1 Siku ya liwungo lya mibumunda jojilihela hamila yoyachemwaga Pasaka, ho yavaga yilihabehi. 2 Vavina va vatawula nambiko hamwe na vadahitsi va malajitso ga Musa vakavaje vansaka hila fyo vakumukopola Yesu, nawo vaditaga ihyo kwa fiho kwasawuli vawogopaga vanu.

3 Duve lisoka likamwinjilaje Yuda yo achemwaga Isikaliyoti, yumwe va vala vatumi kumi na vavili. 4 Ihyo Yuda akabitaje kwa vavina va vatawula nambiko na vavina va vimilitsi va Nyumba ya Mulungu, akalonganaje nawo hila fyo akumupituka Yesu. 5 Nawo vatawula nambiko vakahechelelaje ndala hela vakalaganaje kumuhomba magobole. 6 Yuda akidichilaje, na akantsaje kusaka muda gula go akumupituka Yesu, chipindi ho kukuva kuduhu vanu.

7 Ho yavaga kufika siku ya Liwungo lya Mabumunda go galihela hamila, iyo yo yavaga siku ya kusintswa kwa ntsanang'olo ya Pasaka. 8 Ihyo Yesu akavatumaje Petulo na Yohana, "Mubite mukatuditile chilyo cha Pasaka ili tulye." 9 Nawo vakamuputsaje, "Un'gana tukayidite kwiya?" 10 Yesu akavalonjelaje, "Muhulikitse! Ho mukuva mum'bita mujini, mukitang'ana na munu mulume yo itwisile chiya cha malenga. Mubitase mbaka mu nyumba yo akwinjila. 11 Nanye mumulonjele munya nyumba kuta, ‘Mudahitsi amputsa, chilikwiya chumba cha vajentsi cho akulila chilyo cha Pasaka hamwe na vadahitswa vangu?’ 12 Nayo akuvalajila chumba chikomi chili kugolofwa mwanga chivisilwe chang'ani, na henye mudite chilyo cha pasaka mumo."

13 Ihyo vakabitaje, vakafikaje chila chinu chavaga hihilaga kota Yesu fyo avaga avalonje, vakaditaje chilyo cha Pasaka.

14 Ho chavaga kufika chipindi, Yesu akikalisaje kulya hamwe na vatumi vake. 15 Yesu akavalonjelaje, "Ntsiviniwe ndalahela kulya chilyo cha Pasaka hamwe na henye ho ntsing'acha kwinjila mu ng'odeko tsangu. 16 Ntsinguvalonjela kuta singulya kaha pasaka mbaka hala Mulungu ho akuva avagombwe vanu vake veka na kutavala."

17 Ihyo Yesu akategulaje chikombe cho chavaga na difwayi, akamulumbaje Mulungu na kulonga, "Mwanuchile chikombe chino na mung'we nyeka. 18 Kwasawuli ntsinguvalonjela, kuhuma sambi singung'wa kaha difwayi ya libawo lya mutsabibu, mbaka ho wukutsa Wuntsajila wa Mulungu." 19 Kaha akatolaje libumunda, akalumbaje na kulonga, "Guno go muvili gwangu go guntawulwa kwasawuli yenyu. Muditaje hino kwa kuntsiwuka heni." 20 Ho avaga kulya akaditaje hihilaga, akategulaje chikombe, akalongaje, "Difwayi yino mu chikombe yo lilagano lipya lyo lin'ditwa kwa danda yangu yo yim'bohoka kwasawuli yenyu.

21 "Lechelelo mulave! Yula munu yo akumituka alihamwe na hetwe bahanago ankulya hamwe na heni. 22 Heni Mwana va Munu ntsim'bita kukopolwa kota fyo aganile Mulungu, lechelelo akudutsa munu yula yo akungaluka." 23 Iho vatumi vakantsaje kwiputsa vene kwa vene kuta, nani yoali hagati hetu yo akudita lulongwa ulo.

