1 Yesu akawuyaje kuhuma kululenga lwa Yolidani kuno amemile Muhe va Mulungu na Muhe va Mulungu akamulongotsaje mbaka ku mbuga. 2 Kuko ajelwaga na Lisoka kwa siku alubayini. Kwa siku tseka itso sialyeye chinu chochive, hambele ntsala yikamutamaje. 3 Lisoka likamulonjelaje, "Manyi heve ulimwana va Mulungu uligalule liganga lino live libumunda." 4 Lechelelo Yesu akalijibulaje Lisoka, "Yandikwe hino, ‘Munu siafuluche ikale mumi kwa libumunda yeka.’ " 5 Kahi Lisoka likamutolaje Yesu mbaka hono ha hilanga, likamulajilaje hohamwe ntsajila tseka tsa inyi, 6 na likamulonjelaje, "Ngukupela ntsajila tseka na finu finofu fyeka fikuva fyako, kwasawuli fuluche ntsimupele yoyuve yo ntsingumugana. 7 Ihyo manyi ufugamile heni, finu fyeka fino fikuva fyako." 8 Yesu akalijibulaje Lisoka, Yandikwe kuta, Umufugamile Mutwa Mulungu vako na kumutanga hila fyo an'gana mwene.

9 Lisoka likamutegulaje Yesu na kumusindika ku Yelusalemu, na kumuvika ha munala gwa Nyumba ya Mulungu, likamulonjelaje, "Manyi heve uli mwana va Mulungu, witotse luhuma hano, 10 kwakuva yandikwe kuta, Mulungu akukulagitsila vatantsi vake va kilanga ili vakugabe. 11 Nawo vakukutegula mumawoko gawo, uleche kwikuvala ligulu lyako mu liganga." 12 Lechelelo Yesu akalijibulaje, "Kaha yandikwe, ‘Walahogola kumujela Mutwa Mulungu vako.’" 13 Lisoka holyavaga kusinda kumujela Yesu kwa chila lujelo, likamulekaje kwa chipindi chochin'ganika.

14 Ihyo Yesu akawuyaje mbaka ku Galilaya, kuno amemile wuvetso wa Muhe va Mulungu, natso ndongwa tsake tsikatagalilaje ku Galilaya na chila miji ja habehi. 15 Yesu akavaje an'dahitsa vanu mu nyumba yawo ya kitang'anila Vayawudi, akatsumilwaje na chila munu.

16 Yesu akabitaje ku Natsaleti, hono hoakalagalilye na Siku ya Kwesela Vayawudi yoyachemwaga Sabato, akinjilaje mu nyumba ya kwitang'anila Vayawudi kota fyo avaga atsovye. Akimaje ili asome. 17 Vakamupelaje chitabu cha Yisaya muloli va Mulungu, Yesu akagubulaje hono hohandikwe hino, 18 "Muhe va Mutwa Mulungu alimugati mwa heni, kwasawuli anyagwe ntsivavikulile vagayu Ndongwa Nofu. Anumile ntsivahumye wovali muwupogotsi, na wovabofwe vavetse kulola kahi, na kuvalechela wovan'wonelwa, 19 na kuvikula mwaka gwa Mutwa go gudichilwe." 20 Yesu aveye kusinda kusoma, akachipetaje chitabu na akamupilulilaje mutantsi, akabitaje kwikalisa hanyi. Vanu veka wovavaga mu Nyumba ya kwitang'anila Vayawudi vakamukangatsilaje miho. 21 Ihyo akantsaje kwa kuvalonjela hino, "Munyiguno Ndongwa tsino tsikwilye kota fyomuhuliche." 22 Veka wovavaga vangumuhulikitsa vakamutsumilaje na kutinuswa na ndongwa tsake tsotsimemile wuwuya, na vakiwutsaje kuta, "Ihi! Yuno si mwana va Yusufu?" 23 Yesu akavalonjelaje, "Ntsitsela kuta mukundonjela sembeletso yino, ‘Muganga, wiponetse umwene! Na ndongwa tsila tsowadisile ku Kapelinaumu, udite na kuno kukaye kwenyu.’ " 24 Akawilaje kuvalonjela hino, "Ntsinguvalonjela wukweli kuta, Muloli siadichilwaga kukaye kwawo. 25 Lechelelo munyulikitse! Kwavaga na vafwile wolofu muinyi ya Isilaheli chipindi cha Eliya, na kwavaga na ntsala ngomi kuinyi yeka, kwasawuli ndonya yali yilemitswe kutonya kwa myaka jidatu na myetsi sita. 26 Nayivaje ihyo, Eliya siatumilwe kwa yoyuve mu inyi ya Isilaheli, ila kwa mufwile yumwe mujentsi yoikalaga ku muji gwa Saleputa ku inyi ya Sidoni. 27 Kaha kwavaga na vatamwa wolofu va wububa ku inyi ya Isilaheli chipindi cha Elisa muloli va Mulungu. Nayivaje ihyo sikwavaga na yoyuve yoaponitswe, ila munu yumwe ng'ani yoachemwaga Nahamani va inyi ya Siliya." 28 Vanu vheka wovavaga mu nyumba ya kitang'anila Vayawudi vakavaje kuhulika ndongwa itso, vakavipaje ndalahela. 29 Vakinukaje vakamukwegwenaje Yesu mbaka kivala kutali na muji, vakamutegulaje mbaka hilanga ha kadunda hogwali gutsentsilwe muji, ili vamutotse mbaka hasi ha njema. 30 Lechelelo Yesu akawukaje an'jenda hagati hawo.

