1 Vang'olotsangu, heni sintsavadahitse henye kota ntsinguvadahitsa vanu wo vanlongotswa na Muhe va Mulungu ila ntsavaga ntsinguvadahitsa kota vanu wo sinambevitumbe, na kaha kota vana vadodo mu litumbilo lya Chilisito. 2 Ntsavadahitsaga ndongwa mefu kota yuva fyo amung'wesaga matsiva mwana mudodo, sintsavalisise chilyo, kwakuva simwavaga munvetsa kulya. Nambe sambi sinambemuvetse kulya chilyo, 3 kwasawuli henye mung'acha mungikala kota vanu va mu inyi fyo vangikala. Kwakuva hagati henyu muna wifu na mumpungana. Mbe, kwa ndongwa itso henye simuli kota vanu va mu inyi? Kaha simungikala kota vanu wo sinambevitumbe? 4 Manyi yumwe venyu an'longa, "Heni tsingumudichila Pawulo," na yunji, "Heni tsingumudichila Apolo," Mbe, ihyo siyinlajila kuta henye mungikala kota vanu va kawayida hela? 5 Mbe, Apolo yo nani? Nayo Pawulo yo nani? Hetwe tuli vatantsi hela wo twavatantsile henye ili mumutumbe Chilisito. Chila munu ankola katsi yo apelilwe na Mutwa. 6 Heni ntsayatsile nyadikwa, Apolo aboholye malenga, lechelelo Mulungu yo akalagitsaga. 7 Ihyo munya kuyala nyadikwa na munya kuboholela malenga iwo veka si chinu ndaya, ila va mana Mulungu munya kukalagitsa. 8 Yula yo ayatsile nyadikwa na yula yo aboholye malenga veka vali sava, lechelelo chila munu akupelwa chifunje kota hila fyo adisile katsi yake. 9 Kwakuva heni na Apolo tunkola katsi ya Mulungu, na henye wo muli mugunda gwake.

Kaha muli Nyumba yake. 10 Kwa wuwuya wa Mulungu, mbeye mulongola kuvavikulila wujumbe wa Chilisito, kota hila mutsentsi va nyumba fyo antsaga kutsenga nyumba, lelo vadahitswa vanji vankutsa kuvadahitsa kota hila mutsentsi yunji fyo ankutsa kutseka mwilanga mwake. Lechelelo chila mutsentsi an'ganika iyangalile hila fyo akutsenga mwilanga mwake. 11 Kuduhu mutsentsi yunji yo afuluche kuvika musinji gunji kulutila gula go gwantsitse kutsengwa, kwakuva Yesu Chilisito yo musinji. 12 Iwo vadahitsi wo van'dahitsa Ndongwa tsa Mulungu kota fyo yin'ganika, vakuva kota vatsentsi wo van'tsenga kwa madini ga tsahabu, awu madini ga fwetsa awu maganga ganya beyi ngomi, lechelelo vadahitsi wo sinambe vadahitse kota fyo yin'ganika vakuva kota vatsentsi wo van'tsenga kwa mibichi, awu kwa mihamba awu misoli. 13 Ihyo chila katsi yikuwoneka hila fyoyili, kwasawuli Siku yila yo akutsa Chilisito yikutsa na moto na chila katsi ya munu yikupimwa kwa moto, na moto ugo gukuhima yila katsi ya chila munu kulajila fyoyili. 14 Manyi katsi ya munu yo adisile yileche kulalila mu moto, akwanuchila chifunje chake. 15 Lechelelo manyi katsi ya munu yilalile mu moto, duve uyo munu siakupata chifunje, ila mwene akukuluswa kota akulwiche kuhuma mu moto.

16 Mbe, sinambe mutsele kuta henye muli Nyumba ya Mulungu na Muhe va Mulungu angikala mugati mwenyu? 17 Manyi munu yoyuve ananje Nyumba ya Mulungu, Mulungu akumwananga munu uyo, kwasawuli Nyumba ya Mulungu yo nyagulwa, nayo Nyumba iyo yo henye.

18 Mulekaje kideteletsa. Munu yoyuve hagati henyu manyi angiwona kuta ana malifwa ga ndongwa tsa mu inyi yino, chiba ave mupuva ili ave na malifwa ga wukweli. 19 Kwakuva malifwa ga vanu va inyi yino go wupuva hela halutalo ha Mulungu. Kota fyo yandikwe mu Mandiko, "Mulungu avagwilitsaga vanya malifwa mu wusugu wawo." 20 Na kaha yandikwe, "Mutwa an'tsela kuta mahontso ga vanya malifwa siyo chinu ndaya." 21 Lelo, munu alekaje kihuvila chila cho vanu vafuluche vadite. Kwasawuli vavisilwe na Mulungu ili vavatumichile henye, 22 Mulekaje kihuvila Pawulo awu Apolo na Chefwa, hetwe tweka va henye. Inyi yino, wumi awu chifo, chipindi cha sambi awu cho chinkutsa, ifi fyeka fyenyu, 23 na henye muli vanu va Chilisito, nayo Chilisito yo va Mulungu.