1 Baluva yino yinhuma kwa heni Pawulo, yo nyagulwe kota fyo aganile Mulungu ili ntsive mutumi va Yesu Chilisito, tulihamwe na mung'olotsangu Timoseyo tunguvalamusa.

Ntsinguvandichila vanu chikundi cha vanya litumbilo lya Chilisito chochili ku Kolindo na kwa vanu veka wo vali ku Akaya wo vahagulwe na Mulungu.

2 Tungumusuka Mulungu va Dada vetu munya wuvetso na Mutwa vetu Yesu Chilisito avawonele lusungu na kuvapelani wusichimafu.

3 Atsumitswaje Mulungu yo Dada va Mutwa vetu Yesu Chilisito, yo Dada munya lusungu na yo atupelaga wukangatso. 4 Mulungu yo atukangatsaga hetwe mu ng'odeko tsetu, ili na hetwe tuvakangatse vanu vanji wo vali mu ng'odeko yoyive kwa wukangatso wuwulaga wo twanuchilaga hetwe kuhuma kwa Mulungu. 5 Kota hila ng'odeko tso tungutsipata kwasawuli ya kumutumba Chilisito fyo tsinkongetseka, na hihyo wukangatso wa Chilisito fyo wunlutila kuva wukomi. 6 Manyi hetwe tuve tunkodeka, yinkuva ihyo kwasawuli ya kuvakangatsa henye mu wukuluso wenyu! Kaha hala hetwe ho tunkangatswa, yinkuva ihyo ili tuvakangatse henye. Ihyo ho mukudaha kwikangatsa kota hetwe fyo tungikangatsa. 7 Hihyo tungihuvila kuta, kota hila fyo mwihantsitse na hetwe mu ng'odeko tsetu, ho hihyo fyo mukihantsa mu wukangatso wo angutupela Mulungu.

8 Vang'olotsetu tun'gana mutsele tsila ng'odeko tso twapasile ku inyi ya Asiya. Hila fyo twatache kulutila wuvetso wo twavaga nawo, mbaka tukagotsolaje kuva wumi. 9 Nachene twahotsaga kufwa hela, lechelelo tuntsela kuta ndongwa itso tsahumye ili kutudita tuleche kihuvila tuvene, ila twendelele kumutumbila Mulungu yo kutsilipulaga vanu. 10 Mwene Mulungu yo atukuluse chinya hila mu ng'oko yila ya chifo akwendelela kutukulusa kaha, na tungumuhuvila kuta akuwila kutukulusa. 11 Kota hila henye fyo mwihantsitse na hetwe ili mututanje kutusuchila kwa Mulungu, nawo vanu wolofu vakumulumba Mulungu badili ya hetwe kwasawuli ya fifunje na lusungu lo twapasile kwa kujibulwa kwa suko tsa vanu wolofu.

12 Duve lelo, tufuluche kwidaya mu numbula tsetu kuta, twichite mu inyi na hagati henyu kwa kwika na wugolofu wo atugavye Mulungu. Hetwe twihuvye wuwuya wo wunhuma kwa Mulungu, siyo nyala tsetu tsa chiwunu hela, ihyo fyo twadisile kwa vanu na nachene twadisile kwenyu. 13 Tuvandichlye henye ndongwa tso mukuvetsa kutsisoma na kutsitsela. Heni ntsingihuvila kuta mukutsitsela nachene, 14 kwasawuli mbaka sambi mutweliwe chidogo hela. Kaha tuntsela kuta siku yo akuwuya Mutwa vetu Yesu, mukitsumila hetwe kota hihila hetwe fyo tukitsumila henye.

15 Ntsavaga na lihuvilo kwa ndongwa itsi, na ihyo ntsaganaga kulongola kutsa kwenyu ili muve na fwayida mala kavili. 16 Ntsavaga mantsile kuta, nguvajendela hala ho nguva mulujendo kubita ku Machedoniya na hala ho nguva ntsin'wuya. Kahi munanje mu lujendo lwangu lwa kubita ku Yudeya. 17 Mufuluche mwiputse kuta kwasawuli yachi ntsagalwe lulongwa lwangu, awu tsapantsile kota fyo valongaga vanu hela bila kuhotsa? Mbe, munhotsa kuta heni ntsinakota vanu wo valongaga, "Ena" Nawo vapitulaga luvala lulo, "Ndaya?" 18 Lechelelo kota hila Mulungu fyo vakihuvilwa, na heni lulongwa lo ntsinguvalonjela silufuluche luve, "Ena" Na luvala lulo luve "Ndaya," 19 kwasawuli Yesu Chilisito, Mwana va Mulungu yo twavavikulye heni na Silifwano na Timoseyo, siavaga "Ena" Na luvala lulo luve "Ndaya," ino kwa Mulungu siku tseka yivaga "Ena." 20 Ihyo ndongwa tseka tso avaga alontsile Mulungu kuta akutupela kukolela kwa Chilisito tsiveye, "Ena." Ihyo kwa mwene tunlonga, "Tavile" Kwasawuli kumutsumila Mulungu. 21 Mwene yo Mulungu yo atuditaga hetwe hamwe na henye kwima nachene kwa kihantsa na Chilisito. Nayo atuhagwe, 22 na kutuvika hetwe tuve vanu vake mwene kwa kutuvichila Muhe vake mugati mwetu ave yalama ya kuta tuli vanu vake, na tungitumbila kuta akutuditila fyeka fyo avaga lontsile kuta akutupela.

23 Nayo Mulungu an'tsela kuta ntsinlonga wukweli, sintsawutsile ku Kolindo ili kuvawonela henye lusungu. 24 Siyo kota tun'gana kuvananahitsa mu litumbilo lya Chilisito. Ila henye munkwima kwa wuvetso wenyu, lechelelo hetwe tunkola katsi hamwe na henye kwasawuli ya wuhechelelo wenyu.