1 "Mulekaje kuvahiga vanu vanji, ili na henye muleche kuhigwa na Mulungu. 2 Kwasawuli manyi uvahije vanu vanji na heve ukuhigwa hihila. Kota hila fyo uvaditye vanu vanji na Mulungu akukuditila hihyo. 3 Kwasawuli yachi unlola kabadu ka lubawo kokali muliho lya mung'olotso, na heve sinambe wilole libadu lya muliho lyako? 4 Unvetsa chinya ndawuli kumulonjela mung'olotso kuta mung'olotsangu, hondi nguhetse kabadu kokali mugati mu liho lyako, na kuno heve una libadu muliho lyako? 5 Heve uli mupunganitsi, uhetse tandi libadu lyoyili mu liho lyako, ihyo ho ukukawona finofu kabadu kokali mu liho lya mung'olotso."

6 "Mulekaje kujipela mibwa finu fihagulwa na Mulungu kwasawuli jifuluche kuvalumanga, na kaha mulekaje kujitotsela migubi finu fyenyu fya galama, kwasawuli manyi mudite ihyo, jifuluche jikanyaganje."

7 "Musukaje, na henye mukupelwa. Musakaje, na henye mukupata. Muhodetsaje na henye mukudindulilwa. 8 Kwasawuli chila yo nsuka akupelwa, na yo ansaka akupata, na yo akuhodetsa akudindulilwa. 9 Mbe, kwenyu kuna munu vachi manyi mwanage amusuche libumunda, mwene akumupela liganga? 10 Awu manyi amusuche somba, mwene akumupela ntsoka? 11 Henye vanu vanya ndongwa ntsibi mun'daha kuvapela vana venyu finu finofu, mbe ndawuli kwa Dada venyu va Kilanga akuleka kuvapela finu finofu vala wo vangumusuka? 12 Ho hihyo chila chinu cho mun'gana muditilwe na vanu, na henye nanye mun'ganika muvaditile hihyo. Kwasawuli igo go malajitso ga Musa na valoli va Mulungu."

13 "Mwinjilaje kwa kukolela mulwitsi lunyehe, kwasawuli ng'asi ngatsi na lwitsi lugatsi fim'bitila ku wananjifu, wo vankwinjila mu lwitsi ulo na ng'asi iyo vakuva wolofu. 14 Lechelelo lwitsi lo lunyehe na ng'asi nyehe fim'bitila kono ko kuna wumi, nawo wo vanguyitsela ng'asi ya wumi uwo wo vanu vadodo hela."

15 "Mwiyangalilaje na valoli va wudesi, vanu wo vanguvatsila kuno vafwite myenda kota ng'olo, lechelelo kwa mugati vana kota ngwami ng'ali. 16 Mukuvatsela kwa ndongwa tsawo tso van'dita. Mbe, vanu vabavaga mibawo ja mitsabibu mu mibichi jinya mifwa, awu vabavaga matongatonga mu mibichi jojinchemwa michongoma? 17 Ho hihyo mubichi munofu gulelaga mibawo minofu, na kaha mubichi mubi gulelaga mibawo mibi. 18 Mubichi munofu sigufuluche gulele mibawo mibi, na kaha mubichi mubi sigulelaga mibawo minofu ndaya. 19 Lechelelo chila mubichi go sinambe gulele mibawo minofu gukutemwa na kudibulwa mumoto. 20 Ihyo vanu iwo mukuvatsela kwa ndongwa tsawo tso van'dita."

21 "Siyo chila munu yo anyema Mutwa, Mutwa, yo akwinjila mu Wuntsajila wa Mulungu. Lechelelo munu yula yo akudita ndongwa tso an'gana Dada vangu yo ali Kilanga."

22 Siku iyo ya wuhigo vanu wolofu vakundonjela, "Mutwa, Mutwa! Hetwe twavikulaga ndongwa tsako, na kujihetsa misoka na kaha twaditaga ndajilo myolofu kwa litawa lyako. 23 Ihyo nguvalonjela kuta, sintsivatsele, muwuche kwa heni, henye yo mun'dita ndongwa ntsibi!"

24 Ihyo munu yoyuve yo anhulika na kudita ndongwa tsangu, anakota munu munya nyala yo atsentsile nyumba yake mwilanga mwa litalawe. 25 Ndonya manyi yitonye na litse likuka, na yitse ng'ala ngomi fiyitove nyumba iyo siyikugwa, kwasawuli musinji gwake gunkuva gutsentsilwe mu litalawe.

26 "Lechelelo munu yoyuve yo anhulika madahitso gangu na kuleka kugadita, anakota munu mupuva yo atsentsile nyumba yake mu luganga. 27 Ndonya yikatonyaje na likuka likatsaje, na ng'ala ngomi yikawugaje na kuyikunugitsa nyumba yila, nayo yikagwaje, na wugwaji wake wukavaje wukomi."

28 Ihyo Yesu hoavaga kusinda kulonga ndongwa itso, vanu vakatinukaje hila fyo adahitsaga, 29 Kwasawuli siadahitsaga kota vadahitsi va malajitso ga Musa, lechelelo adahitsaga kota munu munya wuvetso.