugu lya vanu vakamulonjelaje Yesu, "Mudahitsi, vang'anulile vadahitswa vako vakatuche!"

40 Yesu akavalonjelaje, "Ntsinguvalonjela hino, manyi vano vakatuche, maganga gakutova chiyove."

41 Yesu hoavaga kufika habehi na kuguwona muji gwa Yelusalemu, akaguvembelaje, 42 akalongaje, "Ukauve un'tsela munyiguno ndongwa ntso tsikuleta wusichimafu! Lechelelo sambi tsifihilwe hamiho gako. 43 Siku tsinkutsa vatelani vako vakukupilima kwa lwigo chila lubali na vakukutova kuhuma chila lubali. 44 Kahi vakukugwisa heve hamwe na vanu vako veka. Sivakukulechela nambe liganga limwe mu lukantsi lwako, kwasawuli walemaga kutsela chipindi cho Mulungu ho akuletye wukuluso!"

45 Kahi Yesu akinjilaje mugati mwa Nyumba ya Mulungu, akantsaje kuvavinjila kivala vanu wovagutsaga finu umo mugati, 46 akavalonjelaje kuta, "Yandikwe hino, ‘Nyumba yangu yikuva Nyumba ya Kusalila, lechelelo henye muyidisile yive malika ya vahitsi.’ " 47 Yesu avaga an'dahitsa chila siku mu Nyumba ya Kusalila. Vavina va vatawula nambiko na vadahitsi va malajitso ga Musa, na vavina va vanu vaganaga kumukopola, 48 lechelelo vakalemwaje hila fyo vakumubata, kwasawuli vanu veka vavaga vangumuhulikitsaga finofu ndalahela.