1 Manyi hagati henyu hana munu vitachye na mung'olotse, afuluche ndawuli kumusindika kwa vanu wosi vamutumbye Mulungu ili valamulwe, na kuleka kumusindika kwa vanu va Mulungu? 2 Mbe, simun'tsela kuta vanu va Mulungu wo vakuvahiga vanu va mu inyi? Manyi mukuvahiga vanu va mu inyi, mufuluche mulemwe ndawuli kulamula ndongwa ndodo ndodo? 3 Mbe, simun'tsela kuta tukuvahiga vatantsi va kilanga va Mulungu? Mbe, tukulemwa ndawuli kulamula ndongwa tsa kawayida hela tsa chila siku? 4 Ihyo manyi kuna chitika cha ndongwa itsi hagati henyu, kwasawuli ya chichi munsindika ndongwa tsenyu kwa vanu wo munguvabedala kwa ndongwa tsa litumbilo lyenyu lya Chilisito ili vavalamule? 5 Ntsinlonga ihi ili muwone nyoni! Mbe, hagati henyu haduhuli mung'olotsenyu nambe yumwe munya ntselo yo afuluche avalamule? 6 Lechelelo henye mungusindika mu nyumba tsa kuhijila, na kihiga halutalo ha vanu wo valihela litumbilo lya Chilisito ili vavalamule.

7 Uko kuna ndongwa tsa kuhigana henye kwa henye tso tsinlajila kuta mulemulwe nachene. Kwasawuli yachi mulema kukatuka hela, mbe si finofu henye kuditilwa wubi? Kaha si finofu kusukulwa finu fyenyu? 8 Lechelelo, henye wo mungiditila fibi na kisukula finu henye kwa henye. 9 Mbe, simun'tsela kuta vanu wo van'dita wubi sivafuluche vinjile mu Wuntsajila wa Mulungu? Mwalahogola kudeteletswa kuta vanu vaafu awu wo vanfugamila misanamu, awu wo van'dita waafu na valume vayawo, awu wo vanguvinjilila finji vayawo, 10 awu vahitsi, awu kiwiniwa finu fya vayawo five fyawo, awu vagatsi, awu vahehi, awu vawumiyani, iwo veka sivakwinjila mu Wuntsajila wa Mulungu. 11 Vamwe mwavaga hihyo, lechelelo sambi muhofugwe na kuditwa muve vanu va Mulungu na kuditwa kuva vawuya halutalo ha Mulungu, na kidichilwa na Mulungu kukolela kwa Mutwa Yesu Chilisito na kwa Muhe va Mulungu vetu.

12 Munu yumwe afuluche alonje kuta, "Finu fyeka finofu kwa heni." Eee, lechelelo siyo finu fyeka fyo un'ganika kufidita. Na heni ntsinguvalonjela kuta, sifuluche ntsichidite chinu chochive chinavale heni. 13 Munu yumwe afuluche alonje, "Chilyo kochili kwasawuli ya lileme, na lileme kwasawuli ya chilyo." Eee, lechelelo Mulungu akufyananga fyeka fivili. Mulungu aguwumbite muvili gwa munu siyo kwasawuli ya kudita waafu, lechelelo muvili guli kwasawuli ya kumutumichila Mutwa, nayo Mutwa yo agutuntsaga muvili na kugupela chilyo. 14 Nayo Mulungu yo amutsilipwe Mutwa Yesu, uyo akututsilipula na hetwe kwa wuvetso wake.

15 Mbe, simun'tsela kuta mivili jenyu jo filungo fya Chilisito? Ino lelo filungo fya muvili gwa Chilisito fifuluche fihantse na mivili jo jin'dita waafu? Ndaya bee! 16 Mbe, simun'tsela kuta munu yo ihantsitse na munu yo an'dita waafu ankuva muvili gumwe na mwene? Kwasawuli kota fyo yandikwe mu Mandiko ga Mulungu, "Iwo vavili vakuva muvili gumwe." 17 Lechelelo munu yo ihantsitse na Mutwa, uyo ankuva Muhe gumwe na Mutwa.

18 Ihyo mubilime ndongwa tsa waafu. Kwasawuli chila ndongwa ntsibi tso aditaga munu aditaga mwivala mwa muvili gwake, lechelelo munu yo an'dita ndongwa ntsibi ya waafu ankuva angiditila mwene mu muvili gwake. 19 Mbe, simun'tsela kuta mivili jenyu yo Nyumba ya Muhe wa Mulungu yo angikala mugati mwenyu, yo mupelitwe na Mulungu? Ihyo mivili si jenyu muvene, ila ja Mulungu, 20 yo avagutsile kwa galama ngomi ndalahela. Ihyo lelo mumutsumitsaje Mulungu kwa mivili jenyu.