1 Yesu hoavaga kusinda kulonga ndongwa itso tseka, akavalonjelaje vadahitswa vake kuta, 2 "Muntsela kuta tsisije siku tsivili hela ili kuve na liwungo lya Pasaka, na Mwana va Munu akutawulwa kwa vatelani ili avambwe mumusalaba."

3 Ihyo vatawula nambiko vavina hamwe na vavina va Vayawudi, vakitang'anaje hamwe mu nyumba ya wuntsajila ya muvina va vatawula nambiko yo anchemwa Kayafwa. 4 Vakapangaje hila fyo vakumubata Yesu kwa lufiho ili vamukopole. 5 Lechelelo vakalamulaje kuta lulongwa ulu silun'ganika lukoleche ha chipindi cha liwungo, ili kuleche kuhumila chitika hagati ha vanu.

6 Yesu hoavaga ku muji gwa Betsaniya, mu nyumba ya Simoni yo avaga na wutamwa wa wububa, 7 mudala yumwe yo avaga na supa yo yina mafuta ga galama ngomi, akabitaje hala ha metsa hoavaga Yesu ankulya, akamuboholelaje mafuta gala kumutwi. 8 Vadahitswa vake hovavaga kuwona hila vakavipaje na kulonga, "Yachichi hasala yeka yino? 9 Mafuta gano gakakugutswa kwa magobole molofu, na magobole igo vakakupelwa vanu vatsunwa." 10 Yesu akatselaje cho vahotsaga, ihyo akavalonjelaje kuta, "Kwasawuli yachi mungumutifya mudala yuno? Mwene yuno anditye lulongwa lunofu ndalahela. 11 Vatsunwa munawo siku tseka, lechelelo heni singuva hamwe na henye siku tseka. 12 Mudala yuno amboholye mafuta gano mu muvili ili ambiche chang'ani kwasawuli ya siku ya kutsikwa kwangu. 13 Ntsinguvalonjela wukweli kuta, kono kokuve ko vakuvikula Ndongwa Nofu, na lulongwa luno lo adisile mudala yuno lukutambulwa kwa kumwiwuka mwene."

14 Ihyo Yuda Isikaliyote yumwe va vala vadahitswa kumi na vavili, akabitaje kwa vavina va vatawula nambiko, 15 na kuvalonjela kuta, "Mukumela chinu chachi manyi ntsivaletele Yesu?" Vakamuvalilaje vipande salasini fya madini ga fetsa. 16 Kuhuma luvala ulo Yuda akantsaje kusaka hila fyo akumusindika Yesu kwawo.

17 Siku ndongola hoyavaga ying'acha kufika siku ya mikate jo sijivisilwe hamila, vadahitswa vake vakabitaje hoali Yesu na kumuputsa, "Un'gana kwiya ko tukakuvichile chang'ani chilyo cha Pasaka?"

18 Mwene Yesu akavalonjelaje, "Mubite ku muji kwa mulume yumwe mukamulonjele, Mudahitsi anlonga hino, sala yangu yilihabehi, ngutsa kwa heve hamwe na vadahitswa vangu kulya Pasaka."

19 Vadahitswa vakaditaje kota fyo avalajitse Yesu, vakavikaje chang'ani chilyo cha Pasaka. 20 Hokwavaga kufika hamihe, Yesu akikalisaje hamwe na vadahitswa vake kumi na vavili ili valye. 21 Nawo hovavaga vankulya, Yesu akalongaje, "Ntsinguvalonjela wukweli, yumwe yo mulihamwe akungaluka." 22 Vadahitswa vakawonaje wusungu ndalahela, vakantsaje kumuputsa kuta, "Mutwa, mbe, nguva heni?" 23 Yesu akavalonjelaje, "Yula yo akutsangitsa hamwe na heni mu bakuli uyo yo akungaluka. 24 Ena, Mwana va Munu am'bita kufwa kota Mandiko ga Mulungu fyo gandikwe. Lechelelo akudutsa munu yula yo akumugaluka Mwana va Munu. Yikakuva chiba akaave siakakuleleka." 25 Yuda yo angumugaluka, akamuputsaje, "Mudahitsi! Mbe, nguva heni?" Yesu akamujibulaje, "Heve ulontsile."

