1 Henye vana kwakuva mwihantsitse na Mutwa muvahesimilaje valeli venyu, kwasawuli ihyo fyo yin'ganika mudite. 2 Nambe amuli tsa Mulungu tsityaga, "Uvahesimilaje dado na yuwo, iyo yo amuli ndongola yo yongelitswe chila cho avaga alontsile Mulungu kuta akutupela, 3 ili Mulungu akuditile wuwuyana na kikala luvala lutali muinyi."

4 Henye nanye va dada mulekaje kuvaditila vana venyu wubi wowuve, ino muvakagatsaje mu madahitso go mwanuche kuhuma kwa Mutwa.

5 Henye vatantsi muvahulikitsaje vatwa venyu kwa kuvahesimila iha ha inyi. Nanye muditaje ihyo kuhuma mu numbula ntsenyu kota hila fyo mungumuhulikitsa Chilisito. 6 Mulekaje kudita hala ho anguvawona hela ili mwilajile halutalo hake, ila muvatumichilaje kwa wukangatso kota hila fyo an'gana Mulungu. Muditaje ihyo kwasawuli henye mu vatantsi va Mulungu. 7 Mukolaje katsi tsenyu kwa kuhechelela kota mungumuditila Mutwa Mulungu na siyo vanu hela. 8 Mwihukaje kuta Mutwa akumupela gweko chila munu yo an'dita ndongwa kwa wuwuya, nambe ave mutantsi awu siyo mutantsi.

9 Henye nanye vatwa muvaditilaje hihyo vatantsi venyu, na kaha mulekaje kuvakabusa. Mwihukaje kuta na henye munakota vene, kaha mwihukaje kuta munayo Mutwa va Kilanga yo alihela wubagulo wowuve.

10 Hawudugo ha baluva yino ntsin'gana mukangale mu wuhantso wa Mutwa na mu wuvetso wake wukomi. 11 Ihyo mufwalaje fitovelo fyo avapelye Mulungu, na ihyo ho mufuluche kujisuma mipanjo jeka ja Lihoka, 12 kwakuva kitova kwa hetwe si twitovaga na vanu ndaya, ino twitovaga na vatavala, na vanya mamulaka na wuvetso va jitsa mu inyi yo sinambeyiwoneche. Kaha twitovaga na majesi ga mihoka ga inyi yo sinambeyiwoneche. 13 Ihyo lelo mufwalaje fitovelo fyeka fya Mulungu, ili muvetse kusumana na luvala lwa ng'odeko. Ihyo ho hila ho mukuva kusinda kitovana mukwendelela kwima hihilaga.

14 Duve lelo mwivikaje chang'ani kuno wukweli wuvaje kota musipi mu figudi fyenyu, na kudichilwa na Mulungu kuvaje kota ngwebe ya mu mambaga tsenyu. 15 Nacho chimuhemuhe cha kuvikula Ndongwa Nofu ya wusichimafu chivaje kota filatu mu magulu genyu. 16 Chila luvala litumbilo livaje kota ngwebe mu mawoko genyu, ili yivatanje kutsitsimya magali tseka tsinya moto tso tsintotswa na Lihoka. 17 Kaha muwanuchilaje wukuluso ili wuve kota heti yenyu ya chuma, na mutegulaje Ndongwa tsa Mulungutsivaje kota waladi wo mumpelwa na Muhe va Mulungu. 18 Musukaje kwa kutangwa na Muhe va Mulungu chila luvala, ili Mulungu avatanje, na kaha muvasuchilaje bila wudugo vanu veka va Mulungu. 19 Musuchilaje na heni ili hala honguva ntsinvikula Ndongwa tsa Mulungu, mwene Mulungu amele ndongwa tsa kuvikula fiho tsa Ndongwa Nofu bila muloto goguve. 20 Heni yo jumbe va Ndongwa Nofu, nayivaje sambi ntsili mu nyumba ya vawopwa mbombitwe nyololo. Musuchilaje na heni ili ntsive na wukangatso wa kuyivikula Ndongwa Nofu kota fyo yin'ganika.

21 Ntsingumutuma kwenyu mung'olotsetu yo anchemwa Tikiko, nayo yo mutantsi muwuya va Mutwa. Mwene uyo akuvalonjela ndongwa tseka tsa heni, na henye ho mukuntsela fyontsili na chila cho ntsinkola kuno. 22 Ntsingumutuma kwenyu avalonjele ndongwa tsangu, ili avakangatswe numbula tsenyu.

23 Ihyo vang'olotsangu ntsingumusuka Dada Mulungu na Mutwa Yesu Chilisito avapele henye wusichimafu, na wugano, na litumbilo. 24 Kaha ntsingumusuka Mulungu avapele wuwuya henye nyeka wo mungumugana Yesu Chilisito Mutwa vetu kwa wugano wo wugaya wudugo.