1 Ihyo lelo, Mulungu kwa lusungu lwake atupelye wutantsi wuno, na ihyo situkujela tugotsole. 2 Tutsilesile nachene ndongwa tsa nyoni na tsa wufiho, kaha sinambetwikale kwa kutsidita ndongwa tsa wudesi, na sinambe tuhantse Ndongwa tsa Mulungu na wudesi. Ila kwa kulonga wukweli tungilajila kuta tudichilwe, ihyo fyo vanu vafuluche vatsele kuta hetwe tuli vanu va chinyandawuli halutalo ha Mulungu. 3 Lechelelo manyi tsive Ndongwa Nofu tso tunvikula tsifihite, duve tsikuva tsifihite kwa vanu vala wo sinambevamutumbe Chilisito. 4 Vanu iwo sinambevatsitumbe Ndongwa Nofu, kwasawuli Lihoka litsibofolantsile nyala tsawo, ili valeche kuguwona mwangatsa gwa Ndongwa Nofu tsa wuvina wa Chilisito yo sula yake Mulungu. 5 Ino lelo sinambe twivikule tuvene, ila tungumuvikula Yesu Chilisito kuta yo Mutwa, na hetwe yo vatantsi venyu kwasawuli ya mwene. 6 Ihyo Mulungu yo alontsile, "Mwangatsa gung'alikaje mu jitsa," uyo yo mwangatsa go gung'alikaga mu numbula tsetu, nayo uyo yo atupelelye mwangatsa gwa ntselo ya wumelemo wake mu sula ya Chilisito.

7 Ino lelo hetwe yo tuli kota fitumbe fyo fifuluche fituliche chipefu hela, tuvisilwe hachiba tsa Chimuhe mugati mwetu, ili yitselaniche kuta wuvetso wuno wukomi siwun'huma kwa hetwe ila wunhuma kwa mwene Mulungu. 8 Tun'kodeka kwa ndongwa ntsolofu lechelelo sinambe tulemwe, tumpata muhwehwe lechelelo sinambe tugotsole, 9 tun'kodwa lechelelo sinambetulechwe na Mulungu, kaha tun'totswa hasi lechelelo sinambealeche kututanga. 10 Chila siku van'gana kutukopola kota fyo vamukopwe Yesu, ili wumi wa Yesu wuwoneche mu mivili jetu. 11 Kwakuva luvala luno ho tunkuva wumi, siku tseka vanu van'gana kutukopola kwasawuli ya Yesu, ili wumi wake Yesu wuwoneche mu mivili jetu jino jo jifwaga. 12 Ihyo lelo hetwe tunkodeka na kuva habehi na kutajika, lechelelo henye munguwupata wumi.

13 Yandikwe mu Mandiko ga Mulungu kuta, "Ntsimutumbite Mulungu na kwasawuli iyo ntsalontsile." Hetwe natwe tunayo numbula yiyo ya kitumbila, tuntumbila na kwasawuli iyo tunlonga. 14 Tuntsela kuta Mulungu yula yo amutsilipwe Mutwa Yesu, yo akututsilipula na hetwe kota fyo amutsilipwe Yesu na akutuvika halutalo hake hamwe na henye. 15 Ndongwa tseka tsino tsili kwasawuli yenyu, ihyo lusungu lwa Mulungu luntawulwa na vanu wolofu na kunkuva na ndumbo ngomi, nayo Mulungu ampata ntsumilo ntsolofu ndalahela.

16 Kwa ihyo sinambetugotsole. Nayivaje mivili jetu jinsakala, ila mugati mwetu tun'ditwa wupya chila siku. 17 Ng'odeko tsetu ndodo na ya luvala ludodo hela, tsingutuvichila chang'ani ntsumitso tsa siku tseka bila wudugo tso ngomi kulutila ng'odeko tsetu. 18 Ihyo sinambetufihuvile finu fyo fin'woneka, lechelelo tungihuvila finu fyo sinambefiwoneche, kwasawuli finu fila fyo fin'woneka ifyo fivaga fya luvala ludodo hela, lechelelo finu fila fyo sinambefiwoneche, ifyo fivaga fya siku tseka.