1 Henye muveye vana va Mulungu yo anguvagana ndalahela, ihyo mun'ganika muvaje kota mwene Mulungu fyoali. 2 Nanye hila fyo mungikala mun'ganika muvaje na wugano kota hila Chilisito fyo atuganite nambe akitawulaje kwasawuli ya hetwe, ili ave nambiko yinya wununyililo na sadaka yo ayiganile Mulungu.

3 Lechelelo henye sambi muveye vahagulwa va Mulungu, ndongwa tsa kuvasa na valume na vadala vanji, na ndongwa tsa kuhanga nyoni, na kiwiniwa fyalahogola kuwoneka hagati henyu. 4 Kaha mulekaje kuva na ndongwa tsa chipufi na tsa nyoni, awu tsa wubisi, awu tsa wudasi. Henye mun'ganika muvaje vanu va kumulumba Mulungu. 5 Mun'ganika kutsela kuta munu yoyuve yo anvasa na valume na vadala vanji, awu yo an'dita ndongwa tsa kuhonga nyoni, na munya kiwiniwa awu munu yoyuve yo an'dita ndongwa kota itso, siakuhogola kupata chinu chochive mu Wuntsajila wa Chilisito na wa Mulungu. Kwasawuli munu munya kiwiniwa ihwanaga na munu yo angujifugamila milungu jinji.

6 Mwalahogola kidichila kudeteletswa na munu kwa ndongwa tsake tsa chipufi hela, kwasawuli Mulungu siavaganaga vanu vala wo sinambevamuhulikitse. 7 Ino sambi henye mwalahogola kihantsa nawo vanu kota iwo, 8 kwasawuli hala ha hamutalo henye mwavaga simumutsele Mulungu kota mwavaga mu jitsa, lechelelo sambi henye mumutsele Mulungu munakota muli mu mwangatsa kwa hila fyo mwihantsitse na Mutwa. Ino duve mun'ganika mwikalaje hila kota fyo an'gana Mulungu, 9 kwasawuli manyi muve mungikala mu mwangatsa mukuva na wuwuya nachene, na mukidichilwa na Mulungu na kaha mukuva na wukweli. 10 Mun'ganika mujelaje kudita kota hila fyo an'gana Mutwa. 11 Ino mwalahogola kihantsa mu ndongwa ntsibi, ila mun'ganika mumung'anulile chila munu yo an'gana kudita ndongwa kota itso. 12 Kwakuva ndongwa tso vangutsidita mu wufiho vanu wo sinambevamuhulikitse Mulungu, tsivaga tsa kuhonga nyoni, natso sitsifuluche tsilonjeche halutalo ha vanu. 13 Lechelelo chila chinu cho chigubulwaga mu mwangatsa, icho chiwonekaga. 14 Kwakuva chila chinu cho chigubulwaga chivaga mwangatsa. Kota hila fyo valongaga,

"Ulamuche heve yo uvasise,

na utsilipuche heve yo ufweye,

nayo Chilisito akukwangatsila."

15 Ino lelo mwikalaje kwa kiyangalila. Munganika mwikalaje kota vanu vanya ntselo, na siyo kota vanu vapufi. 16 Luvala lo munalo muwutumilaje kwa kudita ndongwa nofu, kwasawuli siku tsino tsimemile wubi. 17 Ihyo mulekaje kuva kota vanu vapufi, ila mun'ganika kutsela chila Mutwa cho anguchigana muchidite.

18 Mulekaje kugala wujimbi, kwasawuli uwo wukwananga wumi wenyu, ila mulongotswaje na Muhe va Mulungu. 19 Nanye mwimbaje tsabuli na ntsimbo tsa kumutsumila Mulungu na ntsimbo tsinji tsa kulongontswa na Muhe va Mulungu. Mwimbaje na kumutsumila Mutwa mu numbula tsenyu. 20 Siku tseka mumulumbaje Dada Mulungu kukolela kwa Mutwa Yesu Chilisito kwasawuli ya ndongwa tseka.

21 Chila munu an'ganika amuhesimilaje muyage, kwasawuli ya hesima yila wo vanayo kwa Chilisito.

22 Henye vadala muvahulikitsaje valume venyu kota hila fyo mungumuhulikitsa Mutwa. 23 Mulume amulongotsaje mudala vake, kota hila Chilisito fyo anguchilongotsa chikundi cha vanu wo vangumutumba mwene. Nayo Chilisito yo mukulusi va chikundi chake, nacho cho muvili gwake. 24 Kota hila chikundi cha vanya litumbilo lya Chilisito fyo chimuhulikitsaga Chilisito, ho hihyo vadala nawo van'ganika vavahulikitse valume vawo kwa chila chinu.

25 Henye nanye valume muvaganaje vadala venyu kota hila Chilisito fyo achiganile chikundi chake, na akitawulaje mwene kwasawuli ya icho. 26 Chilisito adisile ihyo kukolela kwa Ndongwa tsake na ili chive chihagulwa na kuchidita chidichilwe na Mulungu kwa kuchihofuga kwa malenga. 27 Ihyo Chilisito afweye ili achipate chikundi chake chihagulwa cho chilihela nongwa yoyive awu chinu chochive cho chinhwana na ndongwa itso. 28 Hohihyo valume nawo van'ganika kuvagana vadala vawo kota hila fyo vangujigana mivili jawo, kwasawuli mulume yo angumugana mudala vake ankuva angigana mwene. 29 Kwakuva kuduhuli munu yoyuve yo aguvipilaga muvili gwake, ila agulisaga na kugufwika myenda. Hihyo nayo Chilisito fyo achituntsaga chikundi chake. 30 Hetwe tweka tuli filungo fya muvili gwake. 31 Mandiko ganlonga, "Kwasawuli iyo mulume akumuleka dade na yuve, nayo akihantsa na mudala vake, nawo iwo vavili vakuva muvili gumwe." 32 Kuna wukweli wo wifihite mu ndongwa tsino, lechelelo heni ntsinlonga ndongwa tsa Chilisito na chikundi chake hela. 33 Nambe ihyo, chila mulume an'ganika amugane mudala vake kota fyo angigana mwene. Nayo mudala an'ganika amuhesimilaje mulume vake.