1 Ntsinwiniwa mukamuntsindile chidogo, na yivaje tsinwoneka mupufi chidogo! Ena, muntsindile chidogo. 2 Ntsinguvamila kota hila Mulungu fyo anguvamila. Kwasawuli henye munakota mwenga munofu yo siamutsele mulume, yo ntsamukwelye mulume yumwe hela, na mulume uyo yo Chilisito. 3 Lechelelo ntsin'kogopa kuta, kota hila Efwa fyo adetelitswe kwa wusugu na yila ntsoka, nago mahotso genyu nago gafuluche gapitulwe na mulamule kuwuleka wugolofu wenyu wa wukweli kwa Chilisito. 4 Mun'woneka kuta muli chang'ani kumwanuchila munu yoave manyi atse na kuvavikulila yesu yunji tebe na yula Yesu yo twavavikulye hetwe. Kaha mun'woneka muli chang'ani kumwanuchila muhe yunji tebe na yula Muhe yo mwamwanuche, awu kwanuchila ndongwa tso tsinji tebe na Ndongwa Nofu yo mwanuche hamutalo.

5 Sinambentsihotse kuta ntsili mudodo kulutila iwo wo vangichema, "vatumi vavina." 6 Yifuluche yive heni sintsifitsele kulonga finofu, lechelelo kusoma ntsasomile vaya! Lulongwa ulo twalulaje bila lufiho na chila hono kwa chila luvala.

7 Mbe, ntsadisile fibi kwika ili ntsivinule henye kwa kuvavikulila Ndongwa Nofu tsa Mulungu bila kunyomba chinu chochive? 8 Hala ho ntsakolaga katsi ya wutumi hagati yenyu, ntsatangwaga na fikundi finji fya Chilisito. Ntsavaga kota ntsinguvasukula vene magobole ili ntsivatanje henye. 9 Hontsavaga hamwe na henye sintsamukodite munu yoyuve kwa kumusuka magobole, kwasawuli vanu vanya litumbilo lya Chilisito wo vahumye ku Machedoniya vandetye chila chinu cho ntsagayaga. Ntsiyangalilaga ili ndeche kuvagatsa, nambe sambi ngwendelela kudita ihyo. 10 Kuduhu munu yoyuve va ku Akaya yino yeka yo afuluche andemetse kidayila lulongwa luno, ntsinguvalonjela ihyo kwasawuli wukweli wa Chilisito wuli mugati mwangu. 11 Kwasawuli yachi ntsinlonga ihi? Mbe, sinambentsivagane henye? Nambe mwene Mulungu antsela hila fyo ntsinguvagana!

12 Heni ngwendelela kudita hihyo kota fyo ntsin'dita sambi, ili kuvadita vala wo vansaka hila fyo vakuva kota hetwe vagotsole, vala wo vangidutsa kuta vankola katsi kota hetwe. 13 Vanu kota iwo wo vatumi va wudesi, vankola katsi chinya wusugu na wo vangibadila ili vawoneche kota vatumi va Chilisito. 14 Lulongwa ulo siyo lupya, kwasawuli nambe Lihoka lyene libadilaga ili liwoneche kota mutantsi va mwangatsa. 15 Ihyo silukuva lulongwa lupya, manyi iwo vatantsi vake nawo vibadile na kuva vawuya halutalo ha Mulungu. Ino lelo ku wudugo vakuchipata chila cho chihwana na ndongwa tso vatsiditaga.

16 Ntsinlonga kaha kuta munu alekaje kuhotsa kuta heni ntsili mupufi. Lechelelo nambe munyotsela chinya ihyo, duve muntsanuchile kota mupufi ili na heni ntsidutse chidogo. 17 Chila cho ntsinlonga sambi kwa lulongwa luno lwa kidaya siyo chila cho andajitse Mutwa, ntsinlonga kota munu mupufi hela. 18 Ihyo vanu wolofu vangitsumila kota vanu vala va muinyi fyo vaditaga, hihyo na heni ngitsumila. 19 Vanu henye muna nyala ntsongofu ndalahela, hila fyo mungidikitsa kuva hamwe na vanu vapufi! 20 Mungidikitsa kuva hamwe na munu nambe yo anguvadita muve vapogotsi, na ave anguvasukula finu fyenyu, awu anguvasindamitsa, na ave munu anguvatsalawula na kuvatsabulanga kumiho! 21 Ntsin'wona nyoni kulonga ndongwa tsino,

Lechelelo na hetwe twavaga vapefu kudita ndongwa kota itso! Nambe yive fyoyili, na manyi kuve na munu yoave yo afuluche itsumile chinu, "Ntsinlonga kota munu mupufi!" Heni ntsingitsumila kwa lulongwa ulo. 22 Mbe, vene wo Vayebulaniya? Na heni hihyo. Mbe, vene wo Vaisilaheli? Na heni hihyo. Vene vahumye mu lulelo lwa Ibulahimu? Na heni muyawo ntsili hihyo. 23 Mbe, vene wo vatantsi va Chilisito? Lelo ntsinlalatuka kota mnyalukwale, heni ntsivalutye veka! Heni ndisile katsi ngomi kulutila veka, ng'odiche ndalahela, funtsilwe mu nyumba tsa vawopwa ndalahela, nofilwe mala ntsongofu, kaha ng'ulwiche kukopolwa mala ntsongofu kulutila vene. 24 Ntsatofilwe jila mikotya ja Chiyawudi salasini na tisa,* mala kahanu. 25 Ntsatofilwe mikotya ijo ja Chilumi mala kadatu, ntsatofilwe kwa maganga mala kamwe, ntsakuluche mumalenga kwasawuli mitumbwi jabenekaga mala kadatu, ntsakite miho mu malenga molofu chilo cheka na munyi yeka, 26 chila luvala mu njendo tsangu ntsakulukaga na ng'oko tsa mumalenga na tsa vawumiyani, na mu ng'oko tsila tsa Vayawudi vayangu na tsinji kuhuma kwa vanu wosi Vayawudi, ntsakulukaga na ng'oko tsa ku mujini na tsa kijejele, ntsakulukaga mubahali na tsa kuhuma kwa vafwasi va wudesi. 27 Mbeye mu katsi nalamu na ya kukodeka, kikala miho mala ntsongofu, ntsikalaga na ntsala na ng'alu na kuleka kulya kwasawuli ya Mulungu mala ntsongofu, kaha na kutowa na ng'ala na kugaya nambe mwenda gwa kigubika hela. 28 Kulutila ndongwa itso tseka, ntsavaga na mbomolo ngomi ya kufimilila fikundi fyeka fyo vingumutumbila Chilisito. 29 Manyi munu ave chaka na heni mbaga chaka. Manyi munu amwambutse muyage adite ndongwa ntsibi, na heni mbonaga fibi.

30 Manyi yikun'ganika ntsitsumile, duve ngitsumila kwa ndongwa tso tsinlajila wupefu wangu. 31 Mulungu na Dada va Mutwa Yesu yo an'ganika kutsumitswa siku tseka, uyo yo antsela kuta heni sinambendonje wudesi. 32 Hala ho ntsavaga ku Damesichi, muvina yo avaga mu wuntsajila wa muntsajila Aleta, avisile vimilitsi mu lwitsi lwa muji ili vambate. 33 Lechelelo ntsakuluche kwa kuvikwa mu litangula likomi na kuntsisa mu lidilisa lya mu lukantsi lwa muji.