1 Igano go matawa ga lukolo lwa Yesu Chilisito, yo avaga va lukolo lwa Dawudi, na yo avaga va lukolo lwa Ibulahimu. 2 Ibulahimu amuletsile Yisaka nayo Yisaka amuletsile Yakobo, na Yakobo amuletsile Yuda hamwe na vang'olotse. 3 Yuda amuletsile Pelesi na Tsela, nayo yuvawo achemwaga Tamali, Pelesi amuletsile Hetsiloni, nayo Hetsiloni amuletsile Alamu, 4 Alamu amuletsile Aminadabu, nayo Aminadabu amuletsile Nasoni, nayo Nasoni amuletsile Salimoni, 5 Salimoni amuletsile Bowatsi na yuve va Bowatsi achemwaga Lahabu, Bowatsi amuletsile Obedi kwa Mudala vake yo achemwaga Luti, nayo Obedi amuletsile Yese, 6 Yese amuletsile Dawudi yoavaga muntsajila. Nayo Dawudi amuletsile Solomoni, na yuve va Solomoni achemwaga Batiseba yo avaga mudala va Huliya, 7 Solomoni amuletsile Lehobohamu, Nayo Lehabohamu amuletsile Abiya, nayo Abiya amuletsile Asa, 8 Asa amuletsile Yehosafati, nayo Yehosafati amuletsile Yolamu, nayo Yolamu amuletsile Hutsiya. 9 Hutsiya amuletsile Yotamu, nayo Yotamu amuletsile Ahatsi, nayo Ahatsi amuletsile Hetsechiya. 10 Hetsechiya amuletsile Manatse, nayo Manatse amuletsile Amoni, nayo Amoni amuletsile Yosia. 11 Yosia amuletsile Yekoniya hamwe na vang'olotse chipindi cha chihamo cha Babeli. 12 Vayahudi ho vavaga kuhamitsilwa kuluhamo ku inyi ya Babeli, Yekonia amuletsile Sealitiyeli, nayo Sealitiyeli amuletsile Tselubabeli. 13 Tselubabeli amuletsile Abiwudi, nayo Abiwudi amuletsile Eliyachimu, nayo Eliyachimu amuletsile Atsoli. 14 Atsoli amuletsile Sadochi, nayo Sadochi amuletsile Achimu, nayo Achimu amuletsile Heliyudi, 15 Eliyudi amuletsile Heliyatsali, nayo Eliyatsali amuletsile Matani, nayo Matani amuletsile Yakobo, 16 Yakobo amuletsile Yusufu, uyuno Yusufu yo avaga mulume va Maliyamu, na Maliyamu yo yuve va Yesu yo anchemwa Chilisito. 17 Ihyo kwavaga na filelo kumi na fitayi kuhuma Ibulahimu mbaka Dawudi, na kaha kwavaga na filelo kumi na fitayi kuhuma Dawudi mbaka kuluhamo lwa Babeli, na filelo kumi na fitayi kuhuma luhamo lwa Babeli mbaka hala ho avaga kuleleka Yesu Chilisito.

18 Kuleleka kwa Yesu Chilisito kwavaga hino. Maliyamu yuve va Yesu, avaga akwelilwe na Yusufu, Lechelelo ho avaga ang'ali kutolwa na Yusufu, Maliyamu akawonekaje ana wubofu kwa wuvetso wa Muhe va Mulungu. 19 Kwasawuli Yusufu avaga munu yo an'dita kota fyo an'gana Mulungu, si aganaga kumuhonjela nyoni Maliyamu, akahotsaje kumuleka kwa lufiho. 20 Lechelelo Yusufu ho avaga anhotsa lulongwa ulo, mutantsi va Mutwa akamuhumilaje mu mbilo na kumulonjela, "Yusufu mwana va Dawudi, ulekaje kuva na muloto kumutola Maliyamu ave mudala vako. Kwasawuli wubofu wo anawo apasile kwa wuvetso wa Muhe va Mulungu. 21 Nayo akulela mwana mulume, na heve ukumutambulila litawa lyake Yesu, kwasawuli mwene yo akuvagombola vanu vake vahume mu ndongwa tsawo ntsibi." 22 Ndongwa itso tseka tsahumye ili lukwile lulongwa lo alontsile Mutwa kukolela kwa muloli va Mulungu kuta, 23 "Lave, Muhintsa yo ang'ali kuvasa na mulume, akupata wubofu nayo akulela mwana mulume, na vanu vakumuchema litawa lyake Manweli" Chinya kutijila, "Mulungu ali hamwe na hetwe." 24 Yusufu ho avaga kulamuka, akaditaje kota hila fyo alajitswe na mutantsi va Mutwa, akamutolaje Maliyamu ave mudala vake. 25 Lechelelo Yusufu siavasise na Maliyamu, mbaka hala Maliyamu ho aletsile mwana mukwamitsi, nayo Yusufu akamutambulilaje mwana yula litawa lyake, "Yesu."