26 Hovavaga vankulya, Yesu akategulaje mukate, akamulumbaje Mulungu akamegasaje na kuvapela vadahitswa vake na kuvalonjela, "Mutegule mulye, ugu go muvili gwangu." 27 Kaha akategulaje chikombe cha difwayi, akamulumbaje Mulungu akavapelaje vadahitswa vake na kuvalonjela kuta, "Mutegule mung'we nyeka difwayi yino. 28 Kwasawuli iyi yo danda ya heni yo yikulajila kuta lilagano lino lya Mulungu na vanu vake lyo lya wukweli, yo yim'bohoka kwasawuli ya kuvahumya vanu wolofu mu ndongwa tsawo ntsibi. 29 Ntsinguvalonjela wukweli kuta, singuwila kung'wa difwayi ya mutsabibu mbaka siku yila ho ngung'wa difwayi ntsipya hamwe na henye mu Wuntsajila wa Dada vangu." 30 Hovavaga kusinda kwimba lwimbo, vakawukaje na kubita ku chidunda cha mitseyituni.

31 Kaha Yesu akavalonjelaje, "Chilo cha munyi guno, henye nyeka mukumbilima na kundeka, kwasawuli yandikwe mu Mandiko ga Mulungu kuta,

Ngumutova mudimi na chipinga cha ng'olo chikupwiling'ana. 32 Lechelelo ho nguvakutsilipuka, nguvalongola kubita ku muji gwa Galilaya."

33 Petulo akamupitulaje kuta, "Nayivaje veka vakuleche, heni singuhogola kukuleka." 34 Yesu akamulonjelaje, "Ntsingukulonjela wukweli kuta, chilo chichinago ntsogolo hoyikuva ying'acha kuvika, heve ukung'ana kadatu." 35 Petulo akalongaje, "Nayivaje yin'ganika ntsifwe, singukukana." Vala vadahitswa vanji nawo vakalongaje hihilaga.

36 Ihyo Yesu akabitaje hamwe na vadahitswa vake mu chinyungu cha Getisemane, akavalonjelaje, "Mwikale hano heni ntsim'bita kula kusuka." 37 Akavategulaje Petulo hamwe na vana vavili va Tsebedayo, akantsaje kuva na wususutafu na kugatsika. 38 Ihyo akavalonjelaje, "Ntsina wusungu wukomi mu numbula mbaka ntsili habehi na kufwa. Mwikalaje miho hamwe na heni." 39 Lelo akabitaje halutalo chidogo, akagwaje kwa kufugama na kusuka, "Dada vangu, manyi yin'ganika unyetsele chikombe chino, lechelelo si kota fyo fyontsin'gana heni ila kota fyo un'gana heve." 40 Akabitaje kwa vala vadahitswa vake, akavafikaje vavasise. Akamulonjelaje Petulo, "Ulemilwe, kikala miho hamwe na heni nambe kwa lisala limwe hela? 41 Muvaje miho hamwe na kusala, muleche kwinjila mumajetso. Numbula yiganaga kudita, lechelelo muvili gulemwaga." 42 Akabitaje kaha lwa kavili kusuka, "Dada vangu, manyi yin'ganika chikombe chino cha ng'odeko ndeche kuching'wela, lechelelo chikwilaje cho un'gana hene." 43 Akabitaje kaha, akavafikaje vavasise, kwasawuli miho gawo gavaga kabatiche na tulo. 44 Lelo akavalekaje na kubita kusuka lwa kadatu, akalongaje ndongwa tsitsilaga. 45 Kaha akabitaje kwa vadahitswa vake na kuvaputsa, "Mbe, mung'acha muvasise na kwesela? Mulave! Sala mwanga yifisile, Mwana va Munu akibatika na vanu wo van'dita ndongwa ntsibi. 46 Mulamuche tubite. Mulave! Ankutsa yula yo akungaluka."

