1 Heni Pawulo mutumi va Chilisito Yesu kota fyo angavye Mulungu.

Heni mutumi Pawulo yo ntsandiche baluva yino henye vanu wo muveye vahagulwa kwa kumutumbila Chilisito Yesu wo mungikala ku Efweso.

2 Wuwuya na wusichimafu wo wunhuma kwa Mulungu Dada vetu na kwa Mutwa vetu Yesu Chilisito wuve hamwe na henye.

3 Atsumitswaje Mulungu na Dada va Mutwa vetu Yesu Chilisito! Kwakuva kwa kihantsa na Chilisito atupelaga hetwe wuwuya kwa kutugavila fifunje fya Muhe va Mulungu kuhuma kilanga kwa Mulungu. 4 Inyi hoyavaga ying'acha kuwumbwa Mulungu atuhagwe kwa kugana mwene tuve vahagulwa kukolela kwa Chilisito na wo tulihela ndongwa tsibi halutalo hake.

Kwa wugano wake, 5 luhuma hamutalo inyi ho yavaga ing'acha kuwumbwa Mulungu avaga aganile mwene kutuleta kwa mwene kukolela kwa Yesu Chilisito. 6 Duve, tumutsumitsaje Mulungu kwasawuli ya wuwuya wake wukomi wo atuditye hetwe bule kukolela kwa Mwanage yo amuganite. 7 Hetwe tun'gombolwa kwa chifo cha Chilisito, wo wuhulumilo wa ndongwa tsetu ntsibi. Kota hila lusungu lwake lukomi fyoluli, 8 na hila Mulungu fyo atugavye nenye nenye.

Kwa wudaho na ntselo, 9 Mulungu adisile kota hila fyo aganaga mwene, na kwasawuli iyo atulaje mupanjo gwake gwa wufiho go avaga apantsile kugukwitsa kukolela kwa Chilisito. 10 Holwavaga kufika luvala lwake akakwitsaje chila cho chaganikaga, kwa kufivika ho hamwe mu wutavala wa Chilisito fila fyeka fyo fiwumbitwe Kilanga na muinyi.

11 Kwa kula kihantsa na Chilisito, hetwe tuhagulwe tuve vanu vake luhuma inyi ying'acha kuwumbwa, na kota hila fyo aganaga Mulungu yo aditaga chila chinu kota hila fyo anlamula mwene. 12 Mulungu adisile ihyo ili hetwe Vayawudi wo twalongwe kumuhuvila Chilisito tumutsumilaje Mulungu kwa wuvina wake!

13 Hihilaga na henye vanu wosi Vayawudi mwahuliche ndongwa tsa wukweli, yo Ndongwa Nofu ya Chilisito yo yavaletye wukuluso. Mulungu ili kulajila kuta henye muli vanu vake, akavavichilaje chitango kwa kuvapela Muhe vake yo avaga alontsile kuta akuvapela. 14 Uyo Muhe va Mulungu yo atuditaga twanuchile fila Mulungu fyo alontsile kuta akuvapela vanu vake, na lulongwa ulo lunlajila kuta Mulungu akuvagombola nachene vanu vake, na hetwe tumupelaje Mulungu wuvina.

15 Luhuma hala ho ntsahuliche fyo mumutumbye Mutwa Yesu na fyo munguvagana vahagulwa va Mulungu, 16 sintsahogwe kuleka kumulumba Mulungu kwasawuli yenyu. Ntsinguvihuka hala ho ntsingumusuka Mulungu. 17 Ntsinkwendelela kumusuka Mulungu va Mutwa vetu Yesu Chilisito, yo Dada munya wuvina avapele henye Muhe vake yo akuvadita muve vahagulwa na kuvagubulila ili mumutsele mwene hilo. 18 Kaha ntsingumusuka Mulungu ili mupelwe mwangatsa gwa kulitsela lihuvilo lila lyo avachemye, na kuwutsela wufuchifu na wuvina wo avalonje vanu vake vahagulwa kuta akuvapela. 19 Ntsingumusuka Mulungu ili muwutsele wuvetso wake wukomi wo siwiganitswaga wo atuvichye hetwe wo tumutumbye. Uwo wuvetso wo wunkola katsi kwa hetwe wihwana na wula wuvetso wake wukomi, 20 wo amutsilipulye Chilisito na kumuvika ku lubali lwake lulilo lwa kuhesimilwa uko Kilanga. 21 Uko Kilanga Chilisito antavala, kuchanya ndalahela kulutila chila wuntsajila na mamulaka, na wuvetso, na wuvina, na chila litawa litambulwa live muinyi yino na inyi yila yo yinkutsa. 22 Nayo Mulungu avisile finu fyeka five ha wutavala wa Chilisito, kaha amudisile ave muvina va chila chinu kwasawuli ya chikundi cha vanya litumbilo lya Chilisito. 23 Chikundi cha vanya litumbilo lya Chilisito go muvili gwake Chilisito, nacho chinkwila kukolela kwa mwene yo fyeka mugati mwa fyeka!