1 Duve lelo ntsin'gana ntsivalonjele kuta munya kuhala manyi ave ang'acha mwana mudodo, angihwana na mupogotsi naivaje mwene yo muhali va finu fyeka. 2 Luvala ho anguva ang'acha mudodo, avaga mu wimilitsi wa vanu vanji mbaka hala ho akuva akalaje na kufisa luvala lo luvisilwe na dade. 3 Hohihyo na hetwe hotwavaga kota vana vadodo, twavaga tuvapogotsi twalongotswaga na ntsovelo tsa inyi yino. 4 Lechelelo hala holwavaga kukwila luvala lo lwaganikaga, Mulungu amutumile Mwanage mu inyi. Akatsitse kota Mwana yo aleliche na mudala na akakalagalilaje mu wimilitsi wa malajitso ga Musa, 5 ili avagombole vala veka wovali muwimilitsi wa Malajitso ga Musa, adisile ihyo ili na hetwe Vayawudi tuditwe vana va Mulungu.

6 Sambi henye muveye vana vake, Mulungu amutumile Muhe va Mwanage munumbula tsenyu, nayo yo angumuchema Mulungu, "Abba" Chinyakutijila Dada vetu. 7 Hoihyo, henye simuli vapogotsi ndaya, ila muli vanage. Kwakuva muli vana, Mulungu akukupela fyeka fyo avaviche vanage.

8 Hamutalo ho mwavaga simumutsele Mulungu, mwavaga muli vapogotsi kwa kufugamila milungu jo javaga siyo Mulungu va wukweli. 9 Lechelelo sambi kwasawuli mumutselye Mulungu, awu tufuluche tulonje kuta nayo Mulungu avatselye henye hilo, yiveye ndawuli kaha mun'gana kugapiluchila ntsovelo tsa hamutalo tso tsilihela wumi wa chimuhe? Mun'gana gavadite muve mu vapogotsi kanji? 10 Mung'acha munkwiwuka na kugadita mawungo ga siku, na myetsi, na misimu, na myaka. 11 Icho cho chin'mela muhwehwe kwasawuli ya henye kuta, katsi yontsadisile yifuluche yive kuta yiyatsile bule hela.

12 Nyee vang'olotsangu, ntsinguvagongola muvaje kota heni, na mulekaje kuva vapogotsi va Malajitso ga Musa, kota na heni hotsavaga kwa henye. Hontsavaga kwa henye simukanditye lulongwa lubi loluve. 13 Mun'kwiwuka kuta hamutalo hotsavaga ntsitsitse kwenyu kwasawuli tsavaga mutamwa. Iho hontsantsitse kuvalonjela henye Ndongwa Nofu. 14 Nambe ihyo tsavambutse mukolele mu majetso, henye si mwambede wala kundonga fibi. Ila mwandibulitse kota mutantsi va kilanga va Mulungu, mwantsanuche heni kota hila Chilisito Yesu. 15 Hala hamutalo mwavaga na wuhechelelo lelo sambi chinu chachi cho chivapatite? Fuluche ndonje chila chontsachiwene kuta luvala lula kukakuve na wupefu, mukakukolopola miho genyu na kumela heni. 16 Mbe, sambi heni mbeye ntsimutelani venyu kwasawuli ya kuvalonjela wukweli?

17 Iwo vanu vanji wo vana chimuhemuhe na henye mutselaje kuta mu numbula tsawo vana mahotso mabi, ila van'gana vavalekanitse na hetwe, ili henye muvagatsichichile vene. 18 Kulonga wukweli ntsin'wona finofu kuvagatsichila vanu vanji kwa lulongwa lunofu, siyo mbaka heni mbaje ntsilihamwe na henye ng'ani. 19 Nyee vanangu, ntsinguvawonela wusungu wa kota mudala yo antamika wusungu luvala lulia ho an'gana kulela mwana, ntsin'gatsika kwa wusungu kwajili yenyu mbaka hala ho mukuva kota Chilisito fyoali. 20 Ntsinguvagongola na ntsingiwiniwa kuta ntsika ntsive hamwe na henye sambi, ntsika kubadila litsi lyangu ili live lya wudeche. Kwakuva ntsina mahotso molofu ndalahela kwasawuli ya henye.

21 Mundonjele henye yo mun'gana kulongotswa na malajitso ga Musa. Mbe, sinambemuhuliche malajitso igo fyo ganlonga? 22 Kwakuva mu Mandiko ga Mulungu ganlonga kuta Ibulahimu avaga na vana vavili, yumwe aleliche na mudala yo avaga mupogotsi, na mwana va kavili aleliche na mudala yo avaga siyo mupogotsi. 23 Lechelelo mwana va mudala mupogotsi aleliche kwa mbwiniyo tsa muvili, lechelelo yula yunji va mudala yo siavaga mupogotsi aleliche kota hila fyo avaga avalonje Mulungu kuta akuvapela. 24 Ndongwa tsino tsifuluche tsive kota muhwano, kwasawuli iwo vadala vavili go muhwano gwa malagano gavili. Lilongola lyo lila lyolyadisilwe ha Chidunda cha Sinayi, lyolyaletsile vana va wupogotsi. Ilino lyo uyo mudala Hajili. 25 Hajili ankuva muhwano gwa Chidunda cha Sinayi cho chili ku inyi ya Alabiya, na cho chihwana na Yelusalemu ya sambi yo yili kuwupogotsi hamwe na vana vake. 26 Lechelelo Yelusalemu ya kilanga kwa Mulungu go muji go siguli mu wupogotsi, ugo go muhwano gwa yuvetu. 27 Kwakuva mu Mandiko ga Mulungu yandikwe,

"Uhechelele, heve yo uli mende.

Ukolaje heve yo ulihela wusungu wa kulela mwana!

Kwakuva vana va mudala yula yo alesilwe, wo wolofu kulutila vana va mudala yula yo atoliche."

28 Lelo henye vang'olotsangu, henye muna kota fyo yali kwa Yisaka, muli vana vala wo alontsile Mulungu kuta akumupela Ibulahimu. 29 Siku tsila yula mwana yo aleliche kwa bwiniwo tsa muvili, amusovaga yula yo aleliche kwa wuvetso wa Muhe va Mulungu, ho hihyo fyo yili mbaka sambi. 30 Lechelelo Mandiko ganlonga ndawuli? Ganlonga hino, "Umuhetse mudala mupogotsi hamwe na mwanage, kwasawuli mwana va mudala mupogotsi si afuluche ahale hamwe na mwana va yula mudala yosi mupogotsi." 31 Ihyo lelo vang'olotsangu, hetwe situli vana va mudala mupogotsi, ila tuli vana va yula mudala yosi mupogotsi.