1 Siku tsila Kayisali Agusitino akalajitsaje kuta vanu veka wo vangikala mu wutavala wa Valoma vanguganika kuvalilwa. 2 Iyo yo yavaga mbalilo ndongola, luvala ulo Kileniyo hoavaga muvina va mukova gwa Siliya. 3 Duve chila munu akabitaje kwiyandikitsa ku muji gwake go alelechilye. 4 Ihyo Yosefu akawukaje luhuma muji gwa Natsaleti gogwavaga ku Galilaya akabitaje mbaka ku Betelehemu, ku muji go alelechilye Dawudi. 5 Yusufu akabitasaje kiyandikitsa hamwe na Maliyamu, yo vali valajine kwitola. Kuno mwanga avaga na wubofu. 6 Hovavaga uko ku Betelehemu, siku ya Maliyamu kulela mwana yikafikaje. 7 Akalelaje mwanage mulongola mukwamitsi, akamugubikitsaje myenda ja chiwana, na kumulambalika hono hotsililaga senga, kwasawuli nyumba tsa kuvasa vajentsi tsavaga tsimemile vanu.

8 Kwavaga na vadimi yo vikalaga habehi na hono iho, yo vamilaga ng'olo tsawo hachilo. 9 Luvala lulo mutantsi va kilanga va Mutwa akavahumilaje, na wumelemo wa Mulungu wukavang'alichilaje chila lubali. Nawo vakavaje na muloto ndalahela. 10 Lechelelo mutantsi va kilanga va Mulungu akavalonjelaje, "Muleche kuva na muloto! Kwasawuli ntsina ndongwa nofu tsotsikuva na wuhechelelo wukomi kwa vanu veka. 11 Kwasawuli yenyu munyi guno ku muji gwa Dawudi aleliche Mukulusi yo Chilisito Mutwa. 12 Iyi yoyikuva ndajilo kwenyu kuta mukumufika mwana agubikitswe fibwende na alambalikwe mu libani lya kulila senga." 13 Luvala lulo lilugu likomi lya vatantsi va kilanga va Mulungu likihantsaje na yula mutantsi va kilanga va Mulungu, vakantsaje kumutsumitsa Mulungu vakalongaje,

14 "Atsumitswe Mulungu va kilanga ndalahela,

na wusichimafu wuve na vanu veka va muinyi yoanguvagana."

15 Hala vatantsi va kilanga va Mulungu hovavaga kuvaleka na kuwuya kilanga kwa Mulungu vadimi vakilonjelaje, "Hondi tubite ku Betelehemu tukalulole lulongwa ulu lo atulonje Mutwa." 16 Vakangufitsaje kubita, vakamuwonaje Maliyamu na Yusufu na chali chila vachilambaliche mu libani lya kulila senga. 17 Vala vadimi hovavaga kuchiwona chali chila, vakatagalitsaje kwa vanu veka ndongwa tsa chali chila tso avalonje mutantsi va kilanga va Mulungu. 18 Vanu veka wovahuliche ndongwa tsila tsovalontsile vadimi vakapomokaje ndalahela. 19 Lechelelo Maliyamu akatsivikaje ndongwa itso mu numbula yake na kutsihotsanitsa. 20 Vadimi vala vakawuyaje ku mbuga, kuno vangumutsumitsa Mulungu kwa ndongwa tseka tsovahuliche na kuntsiwona, kwasawuli tseka tsavaga hihilaga kota fyoali avalonje mutantsi va Mulungu va kilanga.

21 Hoyavaga kufika siku ya nane vakamwingitsaje mwana likumbi na vakamutambulilaje litawa Yesu, litawa ilyo lyoali atambulilwe na mutantsi va kilanga va Mulungu, hala Maliyamu hoavaga ang'acha kuva na wubofu.

22 Hotsavaga kukwila siku tsa Maliyamu kugoloka luhuma alele kota fyogalajitsaga malajitso ga Musa, Yusufu na Maliyamu vakamutolaje mwana mbaka Yelusalemu ili vamuviche mwana halutalo ha Mutwa, 23 kota fyo yandikwe mu malajitso ga Mutwa kuta, "Chila mwana mukwamitsi, akuva muhagulwa va Muntsajila." 24 Kahi vavaga vahele kutawula nambiko, ng'unda mbina tsivili awu ng'unda ntsana tsivili, kota fyo yaganikaga mu malajitso ga Mutwa. 25 Luvala lulo ku Yelusalemu kwavaga na munu yoachemwaga Simiyoni yoadichilwaga halutalo ha Mulungu, nayo atsindilaga kwa wuwiniwo wukuluso wa vanu Vaisilaheli na Muhe va Mulungu avaga hamwe na munu uyo. 26 Muhe va Mulungu ali amugubulye kuta, siakufwa mbaka hala ho akumuwona Chilisito va Mutwa. 27 Muhe va Mulungu akamulongotsaje Simiyoni akabitaje ha Nyumba ya Mulungu, Yusufu na Maliyamu vakamuletaje mwana Yesu ili atambichilwe kota fyoyaganikaga na malajitso. 28 Simiyoni akamutolaje mwana uyo mumawoko gake, akamuhongetsaje Mulungu na kulonga,

29 "Lelo Mutwa ukwitsitse chila cho ukali undahye,

undeche heni ntsi mutantsi vako mbite kwa Mulungu kwa wusichimafu.

