1 Lelo vang'olotsangu, ntsin'gana ntsiviwuse yila Ndongwa Nofu yo ntsavavikulye, nanye mukayanuche na kwa yiyo mwimile kwa wukangatso. 2 Kwa Ndongwa yino Nofu ya Mulungu yo ntsavavikulye munkuluswa, manyi mukibatilitsa finofu. Tebe na ihyo, mukuva mwitumbye chinu chinji.

3 Heni ntsavakabitse chinu chikomi chila cho ntsanuche, kuta Chilisito afweye kwasawuli ya ndongwa tsetu ntsibi, kota fyo ganlonga Mandiko ga Mulungu, 4 kuta atsisilwe na akatsilipukaje siku ya kadatu, kota fyo ganlonga mu Mandiko ga Mulungu, 5 nayo akamuhumilaje Chefwa, na kahi akavahumilaje vala vatumi kumi na vavili. 6 Kaha akavahumilaje hohamwe vala vang'olotsetu tsaidi ya miya tanu, hagati ha iwo vamwe vang'acha wumi mbaka sambi, lechelelo vamwinga mwanga vafweye. 7 Hambele akamuhumilaje Yakobo, na kahi akavahumilaje vatumi veka.

8 Hoavaga kuvahumila veka, akanyumilaje na heni, yo ntsavaga kota munu yo aleliche luvala lo silwaganikaga. 9 Kwakuva heni yo ntsili mudodo kulutila vatumi veka, na singanikije kuchemwa mutumi, kwa hila fyo ntsavakodite vanu vanya litumbilo lya Chilisito. 10 Lechelelo kwa wuwuya wa Mulungu mbeye kota fyontsili, na wuwuya wake kwa heni siwuveye wa bule hela. Heni ndisile katsi kulutila vatumi veka, sintsadisile ihyo kwa wuvetso wangu hela, ila kwa wuwuya wa Mulungu wo wunkola katsi hamwe na heni. 11 Lechelelo nayivaje ihyo, manyi ntsive heni awu vatumi vanji, tunguchivikula Ndongwa Nofu, hetwe tweka tunvikula chinu chimwe, na icho cho muchitumbye.

12 Lelo manyi tuvikwe kuta Chilisito atsilipuche, yiveye ndawuli vanu vanji hagati henyu vanlonga kuta vanu wo vafweye sivakutsilipulwa? 13 Lechelelo manyi yive wukweli kuta kuduhu wutsilipuko, duve nambe Chilisito nayo si akatsilipuche, 14 na manyi yive Chilisito si akatsilipuche, duve nambe mbikulo tsetu tsilihela mana yoyive na litumbilo lyenyu linkuva si chinu ndaya. 15 Kulutila ifyo fyeka, tukakuva vadesi halutalo ha Mulungu kwa chila cho twahuliche na kulonga, kwasawuli twavaga tulontsile kuta Mulungu amutsilipwe Chilisito, lulongwa ulo lukakuva lwa wukweli manyi vanu wo vafweye sivatsilipulwaga. 16 Manyi yive kweli kuta vanu wo vafweye sivatsilipulwaga, duve nambe Chilisito siakatsilipuche. 17 Na kaha manyi Chilisito siakatsilipuche, duve litumbilo lyenu liveye lya bule hela, mung'acha mungikala mu ndongwa tsenyu ntsibi. 18 Ihyo lelo, na vala veka wo vafweye kuno vamutumbye Chilisito vakuva vayatsile hela. 19 Manyi lihuvilo lyetu kwa Chilisito lili kwasawuli ya wumi wuno hela, hetwe tun'ganika kuwonelwa lusungu kulutila vanu veka va mu inyi. 20 Lechelelo wukweli wuli hino, Chilisito atsilipuche, mwene yo mulongola va vala veka wo valongwe kuvasa mu chifo kota fyofili fibetwa filongola. 21 Kwakuva kota hila chifo fyo chatsitse mu inyi kukolela kwa munu yumwe, nayo yo Adamu, ho hihyo na kutsilipuka kwa vanu kutsitse kukolela kwa munu yumwe, nayo yo Chilisito. 22 Kota hila vanu veka fyo vankufwa kwasawuli ya kihatsa na Adamu, ho hihyo na vanu veka vakutsilipulwa kwa kihantsa na Chilisito. 23 Lechelelo chila munu akutsilipulwa kwa luvala lwake! Chilisito yo mulongola kutsilipuka, hambele vakutsilipuka vala veka wo vanu vake hala ho akuva kutsa mwene. 24 Hambele wukufika wula wudugo, Chilisito akumukabitsa Dada Mulungu wuntsajila wake, hala Chilisito ho akuva anantsile chila wutavala na mamulaka na wuvetso wake. 25 Kwakuva latsima Chilisito atavale mbaka hala ho akuva avasumile vatelani vake na kuvavika hasi ha magulu gake. 26 Vatelani veka vakwanagwa na hawudugo chikwanangwa chifo. 27 Mandiko ga Mulungu ganlonga, "Mulungu afivisile finu fyeka hasi ha wutavala wake." Lechelelo mandiko ho ganlonga kuta, "Finu fyeka fivisilwe hasi hake." Yinlajila kuta Mulungu yo afivisile finu fyeka hasi ya Chilisto, na Mulungu si afuluche ave yumwe va finu ifyo, kwasawuli mwene yo afivisile finu ifyo fyeka mu mamulaka ga Chilisito. 28 Lechelelo finu fyeka ho fikuvikwa mu wutavala wa Chilisito, ho iho nayo Mwana ho akivika hasi ha wutavala wa Mulungu yo avisile fyeka hasi ha wutavala wake, ili Mulungu afitavale finu fyeka.

