1 Ihyo duve, vanu vatutselaje kuta hetwe tuli vajumbe va Chilisito, na Mulungu atutumile hetwe tukavalonjele vanu wujumbe wake wo avaga siamulonje munu yoyuve. 2 Cho chin'ganika kwa munu yoyuve, an'ganika ave va kitumbilwa. 3 Lechelelo kwa heni si chinu manyi nguhigwa na henye, awu na vanu va kaye tsa wuhigo manyi ndisile finofu awu fibi, nayivaje heni ntsi mwene sifuluche ntsihije. 4 Fyontsinhotsa heni kuduhuli lulongwa loluve lo lun'nyiga kwa chinu chochive, lechelelo kwa lulongwa ulo sifuluche ntsiwone kuta ntsilihela wubi wowuve. Ila Mutwa yo munya kunyiga heni. 5 Ihyo lelo mwalahogola kumuhiga munu yoyuve hala luvala lwake lung'acha lung'ali kufika, mutsindaje mbaka hala Mutwa ho akuva atsitse. Mwene yo akutsivika mu mwangatsa ndongwa tsila tseka tsotsifihilwe, na kuvika helu gala mahotso gogali mu numbula tsa vanu. Luvala ulo chila munu akwanuchila chila cho an'ganika kuhombwa kuhuma kwa Mulungu.

6 Lelo vang'olotsangu, ndongwa itsi tso ndontsile kwajili ya Apolo na heni, ntsin'gana tsive muhwano kuhuma kwa hetwe na kuyitsela mana ya wulontsi wowunlonga kuta, "Muhulikitsaje chila cho chandikwe." Kwakudita ihyo hagati henyu kukuva kuduhuli munu yo angihuvila munu yumwe na kumubedala yunji. 7 Mbe, nani yo akudisile uve muvina kulutila vanu vanji? Una chinu chachi cho siukapelitwe na Mulungu? Lelo manyi ukanuchilye kwasawuli yachi ungidutsa kota hila siulapelwa?

8 Mbe, mungiwona kuta mwanga mwigwite? Mbe, ndawuli vayetu, mwanga muveye vafuchifu? Mbe, muveye vantsajila bila ya hetwe? Eee nachene! Yikakuva finofu muve vatavala, ili na hetwe tuve vatavala hamwe na henye! 9 Ntsinhotsa kuta Mulungu atudisile hetwe vatumi tuve vanu va hawudugo, kwasawuli tuveye kota vanu wo vahijitwe kufwa. Kaha tuveye kota chinu cha kuhesa halutalo ha vanu, na halutalo ha inyi yeka na ha vatantsi va kilanga va Mulungu. 10 Hetwe tuli vapuva kwasawuli ya Chilisito, lechelelo henye wo muna malifwa molofu kwa kihantsa na Chilisito. Hetwe tuvatenyanjifu, lechelelo henye muna wuvetso. Henye munhesimilwa, ila hetwe tum'bedalwa. 11 Mbaka sambi tuna ntsala na ng'alu, tulihela myenda, tutofilwe na kaha tulihela hono ha kikala, 12 kaha tunkola katsi kwa mawoko getu kwa kugatsika. Hotunligwa tunguvasuchila wuwuya kwa Mulungu na hotunkodwa tungikangatsa, 13 manyi vatulonje kwa kutuwonela, tunguvajibula kwa kuvagongola. Mbaka sambi mu inyi vanu vangutuwona kota tulichaaka hela!

14 Sintsinguvandichila henye ndongwa tsino, kwasawuli ya kuvahonjela nyoni ndaya, lechelelo tsivandichilye ili kuvafunda kota muli vanangu wo ntsinguvagana. 15 Nambe muve na vadahitsi elufu kumi mulitumbilo lya Chilisito, lechelelo mulihela vadada wolofu, kwakuva kwa kihantsa na Chilisito Yesu, heni mbeye ntsili dada venyu kwa kuvaletela Ndongwa Nofu tsa Mulungu. 16 Ihyo ntsinguvagongola kuta henye muntsigaje heni. 17 Kwasawuli iyo ntsingumutuma kwenyu Timoseyo, mwene yo mwanangu mwendi na vakitumbilwa mulitumbilo lya Chilisito. Akuviwusa henye mutsele hila fyo ntsingikala kota mufwasi va Chilisito Yesu, kota fyo ntsin'dahitsa chila hono hovali vanu vanya litumbilo lya Chilisito.

18 Hagati henyu hana vanu vamwe vana chidada vangidutsa kuta singutsa kaha kuvajendela henye. 19 Lechelelo manyi Mutwa angavile, luvala loluve siku tsitsinago ngutsa kwenyu, na iho hongutsa ntsele vanu iwo wo vangidutsa vanlonga chinu chachi na vana wuvetso wachi. 20 Kwasawuli Wuntsajila wa Mulungu siyo kuva na wuvetso wa kulonga longa hela, ila yin'ganika kuva na wuvetso wa Mulungu. 21 Henye mun'gana chichi? Hala honguva ntsinkutsa kwenyu tsitse na chinu chachi? Ntsitse na mkotya, awu ntsitse kwa numbula ya wugano na ya wudeche?