1 Mbe, heni ntsili muwopwa? Mbe, heni siyo mutumi? Mbe, heni sitsamuwene Yesu Mutwa vetu? Mbe, sitsavalongwitse kumutumba Mutwa? 2 Nayivaje heni sintsili mutumi kwa vanu vanji, lechelelo kwa henye heni ntsili mutumi venyu, henye yo chitango cha wutumi wangu kwasawuli ya kihantsa kwenyu na Mutwa. 3 Ihyo fyo ntsipamanaga kwa vanu vala wo vansumwana na heni. 4 Mbe, heni ng'ani yo sinambenganiche kupelwa filyo na fya kung'wa mu katsi yangu? 5 Mbe, heni ng'ani yo sintsin'ganika kujenda mu njendo ntsangu hamwe na mudala vangu yo amutumbye mutwa kota hila fyo van'dita vatumi vanji, na Chefwa na vadodove va Mutwa? 6 Awu heni na Balinaba ng'ani wo tun'ganika kudita katsi ili twigulile finu? 7 Mbe, koyoli mutova ligalu vachi yo abitaga kuligalu kwa galama tsake mwene? Awu kuna mulimi vachi yo alimaga mugunda gwa mitsabibu bila kulya mibawo jake? Nani yo adimaga chipinga cha fidimwa na aleche kung'wa matsiva ga fidimwa ifyo?

8 Mbe, ndongwa tsino ntsinlonga longa hela? Mbe, mu malajitso ga Mulungu go amupelye Musa siganlonga hihyo ndaa? 9 Yandikwe mu malagitso igo kuta, "Ulekaje kuyibinga ng'ambaku mulomo hala ho yintova ngano." Mbe, muntijila Mulungu atsihijilaga ng'ambaku ng'ani? 10 Mbe, Mulungu hala ho alongaga ndongwa itso si atuhotselaga na hetwe? Eee, ndongwa itso tsandikwe kwasawuli ya hetwe. Yula yo anlima na yula yo am'beta, veka vavili van'ganika vihuvile filyo fyo fikubetwa. 11 Manyi yive hetwe twayatsile nyadikwa tsa chimuhe hagati henyu yo ndongwa tsa Mulungu! Mbe, lukuva lulongwa lukomi manyi tubete kwa henye finu fya mumuvili kota filyo na fya kung'wa? 12 Manyi vanu vanji van'ganika kutangwa na henye! Mbe, na hetwe situn'ganika kutangwa kulutila vanu iwo?

Lechelelo hetwe sitwavasusile finu ifyo. Ino lelo tungikangatsa, ili tuleche kwambutsa Ndongwa Nofu ya Chilisito yileche kuvafichila vanu. 13 Mbe, sinambemutsele kuta vala wo vankola katsi ha Nyumba ya Mulungu valyaga baho ha Nyumba ya Mulungu, na kuta vala wo vankola katsi ya kutawula nambiko tsa kunyanya mu matsabahu valyaga mu nambiko tsitso? 14 Mutwa nayo alajitse hihyo, kuta vala wo vanvikula Ndongwa Nofu ya Mulungu vakupata chilyo kuhuma mu Ndongwa Nofu tso vanvikula.

15 Lechelelo heni sintsadisile ndongwa itso kota fyo ntsaganikaga kudita, na sinambentsandiche ili munditile ihyo. Heni chiba ntsifwe kuliko munu yoyuve antselewe fibi chinu cho ntsingidutsila. 16 Lecheleo ho ntsinvikula Ndongwa Nofu ya Mulungu, sifuluche ntsidutse, kwasawuli ntsin'ganika kuvikula. Na ngudutsa manyi ndeche kuvikula Ndongwa Nofu ya Mulungu! 17 Manyi ntsikantsive ntsahagwe katsi yino kwa kugana hela, duve ntsikakihuvila mahombo. Lechelelo sintsahagwe, ila ntsikola yo katsi yangu, kwasawuli Mulungu yo amelye ntsiyidite. 18 Lelo nguhombwa chinu chachi? Mahombo gangu yo yila nyafwasi ya kuvikula Ndongwa Nofu ya Mulungu bila kugana mahombo.

19 Nayivaje heni sintsili mu wuwopwa na siyo mupogotsi va munu yoyuve, tsiditite kuva mupogotsi kwa chila munu ili mbetse kuvakwega vanu wolofu hila ho nguvetsa kuvakwega vamutumbe Chilisito. 20 Kwa Vayawudi ntsavaga kota Muyawudi ili ntsivatanje Vayawudi. Nayivaje heni sintsingugahulikitsa malajitso, ntsadisile ihyo ili mbetse kuvatanga vanu vala wo vangugahulikitsa malajitso. 21 Kwa vanu wosi Vayawudi ntsavaga kota sitsili Muyawudi ili mbetse kuvatanga vala wosi Vayawudi vamutumbe Chilisito. Nayivaje heni sinambenyulikitse malagitso ga Mulungu, ila ntsinhulikitsa malajitso ga Chilisito. 22 Kwa vanu vala vatsunwa ntsavaga vatsunwa ili ntsivatanje vatsunwa vamutumbe Chilisito. Mbeye munu va hali tseka kwa vanu veka ili ntsivakuluse vanu vatunga.

23 Ntsin'dita ihyo kwasawuli ya Ndongwa Nofu ya Mulungu, ili heni na veka wo vakumutumba Chilisito tuwupate wuwuya wa Ndongwa Nofu. 24 Mbe, sinambemutsele kuta vanu wo vabilimaga mu ntsuga tsa midalawo vasumanaga luvilo veka, lechelelo yumwe hela yo apelwaga ngweko? Mubilimaje hohihyo kwa kusumwana ili mupate ng'weko. 25 Veka wo vabilimaga luvilo vivikaga chang'ani kwa siku ntsolofu kiyima finu fyolofu, ili siku ya kusumana vapate ngweko, nawo vapataga ngweko yo yinkwananjika, lechelelo hetwe tuditaga ihyo ili tupate ngweko yo sinambeyananjiche. 26 Hohihyo na heni simbilimaga kota munu yo am'bilima bila kihuvila lulongwa, na si tsingitova kota munu yo antova ng'ala. 27 Ihyo ntsingugunanahitsa muvili gwangu gudite kota fyo ntsin'gana heni. Ntsin'dita ihyo ili hala honguva sintsile kuvavikulila vanu Ndongwa Nofu, Mulungu aleche kundema.