1 Kahi libalatsa lyeka likimaje na kumusindika Yesu mbaka halutalo ha Pilato. 2 Vakantsaje kumuhiga Yesu na kumulonjela Pilato kuta, "Tumuwene munu yuno anguvayatsa vanu vetu, na kuvalonjela valeche kuhomba kodi kwa Kayisali muntsajila va Loma na kwichema kuta mwene yo Chilisito, Muntsajila." 3 Ihyo Pilato akamuputsaje Yesu, "Heve yo Muntsajila va Vayawudi?" Yesu akamulonjelaje, "Heve yo ulontsile." 4 Kaha Pilato akavalonjelaje vavina va vatawula nambiko na lilugu lya vanu kuta, "Nambe ntsiwuwone wubi wowuve kwa munu yuno."

5 Lechelelo vene vakahahanitsaje kulonga kuta, "Yuno anguvasongetsa vanu kwa madahitso gake ganguvadita vanu va ku Yudeya yeka vapisane na wutavala. Antsye ku Galilaya na sambi ali hano."

6 Pilato ho avaga kuhulika ihyo, akaputsaje, "Mbe, munu yuno munyakaye va ku Galilaya?" 7 Akatselaje kuta Yesu avaga ahumye kuwuntsajila wa Helode, chipindi icho Helode nayo kaha avaga ku Yelusalemu, ihyo Pilato akamusindikaje Yesu kwa Helode. 8 Helode hoavaga kumuwona Yesu akasangalalaje ndalahela, kwasawuli kuhuma hamutalo aganaga kumuwona Yesu. Helode aganaga kujiwona miwujitsa myolofu. 9 Helode akamuputsaje Yesu mbutso ntsolofu, lechelelo Yesu sialontsile chochive. 10 Vavina va vatawula nambiko na vadahitsi va malajitso ga Musa vavaga vimile hono iho, vakalalilaga kumuhiga kwa Helode. 11 Ihyo Helode hamwe na vimilitsi vake, vakamubedalaje Yesu na kumuvipitsa. Vakamufwikaje mwenda gwa chintsajila, vakampilulaje kwa Pilato. 12 Siku iyo Helode na Pilato vakiyendaje kwasawuli ya lulongwa ulo, lechelelo iho hamutalo vatelanaga.

13 Pilato akavachemaje vavina va vatawula nambiko, na vavina va vanu, 14 akavalonjelaje, "Henye mumuhitsile munu yuno kwa heni kuta anguvapisanitsa vanu na wutavala! Mbije kuluhima lulongwa ulo, sintsiwuwene wubi wowuve wowufuluche wumwambutse ahigwe. 15 Nambe Helode nayo siakauwene wubi wowuve, na ihyo amupilwe kwa hetwe. Munu yuno sialadita lulongwa lubi loluve lwa kuhigwa akopolwe. 16 Ihyo ngulajitsa atowe fiboko na hambele ngumulechela. 17 Kwasawuli yavaga ntsovelo ha chipindi cha liwungo lya pasaka Pilato kumudindulila muwopwa yumwe."

18 Lechelelo vanu veka vakayovaje ho hamwe kulonga, "Umukopole munu yuno, utudindulile Balaba!" 19 Uyo Balaba avaga awopitwe mu nyumba ya vawopwa kwasawuli ya kwambutsa vanu vadite wupitufu mu muji kwa vatavala, na kwambutsa vanu vafwe. 20 Pilato aganaga kumulechela Yesu, ihyo akalongaje nawo kaha. 21 Lechelelo vene vakalongaje kwa chiyove, "Muvambe mu musalaba, mumuvambe mu musalaba!" 22 Pilato akavaputsaje lwa kadatu, "Mbe, munu yuno adisile wubi wachi? Sintsiwuwene wubi wowuve kwake wo wufuluche wumwambutse akopolwe! Ho ihyo ngulajitsa asubulwe fiboko, na hambele kumulechela." 23 Lechelelo vene vakalutitsaje kuyova fikami kuta Yesu avambwe mumusalaba. Hambele chiyove chawo chikamusumaje. 24 Ihyo Pilato akalamulaje vaditilwe chovan'gana. 25 Akamudindulilaje munu yula yoavaga awopitwe kwasawuli ya wupitufu mu muji na kukopola vanu, na akamutawulaje Yesu, vamudite kota fyovan'gana.

