1 Ihyo Yesu hoavaga kuliwona lilugu lya vanu lingumufwata, akakwinaje kuchidunda na akikalisaje hasi, nawo vadahitswa vake vakatsaje hala hoali. 2 Kahi akantsaje kudahitsa,

3 "Vaditilwe wuwuya na Mulungu vanu vala wo vangumuhuvila Mulungu,

Kwasawuli Wuntsajila wa Mulungu wukuva wawo.

4 Vaditilwe wuwuya na Mulungu vanu vanya wususutalo,

Kwasawuli iwo vakuhongetswa."

5 "Vaditilwe wuwuya na Mulungu vanu vanya wudeche,

Kwasawuli iwo vakupelwa inyi na Mulungu yive yawo.

6 Vaditilwe wuwuya na Mulungu vanu iwo wovan'gana kudita ndongwa tsa Mulungu,

Kwasawuli Mulungu akuvatanga kudita ihyo."

7 "Vaditilwe wuwuya na Mulungu vanu vanya lusungu,

Kwasawuli iwo vakuhulumilwa na Mulungu.

8 Vaditilwe wuwuya na Mulungu vanu vanya numbula tso tsilihela wubi,

Kwasawuli iwo vakumuwona Mulungu."

9 "Vaditilwe wuwuya na Mulungu vanu wo vanleta wusichimafu,

Kwasawuli iwo vakuchemwa vana va Mulungu.

10 Vaditilwe wuwuya na Mulungu vanu wo vankodwa, kwasawuli ya kudita hila fyo an'gana Mulungu,

Kwasawuli Wuntsajila wa Mulungu wukuva wawo."

11 Mutambichilwe henye yo munligwa, na kukodwa, na kulongwa fibi na vanu, kwasawuli ya heni. 12 Musangalalaje na kuhechelela, kwasawuli chifunje chenyu chikuva chikomi kilanga kwa Mulungu. Kwasawuli hohihyo fyo vavaditye valoli va Mulungu va katali.

13 "Henye muna kota mwino kwa vanu va mu inyi, lechelelo mwino manyi guyatse lwiha lwake gukusopwa chichi mbaka gufwaye? Sigukufwaya kanji lechelelo gutagwaga kivala na kukanyagwa na vanu."

14 "Henye yo mwangatsa gwa inyi kota Nyumba yoyitsentsilwe ha chidunda siyifuluche yileche kuwoneka. 15 Vanu sivasaga koloboyi na kuyivika muchibogonyela, lechelelo vasaga na kuyivika ha chibogonyela ili yivang'alichile vanu veka wo vali munyumba iyo." 16 Ihyo henye mun'ganika muve kota mwangatsa go gunguvang'alichila vanu, ili vanu manyi vatsiwone ndongwa tsenyu nofu tsomun'dita, vamutsumitse Dada venyu va Kilanga.

17 "Mwalahogola muhotse kuta ntsitsitse kubadila malajitso ga Musa na ndongwa tsa valoli va Mulungu, sintsitsitse kutsihetsa lechelelo ntsitsitse kuvalonjela kuta, madahitso igo goga wukweli. 18 Ntsinguvalonjela wukweli kuta, mbaka hala kilanga kwa Mulungu na inyi ho fikulutila, kuduhu nambe malajitso gogave ga Musa awu hono hadodo ho hakuhetswa mbaka fyeka fikwile. 19 Munu yo yuve yo akulema kwichila kudita nambe lulongwa ludodo lwa malajitso ga Mulungu, na kuvadahitsa vanu vanji valeche kudita ihyo, munu uyo akuchemwa mudodo nachene mu Wuntsajila wa Mulungu. Lechelelo munu yo yuve yo akudita malajitso ga Mulungu na kugadahitsa, akuchemwa muvina ku Wuntsajila wa Mulungu. 20 Kaha ntsinguvalonjela kuta, manyi kudita kwenyu kota fyo an'gana Mulungu, sinambe kulutile kota fyo van'dita vadahitsi va malajitso ga Musa na Vafwalisayo, nachene simu kwinjila ku Wuntsajila wa Mulungu."

21 "Mwahuliche vanu va katali vavalonje kuta mwalahogola kumukopola munu yoyuve, na munu yo akukopola akuhigwa. 22 Lechelelo heni ntsinguvalonjela, munu yoyuve yo akumuvipila mung'olotse an'ganika kuhigwa, na yo akumubedala mung'olotse na kumuwona siali chinu akusindikwa ku wuhigo. Lechelelo munu yo akumuchema mung'olotse, heve uli mupufi ukotolwe, uyo an'ganika kuhigwa abite ku Jehanamu ya moto. 23 Ihyo manyi unsindika chitambichilwa hono ha matsabahu na kuno unkwiwuka kuta, mukosine na mung'olotso, 24 uchileche chitambichilwa chako ha matsabahu, na ubite tandi ukapatane tandi na mung'olotse, iho ho uwuye ukatawule chitambichilwa chako."

