1 Heni mutumi Pawulo yo ntsandiche baluva yino, yo sintsili mutumi va vanu, na sintsatumilwe na vanu. Ila numilwe kwa wuvetso va Yesu Chilisito, na wa Dada Mulungu yo amutsilipwe Yesu. 2 Heni hamwe na vanu veka wo vali hamwe na heni tunguvasamusa henye vanu veka vanya litumbilo lya Chilisito wo muli ku Galatiya. 3 Tunguvasuchila kwa Mulungu Dada vetu na kwa Mutwa vetu Yesu Chilisito avapele henye wuwuya na wusichimafu. 4 Chilisito yo idiche kitawula wumi wake kwasawuli kutuhetsela ndongwa tsetu ntsibi ili atukuluse kuhuma mu inyi yino ya ndongwa ntsibi, kota fyo an'gana mwene yo Mulungu na Dada vetu. 5 Mulungu atsumitswaje siku tseka bila wudugo. Tavile!

6 Momwiche ndalahela hila fyo munsupanitsa kuyileka Ndongwa Nofu ya Chilisito na kwantsa kufwata ndongwa nofu tsinji. 7 Siyo kuta kweli iyo yo ndongwa nofu, ila kwa wukweli kovali vanu wo vanguvayuganitsa wo van'gana kutsipitula Ndongwa Nofu tsa Chilisito. 8 Lechelelo nayivaje hetwe awu munu yoyuve yo ali hagati henyu, awu mutantsi va kilanga kwa Mulungu, manyi avavikulile henye ndongwa nofu yoyive yo yili finji na yila yo twavavikulye hetwe, duve munu uyo akotolwaje. 9 Kota fyo twalongwe kuvalonjela, na sambi ntsinguvalonjela kanji kuta, manyi munu yoyuve yo akuvavikulila henye ndongwa nofu yinji yoyive, yoyili finji na yila yo mwanuchilye kuhuma kwa hetwe, munu uyo akotokaje na Mulungu. 10 Mbe, lelo sambi ntsin'gana kidichilwa na vanu awu na Mulungu? Awu ntsin'gana kuvagan'ya vanu? Ntsika ntsive ntsin'gana kuvagan'ya vanu, si ntsika kuva mutantsi va Chilisito.

11 Nyee vang'olotsangu, ntsin'gana mutselaje kuta yila Ndongwa Nofu yo ntsavavikulye, siyavaga yihumye kwa vanu. 12 Heni sintsanuchilye Ndongwa Nofu itso kuhuma kwa munu, na kahi si ntsadahitswe na munu yoyuve, ila ntsanuchilye kuhuma kwa Yesu Chilisito mwene yo angubulye. 13 Henye mwanga muhuliche hila fyo ntsavaga iho hamutalo hontsavaga ntsing'acha mu ntsovelo tsa Chiyawudi. Muntsela hila fyo ntsavakodaga ndalahela vanu vanya litumbilo lya Chilisito, ntsaditaga ihyo kwa ludali lukomi na kujela kulyananga nachene litumbilo lyawo. 14 Heni ntsendelye ndalahela mu ntsovelo tsangu tsa Chiyawudi kulutila Vayawudi wolofu wo twavaga litsika limwe, kwakuva ntsavaga nanahye ndalahela ntsovelo tsa vadada vangu. 15 Lechelelo Mulungu yo avaga ambisile chang'ani na kwa lusungu lwake, anyagwe ntsive mutantsi vake luhuma ntsing'acha kuleleka, ili ntsimutumichile. 16 Ihyo avaga kulamula mwene kuta heni ntsimutsele Mwanage hila fyoali, ili ntsitsivikule Ndongwa Nofu kwa vanu wosi Vayawudi. Heni sitsaputsanitse kwa munu yoyuve, 17 na sintsakwinile kubita ku Yelusalemu ngiwone na vala wo vavaga valongwe kuva vatumi, ila ntsahele ku inyi ya Alabiya, na kaha ngawuyaje ku Damesichi. 18 Hambele hojavaga kulutila myaka jidatu ngapilukaje ku Yelusalemu ili ngiwone na Petulo*. Ngikalaje hamwe nayo kwa siku kumi na tsihanu, 19 lechelelo singamuwene mutumi yunji yoyuve, ila Yakobo mudodove va Yesu.

20 Mutselaje wukweli nachene halutalo ha Mulungu kuta, icho cho ntsinguvandichila siyo cha wudesi.

21 Hambele ngabitaje ku mikova ja Siliya na Chilichiya. 22 Luvala ulo vanu vanya litumbilo lya Chilisito wo vavaga ku Wuyawudi sivavaga vantsele. 23 Vene vavaga vahuliche kuta, "Munu yula yo avaga angutukoda iho hamutalo, sambi angutsivikula ndongwa tsa litumbilo lililaga lyo ajelaga kulyananga." 24 Duve, vakamutsumitsaje Mulungu kwasawuli ya heni.