1 Lelo, kwasawuli ya gula muchango gwa vanu va Mulungu wo vali ku Yelusalemu. Muditaje kota fyo ntsavalajitse vanu vanya litumbilo lya Chilisito wo vali ku Galatiya. 2 Chila Jumapili chila munu abagulaje chiyasi cha magobole, kota chipato chake fyochili, ili hala honguvantsitsitse kuleche kuva na wulatsima wa kusoga michango. 3 Hala honguva ntsitsitse, nguvatuma vala wo mukuvahagula kuhuma hagati henyu, ili vasindiche baluva na fifunje fyenyu uko ku Yelusalemu. 4 Manyi yikuva finofu na heni mbite, duve tukubitasa hamwe.

5 Ngutsa kwenyu hala ho nguva njendye ku Machedoniya, kwakuva ntsin'gana kuvajendela vanu va ku Machedoniya. 6 Fuluche ntsikale na henye kwa luvala lutunga, awu fuluche ntsikale na henye mu chipindi cheka cha ng'ala, ili munanje kwendelela na lujendo lwangu kokuve ko ngugana kubita. 7 Sinambengane ntsitse ntsivalole kuno ntsili wimawima hela. Manyi Mutwa agane, ntsingihuvila kuta ngikala hamwe na henye kwa siku ntsolofu.

8 Lechelelo ngikala ihano ha Efweso mbaka siku ya Pendekosite. 9 Ntsin'wona Mulungu amelye nyafwasi ya kukola katsi yangu yino ngomi, na yivaje kuno ku Efweso kuna vatelani wolofu wo valitebe na heni.

10 Manyi Timoseyo atse kwa henye, mumulibulitsaje na kikala nayo finofu ili aleche kuva na wususutafu, kwasawuli ankola katsi ya Mutwa, kota fyo ntsinkola heni. 11 Ihyo lelo halekaje kuva na munu yoyuve yo akumubedala, lechelelo mumutangaje endelele na lujendo lwake kwa wusichimafu ili avetse kupiluka kwa heni, kwakuva heni hamwe na vang'olotsetu tungumutsindila.

12 Lelo kwajili ya mung'olotsetu Apolo, ntsimugongolitse ndalahela ili atse kwenyu hamwe na ivo vanya litumbilo vanji. Lechelelo mwene sinambeagane kutsa sambi, ila akutsa hala ho akuva apatite nyafwasi.

13 Ihyo lelo mwikalaje kwa wukangatso mu litumbilo, mwikangatsaje na muvaje na wuvetso. 14 Chila chinu cho mun'dita muditaje kwa kigana.

15 Henye mun'tsela kuta vanu va mu kaye ya Sitefwana iwo wo vavaga vanu valongola kwanuchila litumbilo lya Chilisito ku muji gwa Akaya, nawo vitawe kuvatanga vanu va Mulungu. Vang'olotsangu ntsinguvagongola, 16 na henye muvigaje filongotsi kota ivo, mukolaje katsi hamwe nawo, na muvahesimilaje vanu veka wo vankola katsi hame nawo.

17 Heni ntsinhechelela ndalahela kwa kufika kwa Sitefwana, na Fotunatusi na Akayiko, kwasawuli vadinile yila nyafwasi yenyu hala henye ho mwavaga mulihaduhu, 18 vene vayipotsitse numbula yangu, kota fyo vapotsitse numbula tsenyu. Ihyo lelo mun'ganika kuvahesimila ndalahela vanu wo vanakota iva.

19 Vanu veka vanya litumbilo lya Chilisito wo vali ku Asiya vanguvasamusani. Achila na Pilisila hamwe na vanu veka va Mulungu wo vitang'anaga mu kaye yawo vanguvasamusa ndalahela kwa hila fyo mwihantsitse na Mutwa. 20 Vang'olotsetu veka wo vamutumbye Chilisito wo valihano vanguvasamusani.

Mwisamusaje kwa kinonela kwa kulajila kuta muna wusichimafu.

21 Heni Pawulo, tsinguvandichila samuso tsino kwa liwoko lyangu ntsimwene.

22 Munu yoyuve yo sinambe amugane Mutwa akotokaje! MALANASA chinya kutijila Mutwa vetu, utse!

23 Ntsingumusuka Mutwa Yesu endelele kuvaditila wuwuya.

24 Ntsinguvagana henye nyeka wo mwihantsitse na Mutwa Yesu.