1 Ulu lo luvala lwa kadatu heni kutsa kwa henye. Mandiko ga Mulungu gandikwe hino, "Chila lulongwa ho lunkuva lunlamulwa, han'ganika have na vanu vavili awu vadatu wo vatsiwene na kutsihulika ndongwa itso." 2 Mwanga ntsavalonje hala ho ntsavaga na henye mala ya kavili. Kaha ntsin'wila kulonga ho ntsili haduhu, honguva kutsa singuvawonela lusungu vala wo valongwe kudita ndongwa ntsibi na hamwe na vanu vanji. 3 Nguvalajila hila Chilisito fyo anlonga kukolela kwa heni. Chilisito siyo mupefu kwenyu, ila anawo wuvetso hagati henyu. 4 Nambe yivaje avambitwe mu musalaba chipefu hela, lechelelo sambi ali mumi na angikala kwa wuvetso wa Mulungu. Hetwe natwe tuli vapefu kota hila Chilisito fyo avaga, lechelelo hala ho tungitang'ana na henye tunkuva tuli wumi hamwe nayo ili tuvatumichile henye kwa wuvetso wa Mulungu.

5 Mwihime mu vene mulave kuta mungumutumba Chilisito. Mwilave mu vene! Mbe, sinambemutsele kuta Yesu Chilisito ali mugati mwenyu? Manyi yive siyo ihyo, mukuva mulemulwe duve kuva hila fyo mun'ganika muve! 6 Ntsingihuvila muntsela kuta hetwe silwatulemulwe lulongwa ulo. 7 Ila tungumusuka Mulungu kuta mulekaje kudita lulongwa lubi loluve, siyo kuta hetwe tuwoneche tulusumile lulongwa ulo, chotuhotsa kuta vanu vawone kuva mudisile lulogwa lunofu. Nambe tuwoneche kuta hetwe tulemulwe lulogwa ulo. 8 Hetwe situfuluche tusumane na wukweli, lechelelo chila luvala tun'dita ndongwa tsa wukweli. 9 Tunhechelela hila fyotuli vapefu, lechelelo henye munawo wuvetso. Kaha tungumusuka Mulungu kuta avakangatse mu litumbilo lyenyu kota fyo an'gana mwene. 10 Ino lelo ntsivandichye baluva yino luvala lo ntsili kutali, ili ho nguvakutsa ndekaje kuva mukali kwa wuvetso wo amelye Mutwa. Mutwa amelye wuvetso wa kuvatsenga na siyo kuvagumulanga.

11 Duve lelo, vang'olotsangu mwikalaje finofu. Mwikangatsaje mu litumbilo, mwibataje hila fyo ntsivalonje, muvaje wo vamwe na kikala kwa wusichimafu. Nayo Mulungu munya wugano na wusichimafu weka akuva hamwe na henye.

12 Mwisamusaje kwa kinonela henye kwa henye!

13 Vanu veka va Mulungu wo valikuno vanguvasamusa.

14 Ntsinguvasuchila lusungu lwa Mutwa Yesu Chilisito, na wugano wa Mulungu, na wuhantso wa Muhe va Mulungu wuve na henye nyeka.