1 Tun'tsela kuta muvili gwetu guno gwa muinyi go tungikala nago go gunakota chuwo ho gukuva kwanangwa, Mulungu akutupela nyumba kula Kilanga go muvili gwa kikala nago siku tseka, muvili go sigutsentsilwe na mawoko ga vanu. 2 Ino sambi ho tungikala hano ha inyi tun'guta kwa wusungu, kuno tungiwiniwa kwa lihuvilo likomi kupata jila mivili mipya jojili kilanga kwa Mulungu. 3 Nachene ho kukufwala mivili ja Kilanga chinya ihyo, situkuwoneka kuta tuli mwatsi. 4 Ino sambi ho tuna mivili jino ja muinyi, tun'guta kwa wusungu na kukodeka. Siyo kuta tun'gana kuguwopola muvili guno gwa kufwa, lechelelo tun'gana kufikwa muvili gula gwa wumi go sinambe gufwe, ili muvili guno gwa kufwa gusumwe na gula go sinambegufwe. 5 Mulungu mwene yo atuvichye ndongwa itso, nayo atupelye Muhe vake ili twihuvile kuta ndongwa tsila tso atuvichye iho hambele tsa wukweli.

6 Ihyo lelo siku tseka tunkuva na lihuvilo na tuntsela kuta ho tungikala mu muvili guno tun'kuva kutali na Mutwa, 7 kwasawuli tungikala kwa litumbilo na siyo kwa hila fyo tunlava hela. 8 Lechelelo tunawo wukangatso, duve yikakuva chiba tuguleche muvili guno gwa muinyi na kubita kikala na Mutwa. 9 Ihyo kaha manyi tuve iha mu muvili guno awu tuve nago kutali, chinu cho tunguchigana kuchidita cho chila cho anguchigana Mutwa. 10 Hetwe tweka tun'ganika kwima halutalo ha chigoda cha Chilisito ili tuhigwe nayo, na chila munu ahombwe kwajili ya ndongwa tso adisile ho avaga na muvili guno, tsive tsa wuwuya awu tsive ntsibi.

11 Hetwe tuntsela kuta Mutwa an'ganika kuhesimilwa, na ihyo tunkangala kuvakwega vanu vanji. Mwene Mulungu angulutsela lulongwa ulu bila lufiho na heni tsingihuvila kuta na henye mungututsela kwa nachene bila wufiho. 12 Siyo kuta tun'gana tujele kuvadita mutudichilwe, lechelelo tun'gana mulole chila cho tungidayila henye, ili muvajibule vanu vala yo vangidutsila hila fyo van'woneka hila fyovali hela. 13 Manyi tun'woneka kuta tuna chijeni, yinkuva kwasawuli ya Mulungu. Ino manyi tunatso nyala, yinkuva kwasawuli yenyu, 14 kwakuva wugano wa Chilisito wo wungutulongotsa, ino tungitumba kuta munu yumwe afweye kwasawuli ya vanu veka, na ihyo tun'tsela kuta vanu veka tufweye mu chifo chake. 15 Chilisito afweye kwasawuli ya vanu veka, ili vanu veka wo wumi valeche kikala kwasawuli ya vene, ila vikale kwasawuli ya mwene yo afweye na kutsilipulwa kwasawuli yawo.

16 Duve, luhuma sambi hetwe sinambe tumuhije munu hila fyoali kwa kumulava hila fyoali hela. Nayivaje luvala lumwe twamuhitsile Chilisito hila fyoali kwa kumulava mwivala hela, lechelelo sambi sinambetudite chinya ihyo kota hamutalo. 17 Ihyo manyi hala munu yoyuve ihantse kwa Chilisito an'kuva munu mupya, ndongwa tsa katali tsinkuva tsilutye na ntsin'kwantsa ndongwa ntsipya. 18 Ndongwa itso tseka aditaga mwene Mulungu, yo atupatanisaga hetwe na mwene kwa kukolela kwa Yesu Chilisito. Nayo Mulungu yo atuvisile hetwe ili tuve vajumbe va kuvapatanisa vanu na mwene. 19 Ihyo tunlonga kuta, Mulungu avaga mugati mwa Chilisito ili avapatanise vanu va inyi tseka na mwene, bila kutsilava ndongwa ntsibi tso vavaga vadisile. Nayo atupelye hetwe katsi ya kuvalonjela vanu vihantse nayo.

20 Ihyo hetwe tutumilwe na Chilisito kuyikola katsi yake, nayo Mulungu anguvafunda henye kukolela kwa hetwe. Hetwe natwe kwasawuli ya Chilisito tunguvagongola ndalahela ili mupatane na Mulungu. 21 Chilisito siavaga na ndongwa ntsibi, lechelelo Mulungu amudisile awoneche ana ndongwa ntsibi kwasawuli ya hetwe, ili hetwe tudite kota fyo an'gana Mulungu kukolela kwa yula yo amuhangwe.