1 Ntsin'ganika ntsitsumile na yivaje siyo finofu. Ila ngihala tsila nduntsuchilo na wugubulo wo amelye Mutwa. 2 Ntimutsele munu yumwe hino yo avaga angumutumbila Chilisito, munu uyo myaka kumi na jitayi jo jilutye avaga achipulwe kilanga ndalahela. Manyi avaga mu muvili, awu avaga mu chimuhe heni sinambentsele, ila Mulungu mwene antsela. 3 Ntsilonga kaha, heni ntsimutsele munu uyo, lechelelo sinambe ntsele kuta manyi avaga mu muvili, awu avaga mu chimuhe, ila Mulungu mwene antsela, 4 munu uyo achipulwe mbaka ku Paladiso.* Uko akahulikaje ndongwa tso siafuluche munu atsilonje. 5 Fuluche ntsitsumile kwasawuli ya munu kota uyo, lechelelo sifuluche ntsitsumile ntsimwene, ino heni ngitsumila wupefu wangu. 6 Manyi ntsive ntsin'gana kitsumila sintsikakuva mupufi, kwasawuli ntsika kuvalonjela wukweli. Lechelelo sinambentsitsumile hila fyo yin'ganika ili munu yoyuve aleche kutsela kuta na heni ntsili munu hagati ha vanu.

7 Lechelelo ili ndeche kitsumila kwasawuli ya uwo wugubulo wukomi wo ntsawuwene, ngapelwaje wusungu mu muvili gwangu guve kota mwifa, ugo go jumbe va Lihoka netseche ili ndeche kitsumila. 8 Ihyo ntsamugongwe Mutwa mala kadatu ili anyetsele ng'odeko itsi. 9 Lechelelo mwene Mutwa akandonjelaje, "Wuwuya wangu wo ngupelye wukukwilye, kwasawuli wuvetso wangu wuwonekaga kwa munu mupefu." Kwasawuli iyo ngitsumila kwa wuhechelelo ndalahela kwasawuli ya wupefu wangu, ili wuvetso wa Chilisito wikale na heni. 10 Ihyo lelo ntsingidichila kuva mupefu, na kuligwa, na kubedalwa, na ng'odeko kwasawuli ya Chilisito. Kwasawuli hala ho ntsinkuva mupefu, iho ho ntsinkuva na wuvetso.

11 Mbeye kota mupufi na henye yo mundatsimitse ntsive ihyo. Henye yo muganikije muntsumile heni, nantsive heni sintsili chinu, ila siyo mupefu kulutila vala wo vangichema "Vatumi vavina." 12 Hontsavaga kwa henye ntsikangatsaga, na ntsaditaga ndongwa tsa ndajilo na miwujitsa natso tsandaje kuta heni yo mutumi va wukweli. 13 Mbe, chinu chachi cho mwagayite kulutila fikundi finji fyo fingumutumba Chilisito? Ila heni kwa lubali lwangu si ntsavakodile munyudumile? Manyi muwone kuta ng'osise, duve nyongitse ntsiyenu kwa kuleka kuvaditila ihyo.

14 Lelo ntsili chang'ani kutsa kwenyu mala ya kadatu, lechelelo si nguvakoda. Heni sinambesache finu fyenyu, ila ntsinguvasaka henye, kwasawuli siyin'ganikaga vana kuvavichila valeli vawo hachiba, ila valeli vavavichilaga vana vawo. 15 Ihyo heni nguva chang'ani kufitawula finu fyangu ili fitumilwe na henye, nambe kitawula heni mwene kwa fwayida ya numbula tsenyu. Mbe, hala ho ntsinlutila kuvagana, henye ho mukuleka kungana?

16 Nayive fyoyili, mukidichila kuta heni sintsavakodile. Lechelelo munu afuluche alonje kuta, "Kwasawuli Pawulo musugu akuva avapatite kwa kuvadeteletsa." 17 Mbe, munu yoyuve yo ntsamutumile kwenyu, ntsamulajitse avahombetse chinu chochive? 18 Ntsamugongwe Tito na kumulajitsa hamwe na mung'olotsetu yunji. Mbe, Tito avahombitse chinu chochive? Mbe, sinambemutsele kuta hetwe tunlongotswa na Muhe yuyulaga, na katsi yetu yoyimwe?

19 Mbe, munhotsa kuta tungiyamila tu vene halutalo henyu? Lechelelo hetwe tunlonga halutalo ha Mulungu kota fyo van'ganika kudita vanu yo vangumutumbila Chilisito. Vang'olotsangu mutsele kuta chinu chochive cho tunguchidita, tunguchidita ili kuvakangatsa henye. 20 Ntsinkogopa kuta hala hongutsa fuluche ntsivafiche kota hila fyo sintsin'gana kuvafika, na ihyo heni nguganika kuwoneka finji kwa henye. Ntsinhotsa kuta mufuluche muve na ng'alatsi, na mbafya, na lilakali, na wusonganitsi, na wuhehi, na kidutsa, na kisova, na chitika. 21 Ntsinkogopa kuta ihyo honguva kutsa kaha kwenyu, Mulungu afuluche andite ntsiche, na ihyo nguvavembela wolofu wo vadisile ndongwa ntsibi na kuleka kumupituchila Mulungu kwa ndongwa tsawo tsa wubi, na kiwiniwa kuvasa na valume awu vadala vanji, na ndongwa tsa waafu tso vatsidisile.