1 Hetwe tunkola katsi hamwe na Mulungu, ihyo tunguvagongolani kuta mulekaje kululeka lusungu lo mwanuchye kuhuma kwa Mulungu luyaje hihinago hela. 2 Mulungu avaga alontsile kuta,

"Luvala lwa kidichilwa, ntsakuhulikitse,

na luvala lwa wukuluso, ntsakutantsile."

Duve, Ulu lo luvala lwa kudichilwa, na ino lelo yo siku ya kukuluswa!

3 Hetwe mu katsi yetu sinambetumwambutse ikuvatse munu yoyuve, tun'dita ihyo ili wutantsi wetu kwa Mulungu wuleche kubedalwa na munu yoyuve. 4 Ila mu chila lulongwa tupate ntsumitso nofu, kota fyo yiganikaga yive kwa vatantsi va Mulungu, twikangatse mu fivembo na mung'alatsi na mu ng'odeko. 5 Twatofilwe na kuwopwa mu nyumba tsa vawopwa, mu fitika na mu katsi nalamu, na kikala miho, na kwa kuva na ntsala. 6 Tungilajila kuta tuli vatantsi va Mulungu kwa kudita hila fyo an'gana mwene, mu ntselo na kwa kikangatsa, mu wuwuya na kwa Muhe va Mulungu, na kwa wugano wa wukweli, 7 kwa kulonga ndongwa tsa wukweli na kwa kihuvila wuvetso wa Mulungu wo wakolaga katsi hamwe na hetwe. Wuwuya wo chitovelo chetu cha kututanga kwiyamila na kwitovela. 8 Hetwe tungumutumichila Mulungu nayivaje vanu vangutuhesimila awu vangutubedala, vatutsumile awu vatulonje fibi. Tun'woneka kota tuli vadesi kumbe tuli vanu wo tunlonga wukweli, 9 tunkuva kota vanu wo sivatambulwa kumbe tuli vatambulwa, kota vanu wo vankufwa na kumbe tuli wumi, tuntowa lechelelo sinambetufwe. 10 Tun'kuva kota vanu vasusutafu, lechelelo siku tseka tun'sangalala. Tun'woneka vagayu na kuno tunguvadita vanu wolofu vave vafuchifu, tukuva kota vanu wo tulihela chinu kumbe tunafyo finu fyeka.

11 Vang'olotsetu Vakolindo, tunlonga na henye bila kuvafiha chinu chochive kuno tunguvagana nachene. 12 Hetwe situlesile kuvagana henye, ila henye wo mulesile kutugana hetwe. 13 Ihyo lelo ntsinlonga henye kota vana vangu kuta mun'ganika mwigane kota hetwe fyo tunguvagana.

14 Mulekaje kihantsa hamwe na vanu wo sinambevamutumbile Mulungu. Mbe, wuwuya na wubi fifuluche fihanje? Mbe, mwangatsa gufuluche gwihatse na jitsa? 15 Mbe, kuna wupatano wachi hagati ha Chilisito na Lihoka? Munu yo amutumbye Mulungu ana wihantso wachi na munu yo sinambeamutumbe Mulungu? 16 Mbe, kuna wihantso wachi hagati ha Nyumba ya Mulungu na milingu ja wudesi? Kwakuva hetwe tuli Nyumba ya Mulungu yo mumi. Kota mwene Mulungu fyo alontsile kuta,

"Ngikala hamwe nawo

na ngujendasa hamwe nawo,

nguva Mulungu vawo

nawo vakuva vanu vangu."

17 Kaha Mutwa Mulungu an'wila kulonga,

"Muwuche hagati hawo,

mwibagule nawo,

mulekaje nambe kudometsa chinu cho chikudita ndeche kuvadichila,

na heni nguvanuchila.

18 Nguva Dada venyu,

na henye mukuva vana vangu valume kwa vahintsa.

Heni Mutwa Mulungu munya wuvetso weka yo ntsinlonga ihi."