29 Lelo manyi kuduhu wutsilipuko, vanu vala wo vam'batitswa kwajili ya vanu wo vafweye vangihuvila kupata chinu chachi? Manyi vanu wo vafweye sinambe vatsilipulwe, kuna mana yachi kubatitswa kwasawuli ya vanu wo vafweye? 30 Na hetwe natwe, kwasawuli yachi tungiyingitsa mu ng'oko chila luvala? 31 Nyee vang'olotsangu chifo chili halutalo hangu chila siku! Ntsingidutsa kwasawuli ya henye fyo mwihantsitse na Chilisito Yesu Mutwa vetu, icho chochin'ndita ndonje lulongwa ulo. 32 Manyi chila cho ntsin'gana chika chive kota fyo vahotsaga vanu va mu inyi, kula kisumana kwangu na vanu vabi wo vavaga kota minyama mibi hano ha Efweso, kuna mana yachi? Manyi wo vafweye sinambe vatsilipuche ntsika kulonga, "Chiba tulye na kung'wa, kwakuva mitondo tukufwa." 33 Mulekaje kudeteletswa! "Kihantsa na vanu vabi, kwanangaga tabiya nofu." 34 Nyee, mulamuche! Mwikalaje finofu! Mulekaje kudita ndongwa ntsibi. Ntsinguvalonjela ndongwa itso ili ntsivadite muwone nyoni kwasawuli vanu vamwinga hagati henyu sinambevamutsele Mulungu.

35 Lechelelo munu afuluche aputse, "Vanu wovafweye vakutsilipulwa chinya ndawuli? Kaha vakuva na muvili gwa chinya ndawuli?" 36 Itso mbutso tsa chipuva! Manyi uyale nyadikwa mu lilongo, na manyi nyadikwa iyo yileche kugaluka hila fyoyili, nyadikwa iyo siyifuluche yote. 37 Chila cho mun'yala chivaga nyadikwa hela, yifuluche yive nyadikwa ya mibangayeye awu ya chinu chinji, si mun'yala lila lisina lyo likota hambele. 38 Lechelelo Mulungu ayipelaga muvili iyo nyadikwa kota fyo an'gana mwene. Chila nyadikwa yipataga muvili gwake gwa wiyeka.

39 Mivili ja fiwumbe fyeka sijili sava ndaya. Mivili ja vanu jihwanaga, na ja minyama najo jihwanaga, na hihilaga kwa mideje, na ja somba najo.

