1 Kahi Yesu akalongotswaje na Muhe va Mulungu, kubita ku mbuga ili ajelwe na Lihoka. 2 Yesu afuntsile siku alubayini hamunyi na hachilo amusukaga Mulungu, hambele akawonaje ntsala. 3 Lisetani likatsaje na kumulonjela, "Manyi heve uli Mwana va Mulungu, ugadite maganga gano gave mabumunda."

4 Lechelelo Yesu akalilonjelaje Lisetani kuta yandikwe, "Munu siafuluche ave na wumi kwa kulya chilyo ng'ani, ila kwa chila lulongwa lo lunhuma kwa Mulungu." 5 Kahi lisetani likamusindikaje Yesu mbaka ku Nyumba ya Mulungu ku Yelusalemu, likamuvikaje Yesu hilanga ha munala gwa Nyumba ya Mulungu na likamulonjelaje, 6 "Manyi heve uli Mwana va Mulungu witotse hasi, kwasawuli yandikwe kuta

Mulungu akuvalajitsa vatantsi vake va kilanga vakutole mu mawoko gawo ili uleche kikuvala mu liganga."

7 Yesu akamulonjelaje yandikwe kaha, "Walahogola kumujela Mutwa Mulungu vako."

8 Kahi Lisetani likamutolaje Yesu mbaka mwilanga mwa chidunda chitali na kumulajila wuntsajila wake weka wa mu inyi na finu fyake vinofu. 9 Kahi Lisetani likamulonjelaje Yesu, "Manyi unyonamile na kufugamila ngukupela finu ifi fyeka."

10 Yesu akalilonjelaje, wuche halutalo hangu heve lisetani! Kwasawuli yandikwe mu Mandiko ga Mulungu, umufugamile Mutwa Mulungu vako, nave umutumichile mwene ng'ani. 11 Ihyo lisetani likamulekaje Yesu, na vatantsi va kilanga va Mulungu vakatsaje kumutanga.

12 Yesu hoavaga kuhulika kuta Yohana mubatitsi ali mu nyumba ya wuwopwa, akabitaje ku Galilaya. 13 Akahumaje ku Natsaleti, akabitaje kikala ku Kapelinawumu, muji goguli habehi na bahali ya Galilaya, mumbaka tsa miji ja Tsabuloni na Nafutali, 14 adisile ihyo ili lukwile lulongwa lo alontsile Yisaya muloli va Mulungu.

15 "Inyi ya Tsabuloni na inyi ya Nafutali, kung'asi ya kubitila ku bahali kumwambu gwa lulenga lwa Yolidani, na Galilaya ko vangikala vanu wo si Vayahudi! 16 Vanu vala wo vangikala mu jitsa vaguwene mwangatsa mukomi, nawo vala wo vichite mu inyi yinya mujiji gwa chifo, mwangatsa guvangatsilye."

17 Kuhuma luvala ulo Yesu antsitse kuvikula kwa kulonga, "Mumupituchile Mulungu na kutsileka ndongwa tsenyu ntsibi, kwasawuli wuntsajila wa Kilanga wuli habehi!"

18 Yesu ho ajendaga mulubali lwa lilamba lya Galilaya, akavawonaje vanu vavili wo vavaga lukolo, Simoni yo achemwaga litawa linji Petulo, na mung'olotse yo achemwaga Andeleya. Iwo vavaga vantotsa nyafu tsawo mu lilamba. 19 Yesu akavalonjelaje, "Mutse mufwate na heni nguvadita muve munguvaleta vanu kwa Mulungu." 20 Luvala lulo vakalekaje nyafu tsawo wakamufwataje Yesu. 21 Kuhuma iho Yesu akabitaje kutalo, akavawonaje vanyalukolo vanji vavili Yakobo na Yohana yo vana va Tsebedayo, vavaga vichite mu mutumbwi hamwe na dadawo vawuyapaga nyafu tsawo, Yesu akavachemaje, 22 nawo vakagulekaje mutumbwi na dadawo, wakamufwataje Yesu.

23 Yesu akabitaje ku inyi yeka ya Galilaya, adahitsaga mu nyumba tsa kitang'anila Vayahudi na kuvikula Ndongwa Nofu tsa wuntsajila wa Mulungu, na kuvaponetsa vanu namwa tsa chila ayina. 24 Ndongwa tsake tsikatagalilaje mu fijiji fyeka fya Samu, nawo vanu vakamuletelaje vatamwa veka vanya namwa tsa chila ayina na vanya ng'odeko, na vanya misoka, na vanya chintsilisa, na wovapotsile mivili, veka akavaponetsaje. 25 Malugu ga vanu wakamufwataje Yesu, kuhuma ku Galilaya na ku Dekapoli, na ku Yelusalemu, na ku Wuyahudi na ku mwambu gwa lulenga lwa Yolidani.