30 Kwasawuli kwa miho gangu ntsiwuwene wukuluso wako,

31 wo mwanga uwuvisile halutalo ha vanu.

32 Mwangatsa gogukuvang'alichila vanu vala wosi Vayawudi,

na wutukufu kwa vanu vako Vaisilaheli."

33 Dade na yuve va Yesu vavaga vantinuka kwa ndongwa tsotsilonjiche kwasawuli ya mwana uyo. 34 Simiyoni akavatambichilaje, akalongaje na Maliyamu kuta, "Mwana yuno ahagulwe na Mulungu ave chambutso cha kugwa na kukuluswa kwa vanu wolofu va Isilaheli. Nayo yoyikuva ndajilo yoyikukanwa na vanu wolofu, 35 na heve mwene ukususutala ndalahela, iho mahotso ga vanu wolofu gakugubulwa." 36 Kahi ha Nyumba ya Mulungu kwavaga na mudala yumwe Muloli, litawa lyake achemwaga Ana muhintsa va Fanuweli, yoali va likabila lya Aseli. Avaga mugogolo ndala hela, ali atoliche na mulume vakikalasaje myaka saba, na hambele mulume vake akafwaje. 37 Akikalaje mufwile mbaka hala hoavaga mugogolo va myaka samanini na jitayi. Luvala ulo lweka siawukaga ha Nyumba ya Mulungu, angumutsumitsa Mulungu, ikalaga bila kulya kuno angumusuka Mulungu hamunyi na hachilo. 38 Luvala lulo akatsaje halutalo ha Yusufu na Maliyamu, akamuhongetsaje Mulungu na kulonga ndongwa tsa uyo mwana, kwa vanu veka wovihuvilaga wukuluso wa Yelusalemu.

39 Yusufu na Maliyamu hovavaga kusinda kudita fyeka fyofin'ganika na mumalajitso ga Mutwa Mulungu, vakawuyaje hamwe ku Galilaya, ku muji gwawo gwa Natsaleti. 40 Mwana akakalagalaje na wuwuya wa Mulungu wavaga hamwe nayo.

41 Chila mwaka valeli va Yesu vavaga vatsovye kubita ku Yelusalemu hachipindi cha sikukulu ya pasaka. 42 Mwana hoavaga kuva na myaka kumi na jivili, vakabitasaje ku sikukulu iyo kota fyovaditaga. 43 Hoyavaga kusila sikukulu vakantsaje kuwuya kukaye kwawo, lechelelo mukwamitsi Yesu akasigalaje ku Yelusalemu. Valeli vake sivalutselaga lulongwa ulo. 44 Vatyaga kuta vali hamwe nayo mwilugu, vakajendaje lujendo lwa chimunyi cheka hambele vakantsaje kumusaka mwilugu lya vanu na mwa vang'olotsawo. 45 Vakavaje kulemwa kumuwona, Yusufu na Maliyamu vakawuyaje ku Yelusalemu kumusakitsa. 46 Siku ya kadatu vakamuwonaje ha Nyumba ya Mulungu, ichite hagati ha vadahitsi va malajitso ga Musa, anguvahulikitsa na kuvaputsa mbutso. 47 Veka wovamuhulikaga vakapomokaje kwasawuli ya nyala tsake, na ntselo tsake na njibulo tso avajibulaga. 48 Dade na yuve vavaga kumuwona vakapomokaje. Yuve akalongaje nayo kuta, "Mwanangu, mbe ndawuli utuditye hino? Dado na heni tukusakije kwa wususutafu chila hono" 49 Yesu akavalonjelaje, "Kwasawuli yachi musakije heni? Simutselije kuta ntsin'ganika kuva ha Nyumba ya Dada vangu?" 50 Lechelelo Maliyamu na Yusufu sivatselaga chila cho alongaga Yesu. 51 Ihyo vakawuyasaje hamwe mbaka ku Natsaleti, akavaje anguvahulikitsa. Lechelelo yuve akatsivikaje ndongwa itso tseka mu numbula yake. 52 Nayo Yesu akendelelaje kukalagala kwa kuva na ludali na ntselo, akidichilwaje na Mulungu na vanu.