40 Hihilaga kojili mivili ja kilanga kwa Mulungu na mivili ja muinyi. Wunofu wa mivili ja kilanga kwa Mulungu wuli finji, na wunofu wa mivili ja mu inyi nawo wuli finji. 41 Litsuva lina wunofu wake, na mwetsi nago guna wunofu wake, na nyenyetsi natso sitsihwanaga wunofu wake.

42 Hohihyo fyo yikuva hala vanu wo vafweye ho vakutsilipulwa. Muvili gutsikwaga na kuwola, lechelelo ho gukuva gun'tsilipulwa gunkuva na wumi. 43 Hala muvili ho gutsikwaga guvaga mutenyanjifu, ila gukutsilipulwa kwa wumelemo, gun'tsikwa kwa wutenyanjifu, ila gutsilipulwaga guna wuvetso. 44 Hogun'tsikwa gunkuva muvili gwa kawaida hela, hala ho gun'tsilipulwa gunkuva muvili gwa chimuhe. Ihyo kuna muvili gwa kawayida na kaha kukuva na muvili gwa chimuhe. 45 Kwakuva Mandiko ganlonga, "Munu va kwantsa yo Adamu, avaga awumbitwe na wumi mugati mwake," lechelelo Adamu va wudugo yo Muhe yo avapelaga vanu wumi. 46 Lechelelo muvili gogunlongola siyo gula gwa chimuhe, ila gula muvili gwa kawayida, hambele gula muvili gwa chimuhe. 47 Munu mulongola yo Adamu awumbitwe mu inyi na ahumye mu lilongo, munu va kavili ahumye kilanga kwa Mulungu. 48 Vanu veka wo vali mu inyi vanakota uyo munu yo awumbitwe kwa lilongo, ila vala veka va kilanga kwa Mulungu vanakota yula yo ahumye kilanga kwa Mulungu. 49 Sambi twihwanile na munu yula va mu inyi, hambele tukihwana na yula munu yo ahumye kilanga kwa Mulungu.

50 Lelo vang'olotsangu, ntsinlonga kuta chila cho chidisilwe kwa muvili na danda si chifuluche chihantse mu wuntsajila wa Mulungu, na chila chinya kwananjika sichifuluche chikale hihyo bila kwananjika.

51 Muhulikitse ntsivalonjele henye chila Mulungu cho ang'ali kuvalonjela vanu vake. Hetwe tweka situkufwa, ila tweka tukugalulwa, 52 simusika kota kufutitsa miho, likuhulikwa litsi lya palapanda ya wudugo, nawo vanu wo vafweye vakutsilipulwa na mivili jo sijifuluche jifwe kanji, natwe tweka tukugalulwa na kuva mivili josinambe jifwe. 53 Kwakuva latsima chila chinya kwananjika chifwale hali yosi nambe yananjiche, na muvili gunya kufwa gufwale hali yo sinambe yifwe. 54 Ihyo muvili guno gunya kwananjika hala ho gukugalulwa na kuva sinambegufwe, na chila chinya kufwa chikugalulwa ili chileche kufwa, iho ho lukukwila lula lulongwa lo lwandikwe mu Mandiko ga Mulungu kuta, "Chifo chanantsilwe, na wusumi wutsitse!"

55 Bee, chifo kulikwiya kusuma kwako?

Bee chifo kulikwiya kutama kwako?

56 Chifo chipataga wuvetso wa kutetsa kwasawuli ya ndongwa ntsibi, nayo ndongwa ntsibi yipataga wuvetso kuhuma ku malajitso ga Mulungu go amupelye Musa. 57 Lechelelo ahongetswaje Mulungu yo angutupela wusumi kukolela kwa Mutwa vetu Yesu Chilisito!

58 Ihyo vang'olotsangu wo ntsinguvagana, mwimaje kwa wukangatso. Mwendelelaje kukola katsi ya Mutwa bila kufulugala, kuno mutselaje kuta katsi yo munkola mu wutantsi wa Mutwa siyikuyaga hihi hela.