1 Ihyo heni Pawulo yo mbopitwe kwasawuli ya ndongwa tsa Chilisito Yesu, na yo ntsili jumbe venyu henye vanu wosi Vayawudi, ntsinguvasuchila Mulungu. 2 Henye mwanga mwahuliche kuta Mulungu kwa wuwuya wake amelye heni wutantsi wuno wa kuvikula Ndongwa Nofu ili ntsivaditile henye. 3 Mulungu angubulye heni kwa nduntsuchilo lulongwa lwake ulo lwa lufiho. Kota hila fyo ntsivandichilye chidogo hela ndongwa itsi, 4 na henye manyi musome ndongwa itsi tso ntsandiche, mukutsela fyo ntsinguyitsela yila fiho ya Chilisito. 5 Iho hamutalo Mulungu sivavaga avagubulye vanu fiho iyo, ino lelo sambi Mulungu avagubulye vatumi na valoli vake vahagulwa kukolela kwa Muhe vake. 6 Fiho iyo yo iyi, kwa kuyidichila Ndongwa Nofu vanu wosi Vayawudi vawupate wuwuya. Vene wo filungo fya muvili gumwe na vali muwuhantso wa chila cho avaga alontsile Mulungu kuta akuvapela vanu kukolela kwa Chilisito Yesu.

7 Heni tsadisilwe mutantsi Ndongwa Nofu kwa wuwuya wa wiyeka na kwa wuvetso wa Mulungu na wuwuya wake wukomi. 8 Nayivaje heni yontsili mudodo kulutila vanu veka vahagulwa va Mulungu, lechelelo amelye wuvetso ili ntsivavikulile vanu wosi Vayawudi Ndongwa Nofu na wula wufuchifu wa Chilisito wo sinambewulonjeche, 9 kaha Mulungu amelye katsi ya kuvalonjela vanu veka hila mupanjo gwake gwa wufiho fyoguli. Mulungu yo awumbite finu fyeka avaga afihile fiho iyo luhuma katali, 10 ili sambi kwa kukolela kwa chikundi cha vanya litumbilo lya Chilisito, avagubulile vatavala na vanya wuvetso mu inyi yo sinambeyitselaniche. 11 Mulungu aludisile lulongwa ulo luhuma baho hamutalo kota fyo aganaga mwene, nayo akaluditaje kukolela kwa Chilisito Yesu Mutwa vetu. 12 Duve kwa litumbilo lila lyo twapasile kwa kihantsa na Chilisito, sambi hetwe tufuluche tumuhejelele Mulungu kwa wukangatso kukolela litumbilo hela. 13 Ihyo ntsinguvagongola muleche kugotsola kwasawuli ya ng'odeko tsangu, ino mutselaje kuta ntsinkodeka ili henye mupate fwayida.

14 Ihyo kwa lulongwa ulo ntsin'fugama halutalo ha Mulungu Dada kumusuka, 15 mwene yo mwantso gwa viwumbe vyeka fya muinyi na Kilanga. 16 Ino heni ntsingumusuka Mulungu kota hila wufuchifu na wuvina wake fyowuli, avakangatse na kuvapela wuvetso mu numbula tsenyu kukolela kwa Muhe vake, 17 na ntsingumusuka Chilisito ili ikale mu numbula tsenyu kwa hila fyo mungumutumbila. Ino kaha ntsingumusuka chila chinu cho munguchidita henye muchiditaje kwa wugano wa wukweli, 18 ili henye hamwe na vanu veka vahagulwa va Mulungu mutsele hila Chilisito fyo angutugana ndalahela kwa wugano wo sinambewulonjeche. 19 Mutsele nachene wula wugano wa Chilisito wo wunlutila ntselo tseka, na kaha mupelwe chila chinu na muve kota fyo an'gana mwene Mulungu.

20 Duve atsumitswaje Mulungu yo aditaga ndongwa tseka tsa mitinuso kulutila hila fyo tusukaga uwu kuhotsa, kota hila wuvetso wake fyo wuditaga katsi mugati mwetu. 21 Wukweli nachene yin'ganika chikundi cha Chilisito chimpele ntsumitso Mulungu siku tseka kukolela kwa Chilisito Yesu kwa filelo fyeka, Tavile!