1 Kotsili ndongwa tso tsitagalye kuta mun'dita waafu, wo sinambewuditwe nambe na vanu wo sinambevamutumbile Mulungu. Kuta munu an'dita waafu na mudala va dade. 2 Na henye mungidutsila chinu chachi? Mbe si mun'ganika kususutala na kumubagula kutali na henye munu yo adisile ndongwa itso? 3 Nayivaje sintsilihamwe na henye, lechelelo tulihamwe chimuhe. Heni mwanga ntsimuhitsile munu yo adisile lulongwa ulo kota hila fyo ntsikakumuhiga hala ho ntsikakuva iho. 4 Hala ho munkuva mukong'ine kwasawuli ya kumufugamila Mutwa vetu Yesu na heni ntsili hamwe na henye chimuhe, na wuvetso va Mutwa vetu Yesu wulihamwe na hetwe, 5 mumutawulaje munu uyo kwa Lihoka, ili muvili gwake gutowe na kumudita munu uyo aleche ndongwa ntsibi na muhe gwake gukuluswe mu Siku yila ya Mutwa Yesu.

6 Kidutsa kwenyu si kunofu ndaya! Mbe, sinambe mutsele kuta hamila ndodo yitsatsamulaga lidonje lyeka lya wuse wa ngano? 7 Mutsiditaje numbula tsenyu tsive ng'wemufu na kuyitaga yila hamila ya katali, ili muve lidonje lipya lya wuse wa ngano lyo lilihela hamila, kota fyo mun'ganika muve. Kwasawuli Chilisito Mwana Ng'olo vetu va liwungo lya Pasaka mwanga atawulwe kuva nambiko. 8 Ihyo tuliditaje liwungo lya Pasaka, kuno mugati mwetu tulihela hamila ya katali, yo ndongwa ntsibi na wubi, ila tuyidite kwa mukate go siguvisilwe hamila, uwo wo welu wa numbula na wukweli.

9 Ntsandiche mu baluva yangu kuta mwalahogola kihantsa na vanu vaafu. 10 Sintsinlonga kuta mulekaje kihantsa nachene na vanu va mu inyi yino, vanu wo van'dita waafu awu wo vangiwiniwa, awu vawumiyani, awu wo vangujifugamila misanamu. Manyi yikayive ihyo mukakuganika kuhega mu inyi. 11 Mbije na mana kuta mwalahogola kihantsa na munu yoyuve yo angichema munyalukolo venyu, kuno an'dita waafu, awu munya kiwiniwa, awu munya kufugamila misanamu, awu muligaji, awu muwumiyani, awu mugatsi, awu mudesi, uyo munu yo an'dita ndongwa itso mwalahogola nambe kulya hamwe nayo.

12 Mbe, ntsin'ganika kuvahiga vanu wo valihela litumbilo? Ndaya, iwo vakuhigwa na Mulungu mwene. Henye mun'ganika muvahije vala wo mulihamwe nawo mu litumbilo. 13 Mulungu akuvahiga iwo wo sinambevamutumbile, "Henye mumuhetse uyo yo an'dita wubi yoali hagati henyu!"