1 Chilisito atupelye wuhulu, aganaga tusigale wuhulu hihyo. Lelo mwikangatsaje na mwalahogola kaha kuwuya mu wupogotsi wa Malajitso.

2 Muhulikitse! Heni yo Pawulo yo ntsinlonga na henye. Manyi mwidichile kwinjila likumbi kwasawuli ya kugafwata Malajitso ga Musa, Chilisito siakuvafwaya chinu chochive. 3 Kaha ntsinguvalonjela wukweli chila munu yo angidichila kwinjila likumbi, uyo an'ganika kibata Malajitso geka ga Musa. 4 Manyi mungihuvila kidichilwa halutalo ha Mulungu kukolela malajitso ga Musa, ihyo mukuva mwivisile kutali na Chilisito, na kaha muli kutali na lusungu lwa Mulungu. 5 Kwasawuli kwa wuvetso wa Muhe va Mulungu hetwe tungihuvila kwa litumbilo kidichilwa na Mulungu kukolela kwa Chilisito. 6 Duve manyi twihantsitse na Chilisito Yesu, kwinjila likumbi awu manyi sitwinje likumbi siyo chinu, lechelelo kudita finu kwa wugano ko kulajilaga litumbilo lyo tunalyo.

7 Hamutalo mwavaga mun'dita finofu mulitumbilo! Lelo nani yo avalemitse muleche kuwudichila wukweli? 8 Yo avambwitse muleche kudita ihyo, siyo Mulungu yo avachemile henye. 9 Madahitso gano ga wudesi gana kota hamila ndodo fyo yitsatsamulaga wuse wolofu! 10 Kwa kihantsa kwenyu na Mutwa, ntsina lihuvilo likomi kuta henye simukuva tebe na heni kwa chila cho ntsivadahitsa. Munu yoyuve yo akuvayatsa nambe avaje munu vachi, uyo an'ganika kuhigwa.

11 Henye vanya litumbilo vayangu manyi heni ntsing'acha ntsinguvavikulila ndongwa tsa kwinjila likumbi, kwasawuli yachi ntsing'acha ntsinkodwa? Manyi ntsikatsive ntsing'acha ntsidahitsa lulongwa lwa kwinjila likumbi, wujumbe wangu wa chifo cha Chilisito mumusalaba siwukakuvadesa Vayawudi. 12 Yikakuva chiba iwo wo vanguvatifya kwa ndongwa tsa kwinjila likumbi vaka vihutule vave vachiliti!

13 Henye vanya litumbilo vayangu mwachemilwe na Mulungu ili muve na wuhulu, lechelelo wuhulu uwo mulekaje kuwutumila kwa mbwiniwo tsa ndongwa tsa mu inyi, ila mwitangaje henye kwa henye kwa wugano. 14 Malajitso geka ga Musa gakwitswaga kwa kufwata yino amuli yimwe, "Umugane munu vako va habehi kota fyo ungigana heve mwene." 15 Lechelelo manyi mwilalatule na kwidakula kota minyama ja mwijejele, mwiyangalile mulekaje kiyananga.

16 Ihyo ntsinlonga kuta mwikale kwa kulongotswa na Muhe, na ihyo fyo mufuluche mutsisume mbwiniwo ntsibi tsa mivili jenyu. 17 Muvili gwiwiniwaga ndongwa tsotsili tebe na Muhe, nayo Muhe va Mulungu iwiniwaga ndongwa tsila tso sinambegugane muvili jenyu. Lelo Muhe va Mulungu na muvili fisumwanaga, na kwasawuli ihyo simukuvetsa kudita fyo mun'gana henye. 18 Manyi mulongotswe na Muhe va Mulungu, duve mukuva simunlongotswa na Malajitso ga Musa.

19 Duve ng'olwa tsa muvili tsin'tselanika tso itsi, waafu, na kuvasa na mulume awu mudala vanji, na udita ndongwa tsa nyoni, 20 kujifugamila misanamu, na wuhavi, na mabatu, na mbafya, na mbipi, na wupunganitsi, na chitika, na wusongapisi, 21 kuwona mbafya, na wugatsi, na wuhatufu na ndongwa tsinji tsotsihwana na itso. Ntsinguvafunda kanji kota fyo ntsalongwe kuvafunda kuta, vanu wovan'dita ndongwa kota itso, nachene sivakwinjila mu Wuntsajila wa Mulungu.

22 Munu yo anlongotswa na Muhe va Mulungu avaga na wugano na wuhechelelo na wusichimafu, na wukangatso, na wuwuya, na kitanga na kuhuvilwa, 23 wudeche na kiyangalila yu mwene. Kuduhu Malajitso go gakisuma na ndongwa kota itso. 24 Vala wo vihantsitse na Chilisito Yesu vagavambite mahotso gawo hamwe na mbwiniwo tsawo mu musalaba gwa Chilisito. 25 Muhe va Mulungu atupelaga wumi, duve twidichilaje kulongwatswa na mwene. 26 Tulekaje kidutsa bule hela, na kuno tungisova na kiwonela mbafya.