26 Hovavaga vam'bita nayo Yesu, vakitang'anaje na munu yumwe litawa lyake Simoni va ku Kilene, yo ahumaga kivala kwa muji ankutsa ku mujini. Vakamubataje, na kumutwika musalaba gula agutegule kumbele kwa Yesu. 27 Vanu malugu na malugu vamufwataga Yesu, ha vanu iwo kwavaga na vadala wo vamuvembelaga na kumung'ung'utila. 28 Yesu akavapituchilaje na akavalonjelaje, "Henye vahintsa va ku Yelusalemu! Muleche kumbembela heni, lechelelo mwivembele henye na vana venyu. 29 Kwasawuli muda gunkutsa ho vakulonga kuta, ‘Vatambichilwe vala vadala wovali mende maleme gawo gang'ali kulela na mavele gawo go gang'ali kosa!’ 30 Luvala ulo vanu vakwantsa kufilonjela fidunda kuta, Mutugwile! Na tudunda, Mutugubiche! 31 Manyi vanditye hino heni yo ntsilihela wubi wowuve, vakumuditila ndawuli munu munya wubi?" 32 Vakavategulaje vanu vanji vavili vawumiyani, na kuvasindika vakopolwe hamwe na Yesu. 33 Vavaga kufika hono ho hachemwaga, "Lipala lya Mutwi," Iho ho vamuvambite Yesu mu musalaba hamwe na vawumiyani, yumwe lubali lwa kililo na yunji lubali lwa lichiji. 34 Yesu akalongaje, "Dada, uvahulumile kwasawuli sivan'tsela chovan'dita." Vakagavanaje myenda jake kwa kujitovela simbi. 35 Vanu vavaga vimile hala vangumulola, nawo vavina va Vayawudi vakamubedalaje kwa kulonga kuta, "Avakuluse vanji, lelo ikuluse mwene, manyi mwene yo Chilisito, muhagulwa va Mulungu!" 36 Kahi vimilitsi nawo vakatsaje vakamubedalaje na vakampelaje difwayi yo yihahile ili ang'we, 37 nawo vakalongaje, "Manyi heve yo Muntsajila va Vayawudi wikuluse u mwene." 38 Hilanga ha musalaba gula havaga na chibawo cho chandikwe hino, "YUNO YO MUNTSAJILA VA VAYAWUDI." 39 Yumwe va vawumiyani vala wo vavambitwe hamwe hala ho avambitwe halubali ha Yesu, akamuligaje, "Heve si yo Chilisito muhagulwa va Mulungu? Wikuluse u mwene, utukuluse na hetwe." 40 Lechelelo yula muwumiyani yunji akamung'anulilaje muyage kwa kumulonjela, "Mbe, heve ulihela muloto kwa Mulungu? Ungumuliga na kuno heve nave uvambitwe kota mwene. 41 Heve na heni tuhijitwe kwa wubi wo tudisile, kwasawuli tumpata chochin'ganika kwa chila chotudisile. Lechelelo munu yuno siadisile chinu chibi chochive." 42 Kaha muwumiyani yula akamulonjelaje Yesu kuta, "Yesu! Untsiwukaje hala ho ukuva winje mu Wuntsajila wako."

43 Yesu akamulonjelaje, "Ntsingukulonjela wukweli kuta, munyi guno ukuva hamwe na heni kilanga kwa Mulungu."

44 Yavaga kota saa sita hamunyi, jitsa likagubikaje inyi yeka mbaka saa tisa mumihe, 45 kwasawuli litsuva lyalesile kuvala, na lipantsiya lya Nyumba ya Mulungu likademukaje hagati kuhuma kuchanya mbaka hasi. 46 Yesu akavembaje fikami, "Dada! Muhe gwangu ntsinguvika mu mawoko gako." Hoavaga kulonga ihyo, akatajikaje. 47 Yula muvina va vimilitsi hoavaga kufiwona fyo fihumye, akamutsumitsaje Mulungu na kulonga, "Wukweli munu yuno aditaga kota fyo an'gana Mulungu."

48 Vala vanu veka wovavaga vakong'ine iho kwasawuli ya lulongwa ulo, vavaga kuwona fila fyofihumye, vakawuyaje kukaye tsawo kuno vangikuna mambaga tsawo kwa wususutalo. 49 Lechelelo vala veka wovavaga vamutsele Yesu, hamwe na vadala vala wo vamufwataga kuhuma ku Galilaya, vavaga vimile kutali vanlola fila fyo finhumila.

50 Kwavaga na munu yumwe yo achemwaga Yusufu, yo avaga jumbe va libalatsa likomi lya Vayawudi, na aditaga kota fyo an'gana Mulungu. 51 Lechelelo mwene siavaga idiche hila fyo vadisile vavina vayage mu lila libalatsa. Munu uyo avaga ahumye ku muji gwa Alimataya, na antsindilaga kutsa kwa Wuntsajila wa Mulungu. 52 Nayo Yusufu akabitaje kwa Pilato, akasukaje apelwe muvili gwa Yesu. 53 Akisaje muvili ugo mu musalaba, akagupilingaje sanda ntselu ya chitambala cha galama, akaguvikaje mu kabuli woyavaga vahongwe mu liganga, kabuli iyo yavaga ntsipya. 54 Siku iyo yavaga ya kwivika chang'ani kwa Siku ya Kwesela yavaga habehi kwantsa. 55 Vala vadala wo vamufwatite Yesu kuhuma ku Galilaya, vakamufwataje Yusufu na vakaliwonaje likabuli na muvili gwake Yesu hila fyo gulambalikwe. 56 Vakawuyaje kukaye, vakavikaje chang'ani mafuta ga kununyilila na mafuta ga kugubaka muvili gwa Yesu. Siku ya Weselo vakeselaje kota fyo yavaga matsovela.