1 Lelo ntsin'gana kuvandichila lulongwa lunji lo mwambutsitse kwajili ya filyo fya nambiko fyo fitawulwe kwa sanamu.

Kuna wukweli kuta, "Hetwe tweka tunago malifwa kota fyo munlonga." Lechelelo malifwa gano ganguvambutsa vanu kidutsa, ila wugano wutuditaga tuvatanje vanu vanji. 2 Yula yo anhotsa kuta an'tsela lulongwa lutunga, ang'ali kutsela kota fyo yin'ganika kutsela. 3 Lechelelo munu yo angumugana Mulungu, uyo antselanika na Mulungu.

4 Ihyo kwajili ya chilyo cho chitawulwe sadaka kwa sanamu, tun'tsela kuta, sanamu si chinu ndaya mu inyi yino, na kaha tun'tsela kuta hoyoli Mulungu yumwe hela. 5 Nambe kuna finu fyofinchemwa "mihoka," jojingikala kilanga awu mu inyi, nayivaje kweli kojili "mihoka myolofu" Na "vatwa wolofu," 6 lechelelo hetwe tunayo Mulungu yumwe hela, nayo yo Dada vetu. Finu fyeka fyawumbitwe na mwene yo angutudita tuve na wumi. Kaha hoyoli Mutwa yumwe hela yo Yesu Chilisito, na finu fyeka fihumye kwa mwene na hetwe tungikala kwasawuli yake.

7 Lechelelo siyo chila munu yo angulutsela finofu lulongwa luno. Kwasawuli kuna vanu vatunga wo vatsovye kutambichila misanamu. Ihyo mbaka sambi ho vankulya filyo ifyo vafiwonaga kuta fitambichilwe kwa sanamu. Na kwakuva sivitumbye kota fyo yin'ganika vankuva sinambe vidichilwe halutalo ha Mulungu. 8 Lechelelo chilyo sichifuluche chituviche tuve habehi na Mulungu, na manyi tuleche kulya situkupunguchilwa chinu, kaha manyi tulye situkuwilwa chinu chochive kwa Mulungu. 9 Lechelelo mwiyangalilaje, wula wuhulu wenyu wuleche kuva chambutso kwa vanya litumbilo lidodo kudita ndongwa ntsibi. 10 Kwasawuli munu munya litumbilo lidodo manyi akuwone "heve yo una malifwa makomi," unkulya filyo ifyo mu nyumba tsa kufugamila misanamu, mbe, si akuwona kuta afuluche na mwene alye filyo fyo fitawulwe nambiko tsa sanamu? 11 Ihyo uyo mung'olotso munya litumbilo lidodo, yo Chilisito afweye kwasawuli yake, afuluche ayaje kwasawuli ya "malifwa gako!" 12 Hala ho munguvambutsa vang'olotsenyu vanya litumbilo lidodo vadite ndongwa ntsibi chinya ihyo na kuvatetsa, unkuva ungumukosela Chilisito. 13 Ihyo lelo, manyi chilyo cho ntsinkulya chikumwambutsa munya litumbilo muyangu adite ndongwa ntsibi, singuhogola kulya nyama siku tseka, ili ndeche kumuwambutsa mung'olotsangu adite ndongwa ntsibi.