1 Yesu akavalonjelaje vadahitswa vake, "Kwavaga na munu yumwe mufuchifu yoavaga na mwimilitsi yo imililaga finu fyake. Mufuchifu yula akahulikaje kuta, mwimilitsi ankwelanga finu fyake. 2 Siku yimwe mufuchifu yula akamuchemaje na kumuputsa mwimilitsi vake, ndongwa ntsachi tsino tso ntsinhulika, lelo unambulile finu fyangu fyo ngupelye wimilile, kwasawuli siukwendelela kuva mwimilitsi va finu fyangu. 3 Ihyo mwimilitsi yula akahotsaje kuta, mufuchifu vangu ambinga katsi ya wimilitsi, lelo ngudita ndawuli? Ludali lwa kulima ntsihela, na heni kusukasuka kwa vanu ntsin'wona nyoni. 4 Lelo ntseliwe cho ngudita, ili hala honguva mbintsilwe katsi vanu vandibulitse mu kaye tsawo. 5 Duve, mwimilitsi yula akavachemaje yumwe yumwe va vala wo vadayilwaga na mufuchifu vake. Akamulonjelaje va kwantsa, Mbe, heve un'dayilwa chiyasi chachi cha mafuta na mufuchifu vangu? 6 Mwene akamulonjelaje, figuduliya fya lita tsihanu tsa mafuta ga mitseyituni miya nane, mwimilitsi yula akamulonjelaje kuta, Tegule hati ya lideni lyako, wandiche figuduliya miya tsitayi. 7 Kaha akamuputsaje mudeni va kavili, heve un'dayilwa chiayasi chachi? Mwene akamulonjelaje, Ntsin'dayilwa magunila miya mbili ga ngano. Mutantsi yula akamulonjelaje, Tegule hati ya lideni lyako, wandiche magunila miya moja na sitini! 8 Yula mufuchifu akamutsumilaje mwimilitsi vake yoavaga muhitsi kwasawuli ya wusugu wake woavaditye vadeni vala. Lechelelo vanu yo vangumufwata Mulungu valihela wusugu kota iwo." 9 Yesu akendelelaje kuvalonjela, "Mwiditile vanu va habehi kukolela finu fya muinyi yino, ili ho tsalava kusila, mulibulitswe na Mulungu mu wukalo wowugaya wudugo. 10 Munu yoyuve yoakuva vakihuvilwa kwa finu fidodo ndalahela, akuva vakihuvilwa kwa finu fyolofu, na munu yoyuve yoakuva sivakihuvilwa kwa finu fidodo safuluche ihuvilwe kwa finu fikomi. 11 Ihyo manyi henye simuveye vakitumbilwa kwa finu fya muinyi, nani yo akuvapela finu fya kweli? 12 Manyi henye simukitumbilwa kwa finu fya munu yunji, nani yoakuvapela finu fyenyu muvene?" 13 Yesu akendelelaje kulonga, "Kuduhu munu yoafuluche kuvatumichila vavina vavivili, Kwasawuli afuluche amuvipile yumwe na kumugana yunji awu afuluche ihantse na yumwe na kumubedala yunji. Henye nanye simufuluche kumutumichila Mulungu na mali."

14 Lechelelo Mafwalisayo vakavaje kuhulika ihyo, vakamuhekaje Yesu kwa mbedalo kwasawuli vene vavaga vanu va kugana magobole ndalahela. 15 Yesu akavalonjelaje, "Henye mungilajila halutalo ha vanu kuta mu vawuya, lechelelo Mulungu avatsele numbula tsenyu. Kwasawuli chila chochinwoneka china galama ndalahela halutalo ha vanu, kwa Mulungu chivaga chibi. 16 Malajitso ga Musa hamwe na madahitso ga valoli va Mulungu fyavikulwaga mbaka chipindi cha Yohana Mubatitsaji. Kuhuma baho wuntsajila wa Mulungu wunvikulwa na chila yoa anguwudichila ankwinjila kwa wuvetso. 17 Lechelelo kuna wupefu kwa kilanga na inyi kulutila, lechelelo kuna wukangafu kujelula nambe kalongwa kamwe ka malajitso ga Musa. 18 Munu yoyuve yo angumuleka mudala vake na kumutola mudala yunji an'dita waafu, na mulume yoyuve yakumutola mudala yalesilwe, nayo an'dita waafu.

19 "Kwavaga na munu yumwe mufuchifu yafwalaga myenda ja lanji ya tsambalawu na lanji ntselu ja beyi ngomi, nayo elangaga mali na kikala kwa mbwiniyo tsa muinyi siku tseka. 20 Na hamulango gwa mufuchifu uyo havaga na munu yumwe mugayu litawa lyake achemwaga Latsalo, yoali na fikong'o muvili gweka. 21 Uyo Latsalo iviniwaga kulya filyo fyo fyagwaga kuhuma mumetsa ya mufuchifu yula. Nambe mibwa najo jatsaga kumumyanga fikong'o.

22 "Hambele uyo mugayu Latsalo akafwaje, nawo vatantsi va kilanga va Mulungu vakamutegulaje ikale hamwe na Ibulahimu. Na yula mufuchifu nayo hambele akafwaje na vakamutsikaje, 23 na yula mufuchifu hoavaga kula kwa vanu wo vafweye ankodeka ku jehamamu ndalahela, akalolaje kwa kutali na kumuwona Ibulahimu alihamwe na Latsalo. 24 Ihyo mufuchifu yula akamuchemaje kwa litsi likomi, ‘Dada Ibulahimu! Umbonele lusungu, umutume Latsalo adotse nambe chala chake hela mu malenga, atse amotse lulimi lwangu, kwasawuli kuno jehamamu ntsinkodeka ndalahela.’

25 "Lechelelo Ibulahimu akamulonjelaje, ‘Mwanangu wiwuche kuta ha wumi wako wapasile finu fyeka finofu, nayo Latsalo akodiche. Lechelelo sambi mwene anhongetswa na heve unkodeka. 26 Kulutila ihyo, hagati ha hetwe na henye hana likwava likomi, ili wovan'gana kulowoka kuhuma kokuve valemwe.’ 27 Munu yula mufuchifu akagongolaje, ‘Duve Dada Ibulahimu, umutume Latsalo abite kukaye kwa vang'olotsangu, 28 Kwasawuli ntsinawo vang'olotsangu vahanu, abite akavafunde, valahogola vatse kono kuno ku jehanumu kuna ng'odeko.’

29 "Lechelelo Ibulahimu akamulonjelaje, ‘Vang'olotso vanayo Musa na valoli va Mulungu, van'ganika vavahulikitse vawo.’

30 "Lechelelo yula mufuchifu akalongaje, ‘Ndaya dada Ibulahimu, manyi munu ahume kuno kwa vanu wovafweye na kuvafunda, vakuleka kudita ndongwa tsawo ntsibi na kumupituchila Mulungu,’ 31 Nayo Ibulahimu akamulonjelaje, ‘Manyi sivakuvahulikitsa Musa na valoli va Mulungu, nambe abite kuvagongola munu yo ahumye kwa vanu wovafweye sivakuhulika.’ "