25 "Mupatane na mutelani vako tandi, homukuva muli mung'asi kubita kwa muhigaji. Nayo muhigaji akukusindika kwa mwimilitsi, nayo mwimilitsi akukusindika kwa muvina va vimilitsi va nyumba ya vawopwa. 26 Wukweli ntsinguvalonjela kuta, siukuhuma umo mbaka uhombe sendi ya wudugo."

27 Yesu akendelelaje kulonga "Muhuliche vanu vakatali valontsile kuta, walahogola kivasa na mudala au mulume yosi vako. 28 Lechelelo heni ntsinguvalonjela, chila munu yo akumulava mudala yoyuve kwa mbwiniwo, akuva mwanga avasise nayo mu numbula yake. 29 Ihyo manyi liho lyako lya kwilililo lingukwambutsa udite wubi, ulihetse na kulitaga kutali, kwasawuli yikuva chiba uve ulihela chilungo chimwe mu muvili gwako, kuliko muvili gwako gweka gutotswe mu Jehanamu ya moto. 30 Manyi liwoko lyako lya kwi lililo lingukwambutsa udite wubi, liteme na kulitotsa kutali na heve, kwasawuli yikuva chiba uve wulihela chilungo chimwe mu muvili gwako, kuliko muvili gwako gweka gutotswe mu Jehanamu ya moto."

31 "Kaha yalontsilwe kuta, manyi munu yoyuve yo an'gana kumuleka mudala vake amwandichilaje baluva ya kwileka. 32 Lechelelo heni ntsinkuvalonjela kuta, chila munu yo akumuleka mudala vake kwa chambutso cha kivasa na munu yunji, angumudita mudala vake ave mwaafu, na munu yoyuve yo akumutola mudala uyo akuva mwaafu.

33 "Muhuliche vanu va katali fyovalonjeliwea, mulekaje kilaha kwa wudesi, lechelelo manyi wilahe kwa Mutwa Mulungu uditaje kota fyo ulontsile. 34 Lechelelo heni ntsinkuvalonjela kuta, mwalahogola kudita wilaho wowuve ho muku vangilaha, wala kilaha kwa lulanga, kwasawuli uko kuna chigoda cha Wuntsajila wa Mulungu, 35 awu kwa inyi, kwasawuli inyi ho hono ha kuvichila magulu gake, wala mulekaje kwilaha kwa muji gwa Yelusalemu, kwasawuli ugo go muji gwa Muntsajila Muvina. 36 Yesu akendelelaje kulonga, kaha mulekaje kilaha kwa mutwi gwako, kwasawuli simukuvetsa kudita nambe fwili yimwe yive ntselu awu nitu. 37 Lechelelo ndonga yenyu yivaje kweli, manyi ndaya yivaje ndaya, kwasawuli ndongwa tso tsinlutila iho tsinhuma kwa lila Lihoka."

38 Yesu akendelelaje kulonga muhuliche kaha yalontsilwe kuta, "Liho kwa liho na lino kwa lino." 39 Lechelelo heni ntsinguvalonjela kuta, mulekaje kusumwana na munu yo an'dita wubi, Lechelelo ma munu akutove lutsetse lililo, heve mupituchile lya kavili. 40 Na munu yo akugana akuhije, na kutegula mugolole gwako, heve mupele na likoti. 41 Kaha manyi munu akukukobaditsa lujendo lwa maili yimwe, heve ujende nayo maili tsivili. 42 Chila munu yo akukusuka, mupelaje, na munu yo akugana kukopa, mukopetsaje.

43 Muhuliche kaha, muvaganaje vanu va habehi na umuvipilaje mutelani vako. 44 Lechelelo heni ntsinkuvalonjela kuta, muvaganaje vatelani venyu, na kaha muvasuchilaje vala yovanguvaditila wubi, 45 Manyi mudite ihyo, nachene mukuva vana va Dada venyu va kilanga kwa Mulungu. Kwasawuli mwene anguvangatsila litsuva vanu veka yo van'dita wuwuya na wubi, kaha anguvatonyela ndonya vanu veka yo van'dita wuwuya na wubi. 46 Kuduhu chifunje chochive cho mukupa manyi muvagane vala yo munguvagana, kwasawuli nambe vakongotsa kodi vaditaga hisho. 47 Manyi henye munguvasamusa vang'olotsenyu ngani, mbe, mun'dita chinu chachi kuvalutila vanu vanji? Kwasawuli na vanu yo sinambe vamutumbile Mulungu van'dita hihyo. 48 Ihyo mun'ganika muve mugaya ndongwa tsibi tsotsive kota Dada venyu va Kilanga kwa Mulungu fyo ali.