1 Mbe, munhotsa kuta tunkwantsa kaha kwidutsa tuvene? Mbe, tun'ganika kaha tuve na baluva ya kutudita tudichilwe na henye awu kuhuma kwa henye kota vanu vanji fyo van'dita? 2 Henye vene yo baluva yetu yo yandikwe mu numbula yetu, yo yin'tselanika na kusomwa na chila munu. 3 Henye mwanga mungitambutsa chang'ani kuta wo baluva yo yihumye kwa Chilisito, kaha henye wo wulajilo wa katsi yetu yo siyandikwe kwa wino ila yandikwe na Muhe va Mulungu yo Mumi, baluva yo siyandikwe mu fipande fila fya maganga ila yandikwe mu numbula tsa vanu.

4 Tunlonga ndongwa itso kwasawuli ya wukangatso wo tunawo kwa Mulungu kukolela kwa ndongwa tso atuditye Chilisito. 5 Hetwe sinambetuhotse kuta tufuluche tuludite lulongwa loluve tuvene, lechelelo tuhotsaga kuta wuvetso wetu wuhumaga kwa Mulungu. 6 Mulungu yo atutangaga hetwe kuva vatantsi va Lilagano Lipya lyo silinakota mandiko gala go gandikwe na Musa, ila lilagano lyo lyandikwe na Muhe va Mulungu. Malajitsto go gandikwe na Musa gakopolaga, ila Muhe va Mulungu aletaga wumi.

7 Malajitso ga Musa galetitwe kwa kwandikwa mu fipande fya maganga na galetitwe kwa wumelemo. Nayivaje hambele yaletite chifo, ila wumelemo wake wavaga wukomi ndalahela mbaka vana Vaisilaheli valemulwe kuchilava chihanga cha Musa. Kaha hambele wumelemo wula wukasilaje. Manyi yive malajitso ga Musa go gambutsaga chifo galetitwe chinya kumelema, 8 mbe, wukuva ndawuli wuvina wa katsi ya Muhe va Mulungu? 9 Manyi wutantsi wula wulongola wo wavahigaga vanu wavaga na wumelemo, mbe, yino yo yin'dita vanu vadichilwe na Mulungu siyikuva na wuvina hilo nda? 10 Ino lelo wutantsi wula wulongola wa Lilagano lya Katali wo wavaga na wumelemo manyi uwiganitse na wuvina wa Lilagano Lipya, wula wukuwoneka kuta wumelemo wake wusisile. 11 Ihyo manyi chila cho chayagaga hela chavaga na wumelemo, mbe, chino cha sambi cho chinsigala siku tseka si chikulutila wuvina?

12 Ihyo lelo kwasawuli ya lihuvilo lyo tunalyo, tunawo wukangatso wukomi. 13 Hetwe situn'dita kota Musa yo aganikaga kugubika kumiho kwake kwa chitambala ili vana Vaisilaheli valeche kuwuwona wumelemo wo avaga nawo nayivaje hambele wayagaga. 14 Lechelelo nyala tsa Vaisilaheli tsayuganitswaga. Mbaka sambi ho linsomwa Lilagano lya Katali nyala tsawo tsigubikwaga na chitambala chila. Ila hala manyi munu ihantse na Chilisito, nyala tsawo tsigubulwaga. 15 Mbaka munyi guno hala Malajitso ga Musa ho gansomwa, nyala tsawo tsigubikwaga na chitambala icho. 16 Lechelelo hala ho vangumupituchila Mutwa Mulungu, nyala tsawo tsigubulwaga. 17 Duve, kwa ndongwa itso, "Mutwa" Yo Muhe va Mulungu. Ihyo hono hoali Muhe va Mulungu, iho ho hana wuhulu. 18 Duve hetwe tweka wo kumiho kwetu ko sikugubikwe na tunguwuwona wumelemo wa Mutwa kota chiwowo fyo chilajilaga. Hetwe natwe tun'badilwa ili twihwane nayo, kuhuma wuvina mbaka wuvina wukomi hilo wo wunhuma kwa Mutwa yo Muhe va Mulungu.