24 Kukahumilaje wusumwano hagati ha vatumi viwutsaga kuta nani yo akuva muvina vawo. 25 Yesu akavalonjelaje, "Vantsajila na vanu va muinyi vavatavalaga vanu kwa ludali, nawo vaganaga vachemwe kuta vanguvatanga vanu. 26 Lechelelo kwa henye yivaje finji, yula yoan'gana ave muvina kwa henye, an'ganika ave mutantsi venyu. 27 Ihyo nani yo muvina? Mbe, yula yo ichite mumetsa kulya, awu yula yo ankola katsi ya wutantsi? Akuva yula yo angikala mumetsa kulya chilyo! Nambe ihyo, lechelelo heni ntsili hano hagati henyu ntsinakota mutantsi."

28 Kaha Yesu akalongaje, "Henye yomuli hamwe na heni chipindi cheka cha njelo tsangu. 29 Ihyo kota hila Dada vangu fyo amelye Wuntsajila, na heni ntsinguvapela mamulaka ga kutavala, 30 ili muvetse kulya na kung'wa mu metsa ya Wuntsajila wa heni na kikala mu figoda fya wuvina kutsitavala tsila kabila kumi na tsivili tsa Vaisilaheli."

31 "Yesu akamulonjelaje, Simoni! Simoni! Hulikitse! Lisoka lisusile kwa Mulungu livapete henye kota munu fyo ampeta wuhemba. 32 Lechelelo heni ngusuchye heve, ili litumbilo lyako lileche kutindajila. Nave ho ukuva umiluchilye uvakangatse vang'olotso."

33 Petulo akamulonjelaje Yesu, "Mutwa, heni ntsili chang'ani kubitasa hamwe na heve ku nyumba ya vawopwa, nambe kufwa hamwe na heve."

34 Yesu akamulonjelaje, "Ntsingukulonjela heve Petulo kuta, munyiguno hachilo ntsogolo ying'acha kuvika mwanga ukuva ung'anile mala kadatu kuta si untsele."

35 Kahi Yesu akavaputsaje vadahitswa vake, "Hala ho ntsaganile mubite bila mufuko gwa magobole awu libeji, awu filatu, Mbe, mwagatsile chinu chochive?" Nawo vakamulonjelaje, "Ndaya." 36 Yesu akavalonjelaje, "Lechelelo sambi, yula yo anago magobole ategule, awu libeji ategule. Yoyuve yo alihela waladi, agutse likoti lyake abite akagule. 37 Kwasawuli yandikwe mu Mandiko ga Mulungu kuta, Avalilwe hamwe na vawumiyani, na heni ntinguvalonjelani chila cho chandikwe kwajili ya heni chin'ganika chihumile." 38 Vadahitswa vake vakamulonjelaje, "Mutwa, hano hana waladi wuvili." Yesu akavalonjelaje, "Duve tutsileche ndongwa itso!"

39 Ihyo Yesu akawukaje na kubita ku chidunda cha Mitseyituni kota fyo aditaga kuhuma hamutalo, nawo vadahitswa vake vakamufwataje. 40 Hovavaga kufika uko, akavalonjelaje, "Musukaje, muleche kwinjila mu majetso." 41 Mwene akibagulaje nawo kota wutali wa munu kutotsa liganga, akafugamaje na kwantsa kusuka. 42 Akalongaje, "Dada manyi ugane nyetsele chikombe chino cha ng'odeko. Sikota fyontsin'gana heni, lechelelo kota hila fyo un'gana heve." 43 Mutantsi va kilanga va Mulungu akahumilaje na kumukangatsa. 44 Yesu hoavaga mu wusungu wukomi, akasukaje ndalahela na lifuche lyake lyo lyagwaga hanyi lyahumyaga na danda.

45 Hoavaga kusinda kusuka, akavapiluchilaje vadahitswa vake akavafikaje vavasise, kwasawuli vavaga vafuluje kwa wususutalo. 46 Yesu akavalonjelaje, "Mbona muvasise? Mulamuche musuche, muleche kwinjila mumajetso."

47 Yesu hoavaga ang'acha anlonga ihyo, likatsaje lilugu lya vanu kuno Yuda avalongwe yula yo avaga yumwe va vala vatumi kumi na vavili. Yuda akamuhejelelaje Yesu ili amunonele. 48 Lechelelo Yesu akamulonjelaje, "Yuda, Ino ungumupituka Mwana va Munu kwa kumunonela?"

