1 Ino lelo vang'olotsangu, kwasawuli tunafyo fila Mulungu fyo avaga alontsile kuta akutupela, sambi tun'ganika tufileche finu fyeka fyo finchafula mivili na numbula tsetu, ili twikale nachene kota hila fyo an'gana Mulungu.

2 Tunguvasuka mutugane, kwasawuli hetwe situlapungana na munu yoyuve hagati henyu, kaha situmudisile munu yoyuve ayaje, nambe kumutsulumula munu yoave. 3 Sinambendonje ndongwa itsi ili tsivahije henye, ila kwasawuli tsavaga ntsivalonje luhuma hamutalo kuta nambe ku wumi nambe mu chifo, hetwe tunguvagana henye nachene. 4 Ntsinalyo litumbilo likomi hala ho ntsinkuva ntsinlonga na henye na tsinguvahuvila. Mu ng'odeko tsetu tumemile lihuvilo na kumema wuhechelelo wukomi ndalahela.

5 Hala hotwavaga kufika ku Machedoniya, situkesye. Twagatswaga chila lubali, mwivala mwetu mwavaga na ng'odeko, na munumbula twavaga na muhwehwe. 6 Lechelelo Mulungu yo avakangatsaga wo vagotswe, atukangitse hala ho avaga kutsa Tito. 7 Siyo kutsa kwa Tito hela ko kwatukangitse, ila na kwa tsila ndongwa tso mwamulonje kuta fyo mun'gana mumbone heni na hila fyo munsusutalila ndongwa tso tsamasile. Kaha hila fyo mun'gana kunanjila heni ili wuhechelelo lwangu wuve wukomi kulutila fyo wavaga luvala loluve.

8 Nambe ntsavadisile muve na wususutalo kwa kuvandichila baluva yila, ila sinambe ng'alale. Nambe na heni ntsasusute luvala ludodo hela, ila ntsatselaga kuta baluva yangu yavapelye wususutafu wo wawaga wa luvala ludodo hela, 9 lechelelo sambi ntsina wuhechelelo, siyo kwasawuli mwapasile wususutalo, ila kwasawuli wususutalo uwo wuvadisile kutsihala ndongwa tsenyu ntsibi na kumupituchila Mulungu. Ihyo mwasusute kota fyo aganaga Mulungu na ihyo hetwe sitwavadisile mukodeche kwa lulongwa loluve. 10 Kwakuva wususutafu kwa Mulungu wumuditaga munu kutsihala ndongwa tsake ntsibi na kumupituchila mwene na kukuluswa, kaha wuletaga wukuluso na wulihela ng'alatsi. Lechelelo wususutafu wo wunkwambutsa na ndongwa tsa muinyi wuletaga chifo. 11 Ino lelo mulave hila wususutafu wo aletaga Mulungu fyo wavapelye fwayida mugati mwenyu, sambi muveye vanu wo kota hila fyo an'gana Mulungu. Mun'kola ndongwa kwa wukangatso, na kwipamana, na kuwuvipila wubi, na kumuhesimila Mulungu, na kugana kumbona, na kaha mun'gana ndongwa tseka tsiditwe kwa wuwuya. Henye mwilaje kuta muna wuwuya kwa chila lulongwa.

12 Nambe ihyo ntsalongwe kuvandichila baluva yila siyo kwasawuli ya yula ng'ani yo avaga adisilile wubi awu kwa yu yo avaga adisilwe wubi. Lechelelo ntsavandichye ili mulave muvene halutalo ha Mulungu, hila fyo mwitawe kwasawuli ya hetwe. 13 Ihyo twahongitswe ndalahela.

Kaha kwa kuhongetswa uko twahechelye ndalahela hala ho twavaga kumuwona Tito hila fyo avaga na wusangalo, kwasawuli ya hila fyo mwamudisile asangalale. 14 Ntsavaga ntsivatsumye kwa Tito, na henye simungwisise ndaya. Kota hila fyo twamulonje wukweli na kitsumila halutalo hake kwasawuli ya henye, nayo iwen'ye mwene kuta sitwavaga tumudetelitse. 15 Ihyo wugano wa Tito kwa henye wunlutila ndalahela hala fyo ankwiwuka hila fyo mwamuhulikitsaga, na hila fyo mwamwanuchilye kwa kukakama. 16 Heni Pawulo ntsinhechelela ndalahela, hila fyo ntsinguvahuvila henye nachene kwa chila chinu.