1 Duve vang'olotsetu, ntsin'gana kuvalonjela lula lusungu lwa Mulungu lo chapelitwe fikundi cha vanya litumbilo lya Chilisito fya ku Machedoniya. 2 Vanu va uko vakolye njelo ntsolofu na ng'odeko, na kuva mu wugayu, lechelelo wusangalo wawo wavaga wulutye na vavaga vadeche ndalahela. 3 Ino ntsinguvalonjelani kuta vavaga valutye wudeche kulutila hila fyo vaganikaga kitawula, nawo vatawe finu kwa kugana vene, 4 na vatugongwe ndalahela ili tuvadichile vihantse mu katsi yino ya kuvatanga vanu wo vahagulwe na Mulungu va ku Yelusalemu. 5 Hetwe sitwihuvilaga kuta vakudita ihyo! Hawulongolo vitawe vene kwa Mutwa, kahi vakitawulaje kwa hetwe kota hila fyo an'gana Mulungu. 6 Ihyo twamugongolitse Tito, kwasawuli mwene yo alwantsitse lulongwa ulo lwa wuwuya, ili avatanje kuyidita katsi iyo ya wugano hagati henyu. 7 Kota hila fyo mulivalongola kwa chila chinu, na mu litumbilo, na mundonga. Mulongwe mu litumbilo na wuvetso wa kulonga, mu ntselo na wuwuya weka na mu wugano wenyu kwa hetwe, hihyo tun'gana mulutile ndalahela mu lusungu luno lwa kuva vatawulaji.

8 Sinambentsivagwagwaditse, lechelelo ntsin'gana kuvalajila hila vayenu vanji fyo vangikangatsa kuvatanga vanu vanji, ili ntsele hila wugano wenyu fyowuli. 9 Henye munguwutsela wuwuya wo avapelye Mutwa Yesu Chilisito kuta mwene nambe iho hamutalo avaga chibopa, ila kwasawuli ya henye idisile ave mutsunwa ili kwa wutsunwa wa mwene henye muve fibopa.

10 Ichi cho ntsin'gana kuvalonjela, kuta mun'ganika kudita kota fyo mwadisile mwaka go gwalutye. Henye mwavaga valongola siyo kutawula hela, ila mwavaga na chimuhemuhe kudita lulongwa ulo. 11 Duve lelo muyidite katsi yino kwa chimuhemuhe kota fyo mwayidisile hamutalo na kutawula kota fyo mukuvetsa. 12 Manyi munu ave na numbula ya kutawula, Mulungu akwanuchila chila choan'vetsa kutawula, nayo Mulungu siamudayaga chila munu choalihela.

13 Heni sinambengane kuta henye mukodeche ili vanu vanji vahechelele, ila tun'gana nyeka mwihwane. 14 Luvala luno ho munafyo finu fyolofu mun'ganika kuvatanga vayenyu, ili nawo hovakuva na finu fyolofu vavatanje na henye. Ihyo ho nyeka mukihwana, 15 kota fyo yandikwe mu mandiko ga Mulungu,*

"Munu yula yo atutite ndalahela siapasile filyo fya hachiba,

na yula yo atutite fidodo siagayile filyo."

16 Ntsingumulumba Mulungu yo avisile mu numbula ya Tito lusungu lwa kuvatanga henye kota hila heni fyo ntsavatangaga. 17 Siyo kuta Tito idichye hila fyo twamulajitse hela, ila atsitse kwenyu kuno avaga na chimuhemuhe kulutila luvala loluve, na kaha atsitse uko kwa kugana mwene. 18 Nahetwe tungumutuma Tito hamwe na mung'olotsetu yumwe* yo anhesimilwa na fikundi fya vanya litumbilo lya Chilisito kwa katsi yake ya kuvavikulila vanu Ndongwa Nofu. 19 Kulutila ihyo, fikundi fya vanya litumbilo lya Chilisito fyamuhagwe ili ajendase hamwe na hetwe hala hotukuva tunsindika sadaka yino ya wugano ya kuvatanga vayetu, sadaka yo twatawe kwasawuli ya wuvina wa mwene Mutwa ili kulajila kuta tun'gana kuvatanga.

20 Tun'gana munu yoyuve aleche kutulonganga fibi kwasawuli ya lulongwa luno lwa kwimilila sadaka ya kuvatanga vayetu. 21 Tun'gana kudita wuwuya siyo halutalo ha Mutwa hela, ila na halutalo ha vanu.

22 Hamwe na vanu iwo wo tuvatumile, tungumutuma mung'olotsetu yunji yo tumujetsitse mala ntsongofu na kumuwona kuta ana chimuhemuhe cha kuvatanga vanu, na kaha sambi an'gana kuvatanga hilo kwasawuli analyo lihuvilo likomi kwa henye. 23 Manyi munu an'gana kutsitsela ndongwa tsa Tito, uyo Tito mung'olotsangu na tunkola katsi hamwe kwasawuli ya henye. Lechelelo kwa ndongwa tsa iva vang'olotsetu vanji yo vatsitse hamwe nayo, iwo vatumilwe na fikundi fya vanu vanya litumbilo lya Chilisito. Nawo vangumutsumitsa Chilisito! 24 Ihyo mun'ganika muvalajile iwo vang'olotsetu kuta henye muna wugano, ili fikundi fya vanu vanya litumbilo lya Chilisito fitsele chila chotungitsumila kwa henye.