49 Vala vafwasi va Yesu vavaga kuwona chila cho chinhumila vakalongaje, "Mutwa, tufuluche tuvatemanje kwa nyaladi tsetu?" 50 Yumwe va vala akamutemaje lipulichilo lyake la lubali lwa kwililo mutantsi va muvina va vatawula nambiko.

51 Lechelelo Yesu akalongaje, "Muleche!" Kahi akalidometsaje lipulichilo lya munu uyo, akamuponetsaje.

52 Kaha Yesu akavalonjelaje vala vavina va vatawula nambiko na vala wo vatsitse kumubata, na vavina va vimilitsi va Nyumba ya Mulungu, "Mutsitse na waladi na ndumbi kota hila heni mitwe silikali? 53 Siku tseka ntsavaga hamwe na henye mu lidama lya Nyumba ya Mulungu simwimbite. Lechelelo sambi cho chipindi chenu, chino cho chipindi cha wutavala wa jitsa,"

54 Ihyo vakamubataje Yesu, vakabitaje nayo mbaka ku nyumba ya muvina va vatawula nambiko. Lechelelo Petulo akavaga angumufwata kumbele kwa kutali. 55 Hovavaga vakotsitse moto hidama, nawo vavaga vichite kota moto, Petulo nayo akikalaje hamwe nawo. 56 Mutantsi yumwe muhintsa hoavaga kumuwona Petulo ichite ha moto, akamukangatsilaje miho, na kulonga, "Munu yuno aka hamwe na Yesu."

57 Lechelelo Petulo akalongaje, "Bee mudala, sintsimutsele munu uyo!"

58 Hambele munu yunji akamuwonaje Petulo na kulonga, "Heve nave uli yumwe vawo!"

Lechelelo Petulo akamulonjelaje, "Ndaya be munu heve, si heni!"

59 Ho yavaga kulutila kota lisala limwe hino, munu yunji akalongaje kwa kuhahanitsa kuta, "Wukweli munu yuno aka hamwe na Yesu, kwasawuli na mwene nayo anhumila ku Galilaya."

60 Lechelelo Petulo akamulonjelaje, "Be munu heve, sintsichitsele ndaya icho chounlonga!"

Luvala lulo lo alongaga Petulo ntsogolo yikavikaje. 61 Mutwa akapitukaje na kumulola Petulo, Petulo nayo akiwukaje ndongwa tsila tso alontsile Muntsajila kuta, "Munyi guno ying'acha siyilavikantsogolo, ukung'ana mala kadatu." 62 Iho Petulo akahumaje kwivala na kuvemba kwa wusungu ndalahela.

63 Vanu vala wovavaga vangumwimilila Yesu, vakantsaje kumubedala na kumutova. 64 Vakamuwopaje chitambala kumiho, vakavaje vangumuputsa, "Lagule nani yo akutofile?" 65 Vakendelelaje kumulonjela ndongwa tsinji ntsolofu tsinya maligo.

66 Hamilawu ho kwavaga kwela, libalatsa lya vavina va vanu, na vavina va vatawula nambiko, na vadahitsi va malajitso ga Musa, vakakong'anaje, vakamuletaje Yesu halutalo ha hono ha kuhijila. 67 Nawo vakamulonjelaje, "Utulonjele! Mbe heve yo Chilisito?" Lechelelo Yesu akavalonjelaje, "Nambe ntsivalonjele, simukunumba. 68 Nayivaje ntsivaputse lulongwa, simukumitula. 69 Lechelelo kuhuma sambi, heni Mwana va Munu nguva ntsichite lubali lwa hesima lwa Mulungu Munya Wuvetso weka," 70 Iho veka vakalongaje, "Ihyo un'gana ulonje kuta heve uli Mwana va Mulungu?" Yesu akavalonjelaje, "Kota fyo mulontsile henye, hihyo fyo ntsili." 71 Nawo vakalongaje, "Mbe, tukugana vanu vanji vatulonjele chinu chachi? Hetwe vene tuhuliche fyo anlonga."