31 Kahi Yesu akikaje mbaka ku Kapelinaumu, ku muji gwa Galilaya, na Siku ya Kwesela akantsaje kuvadahitsa vanu. 32 Vanu vakatinukaje ndalahela kwasawuli adahitsaga kwa mamulaka. 33 Na mu Nyumba yila ya kitang'anila Vayawudi kwavaga na munu yoavaga na lisoka, akakolaje fikami akalongaje, 34 "Un'gana utudite chichi Yesu va ku Nantsaleti? Mbe untsitse kutukopola? Ngutsele kuta heve ulinani! Heve yo uli Munu muhagulwa kwasawuli ya Mulungu!" 35 Yesu akaling'anulilaje lisoka ilyo, akalilonjelaje, "Katuche! Na uhume mugati mwa munu yuno!" Duve lisoka ilyo likamugwisaje hasi munu yula halutalo ha vanu veka, na likahumaje bila kumutetsa. 36 Vanu veka vakatinukaje, na vakavaje vangilonjela, "Ulu lulongwa lunya ndawuli? Angujing'anulila misoka kwa mamulaka na wuvetso, najo jinhuma!" 37 Ndongwa tsa Yesu tsikatagalilaje chila hono muinyi yila.

38 Yesu akahumaje mu nyumba yila ya kwitang'anila Vayawudi, akabitaje mu nyumba ya Simoni. Mudala yumwe mukwive va Simoni avaga na mbungo ngomi, nawo vakamusukaje Yesu amuponeste. 39 Yesu akabitaje akimaje habehi na mutamwa yula akaying'anulilaje mbungo yila. Nayo mbungo yikamulekaje, na luvala lulo mudala yula akantsaje kuvakolela katsi. 40 Litsuva holyavaga linsota, veka wovavaga na vang'olotsawo vanya matamwa vakavatolaje mbaka kwa Yesu, akavavichilaje mawoko chila mutamwa kwa kumusuchila, na veka vakaponaje. 41 Misoka jikavahumaje vanu wolofu, vakakolaje na kuta, "Heve uli mwana va Mulungu!" Lechelelo Yesu akajing'anulilaje misoka na kujilemetsa jileche kulonga, kwasawuli jamutselaga kuta mwene yo Chilisito muhagulwa va Mulungu.

42 Hamilawu iyage kung'acha kutitutitu Yesu akawukaje akabitaje hono hawiyeka. Vanu vakamusakaga nawo vakavaje kumuwona vakajelaje kumlemetsa aleche kuwuka. 43 Lechelelo mwene akavajibulaje, "Ntsin'ganika kuvikula Ndongwa Nofu tsa wuntsajila wa Mulungu mu miji jinji, kwasawuli ntsatumilwe kwa lulongwa ulo." 44 Akendelelaje kuvikula mu nyumba ya kitang'anila Vayawudi tsa ku Yudeya.