1 Sintsin'ganika mbwile kuvandichila hila fyo mun'ganika kuyidita katsi yino ya kuvatanga vayenu va ku Yelusalemu wo vahagulwe na Mulungu. 2 Kwasawuli ntsintsela hila fyo mungiwiniwa kuvatanga, na heni ntsidutsitse kwa lulongwa ulo kwa vanu va ku Machedoniya. Ntsavalonje, "Vang'olotsetu va ku Akaya valichang'ani kuhuma mwaka go gulutye." Ihyo hamu yo munayo yivadisile vanu wolofu nawo van'gana kutawula. 3 Nambe lelo ntsivatumile vang'olotsetu iwo Tito na vala vayage vavili ili kwidutsa kwetu kuleche kuva ndonga hela, ihyo lelo muvaje chang'ani kota fyo mwalontsile kuta mukuva chang'ani. 4 Yilekaje kuva kuta hala honguvakutsa na vanu va ku Machedoniya ntsivafiche simulichang'ani, na ihyo hetwe tukuwona nyoni kwasawuli twavaga twitsumye kwa henye, na henye mukuwona nyoni. 5 Ihyo mbwene kuta yin'ganika ntsivalonjele iva vang'olotsetu valongole kutsa uko, ili vaviche chang'ani mipanjo ja sadaka iyo yo mwalontsile. Ihyo yikuwoneka kuta sadaka iyo muntawula kwa kugana henye na siyo ya kuvagwagwaditsa hetwe hela.

6 Mwihukaje kuta mulimi yo ayalaga nyadikwa ndodo uyo abetaga filyo fidodo, nayo yo ayalaga nyadikwa ntsolofu abetaga filyo fyolofu. 7 Chila munu atawulaje kota fyo an'gana munumbula yake, siyo kwa kukalala awu kwa kugwagwaditswa hela, kwasawuli Mulungu amuganaga munu yoantawula kuno numbula yake yigolwiche. 8 Nayo Mulungu akuvapela henye kulutila fyo mun'gaya, ili chila luvala muve na chila chinu cho munguchigana, na ihyo mulutile kuvatanga ndalahela vanu mu katsi tsa wuwuya. 9 Kota hila fyo yandikwe mu mandiko ga Mulungu,

"Mwene agavasise fifunje fyake kwa wuwuya na kuvapela vagayu,

wuwuya wake wikalaga siku tseka bila wudugo."

10 Uyo Mulungu yo amupelaga mulimi nyadikwa ya kuyala na chilyo cha kulya*, na hihyo akuvagavasila na kuvalutitsila na henye nyadikwa tsenyu tsa kuyala na kaha akutsotetsa na kutsikalagatsa, na kudita mubete filyo fyolofu kwasawuli ya uwo wuwuya wenyu. 11 Nayo Mulungu akuvadita muve vafuchifu kwa chila chinu ili muve vanya lusungu chila luvala, ili kukolela kwa henye mwene alumbwe kwasawuli ya fifunje fyo mwaboche kuhuma kwa hetwe. 12 Katsi yino yo munguyidita siyo kuta yinguvapela vanu vahagulwa va Mulungu finu fyo fin'ganika hela, ila kuvadita vanu wolofu vamulumbe Mulungu ndalahela. 13 Kwa katsi yo munguyidita bila kugwagwaditswa, vanu vakumutsumitsa Mulungu kwasawuli ya wudikitso wenyu wo wulihamwe na wuwuya wenyu kwa kihala Ndongwa Nofu ya Chilisito, na kwa wuwuya wenyu wo munguvalajila vene hamwe na vanu veka. 14 Ihyo lelo kwa lulongwa ulo vene vakiwiniwa na kuvasuchila kwa Mulungu kwa wugano hilo, kwasawuli ya wuwuya uwo wa wiyeka wo avapelye Mulungu. 15 Tungumulumba Mulungu kwasawuli ya chifunje chake chino cho situfuluche tuyihadise hila fyo yin'ganinika.