1 Nayivaje mbetse kulonga kwa kabila tsa vanu na tsa vatantsi va kilanga va Mulungu, manyi ntsive tsihela wugano, ndonga yangu yinkuva kota litsi lya lijeleni lyo ligaya chinu awu kota litsi lya kukona fyuma. 2 Nambe ntsive na chifunje cha kuvikula, na kutsela fiho na malifa geka ga Mulungu. Kaha nambaje ntsina litumbilo lyo lifuluche linanje nambe kuhamya fidunda, lechelelo manyi ntsive tsihela wugano, heni si ntsili chinu ndaya. 3 Manyi nawule chila chinu cho ntsinacho kwa vagayu, na kaha manyi ntsitawule muvili gwangu nyanywe moto na manyi ntsihela wugano, siyikufwaya chinu chochive. 4 Munu munya wugano ikangatsaga, avatangaga vanu vanji, munya wugano alihela mbafya, si idayaga na kaha si idutsaga, 5 munya wugano si akosaga kuva na hesima, si asakaga ndongwa tsa kumutanga mwene, na kaha siavaga mupefu kuvipa, si iwukaga wubi wowuve, 6 kaha munu munya wugano si ahechelelaga wubi ila ahechelelaga ndongwa tsa wukweli. 7 Munya wugano ikangatsaga mu ndongwa tseka, avatumbaga vanu vanji, na ihuvilaga ndongwa tseka.

8 Wugano siwudugaga. Lechelelo manyi kuve na wuloli wukuduga. Manyi kuve na wulontsi wukuduga, na manyi kuve na fifunje fya kulonga wulontsi wa kuhuma kwa Muhe va Mulungu ntsikuduga, na kuvaje na malifwa nago gakulutila. 9 Kwasawuli luvala luno sinambetutsele chila chinu, nambe wuvetso wetu wa kuvikula ndongwa tsa Mulungu wulipinga. 10 Lechelelo ho wukuva wutsitse wukwilo, fila fyeka fyofili pinga fikuyaga.

11 Hala hontsavaga ntsili mwana mudodo, ntsalongaga kota mwana mudodo, ntsatselaga na kuhotsa kota mwana mudodo, lelo hala hontsavaga kukalagala na kuva munu muvina, ntsalesile ndongwa tsa chiwana. 12 Kwakuva cho tunguchiwona sambi sinambe tuchiwone finofu chinakota chili muchiwowo cho chinya ng'ungugu, lechelelo iho hambele tukuchiwola chila chinu finofu. Sambi ntsin'tsela kwa wupinga hela, lechelelo iho hambele tukufitsela finofu nachene kota Mulungu fyo angututsela hetwe nachene.

13 Ino lelo sambi ndongwa tsino tsidatu tukwendelela kutsidita, natso ndongwa itso tso litumbilo, lihuvilo na kigana. Nawo uwo wugano wo wutsilutye ndongwa itso tsinji.