1 Nyee vanya litumbilo vayangu, manyi mumuwone munu mutunga anantsile lulongwa, duve henye yo munlongotswa na Muhe va Mulungu mumufundaje munu uyo na kumupilula kwa numbula ya wugano. Lechelelo mwiyangalilaje, muleche kwiyingitsa mumajetso ga kudita ndongwa ntsibi. 2 Mwitangaje henye kwa henye na ihyo homukukwitsa malajitso ga Chilisito. 3 Manyi munu iwone kuta alichinu, na kumbe si ali chinu ndaya, uyo angideteletsa mwene. 4 Lechelelo chila munu ihime mwene, iho ho afuluche itsumile mwene mugati mu numbula yake ng'ani bila kihwanitsa na munu yunji. 5 Kwakuva chila munu akuhigwa kwa chila cho avaga adisile.

6 Munya kudahitswa ndongwa tsa Mulungu, nayo aganikaga amupelaje na mudahitsi vake finu finofu fyo afipatite.

7 Mulekaje kideteletsa, Mulungu si aditilwaga mbedatsi. Chila cho adisile munu cho chicho cho akuditilwa na mwene. 8 Yula yo an'dita ndogwa tsa mbwiniwo tsa muvili gwake akupata mahombo ga wananjifu, lechelelo mwene yo akudita kwa kulongotswa na Muhe va Mulungu, uyo akupata wumi wo wugaya wudugo 9 Duve, tulekaje kufulugala kudita wuwuya, kwasawuli manyi tuleche kufulugala tukuhombwa wuwuya na Mulungu. 10 Ihyo hala ho tunkuva tung'acha tunalo luvala, tuvaditile wuwuya vanu veka, lechelelo tun'ganika tuvaditile hilo vala vanya litumbilo lya Chilisito vayetu.

11 Mulave hila fyo ntsandiche kwa ntsandiko ngomi, kwa liwoko lyangu ntsi mwene. 12 Vala wo van'gana kuwoneka vawuya kwa ndongwa tsa muvili wo van'gana kuvananahitsa henye mwinjile likumbi. Van'dita ihyo kwasawuli van'gana vatyeje kukodwa kwasawuli kuvikula ndongwa tsa musalaba gwa Chilisito. 13 Nambe vala wovinje likumbi sinambevagadichile Malajitso ga Musa, vanguvagana henye mwinjile likumbi ili vidutse kwasawuli ya ndongwa itso tsa kuvingitsa likumbi. 14 Ila kwa heni Mulungu akunugitsile kutali lulongwa ulo, kwasawuli singuhogola ntsidutsile chinu chochive kulutila chifo cha musalaba gwa Mutwa vetu Yesu Chilisito. Kukolela kwa mwene Chilisito, ndongwa tseka tsa muinyi tsilihela fwayida yoyive kwa heni, na ndongwa tsangu tsa katali tsifweye na Chilisito mumusalaba. 15 Kwinjila awu kuleka kwinjila likumbi si chinu ndaya, lechelelo kula kuva chiwumbe chipya cho chila chinu cho chin'ganika! 16 Wusichimafu wuvaje na veka wo wanfwata wulongotso wuno wupya, kaha na lusungu luvaje kwa vanu va Mulungu va inyi ya Isilaheli.

17 Luhuma sambi munu yoyuve alekaje kunindasa, kwasawuli mbisilwe ng'ofu tsa mu muvili gwangu tso tsinlajila kuta heni ntsili mutantsi va Yesu.

18 Nyee vanya litumbilo vayangu, lusungu lwa Mutwa vetu Yesu Chilisito luvaje na henye nyeka. Tavile!