47 Lelo Yesu hoavaga anlonga ndongwa itso, luvala lulo akatsaje Yuda, yumwe va vala vadahitswa kumi na vavili. Akatsitse hamwe na vanu wolofu vanya nyaladi na ndumbi yo vatumilwe na vavina va vatawula nambiko na vavina va Vayawudi. 48 Yula yo aganile kumugaluka Yesu, avaga avapelye ndajilo kuta, "Yula munu yo ngumusamusa kwa kumukumbanitsa, uyo yo mukumubata." 49 Lelo Yuda akamuhejelelaje Yesu, na kumulonjela, "Hwewuli Mudahitsi!" Kaha akamukumbanitsaje. 50 Yesu akamulonjelaje, "Bee, muyangu udite cho utsitse kudita." Ihyo vala vanu vakatsaje na kumubata Yesu. 51 Munu yumwe va vala wo vavaga hamwe na Yesu, akasomolaje waladi wake na akamuhutulaje lipulichilo mutantsi va muvina va vatawula nambiko. 52 Ihyo Yesu akamulonjelaje, "Pilule waladi wako mu yala, kwasawuli munu yoyuve yo akitova kwa waladi, uyo akukopolwa kwa waladi. 53 Mbe, sinambe mutsele kuta fuluche ntsimusuche Dada vangu ananje, nayo luvala lulu akakundetela fipinga kumi na fivili fya vatantsi va Kilanga? 54 Lechelelo gakukwila chinya ndawuli Mandiko ga Mulungu go gan'ganika gakwile?" 55 Kaha Yesu akavalonjelaje vala vanu wolofu wo vamubite kuta, "Mbe, mutsitse kumbata na nyaladi na ndumbi kota tsi muwumiyani? Chila siku tsavaga mu Nyumba ya Mulungu ntsin'dahitsa lechelelo simukimbite. 56 Lechelelo itsi ndongwa tseka tsihumye ili gakwile Mandiko ga valoli va Mulungu." Ihyo vadahitswa vake veka vakamulekaje na kubilima.

57 Lelo vala vanu yovamubite Yesu vakamusindikaje ku nyumba ya mutawula nambiko muvina yo achemwaga Kayafwa, uko kovali vakavakong'ine na vadahitsi va malajitso ga Musa na vavina va Vayawudi. 58 Petulo amufwataga Yesu kwa kutali mbaka mu luga lwa muvina va vatawula nambiko. Akinjilaje mu nyumba hamwe na vimilitsi ili alole ndongwa itso fyo tsikuva. 59 Lelo vavina veka va vatawula nambiko na Libalatsa lyeka vakavasakaje wusayidi wa wudesi ili vamukopole Yesu. 60 Lechelelo sivapasile wusayidi wowuve, na yivaje vahumye vasayidi wolofu va wudesi. Hawudugo vakahumilaje vasayidi vavili va wudesi, 61 nawo vakalongaje, "Munu uyo alontsile kuta, Fuluche ngumulanje Nyumba ya Mulungu na kuyitsenga kaha kwa siku tsidatu." 62 Ihyo Muvina va vatawula nambiko akimaje hagati ha vanu veka na kumuputsa Yesu, "Kwasawuli yachi sinambe ulonje chinu chochive? Mbe, sinambe uhuliche vanu vano fyo vangukuhiga?" 63 Lechelelo Yesu akakatukaje myee! Muvina va vatawula nambiko akamulonjelaje, "Ntsingukulahitsa kwa Mulungu yo mumi, utulonjele kuta heve yo Chilisito Mukulusi, Mwana va Mulungu!" 64 Yesu akamujibulaje, "Ulontsile heve! Lechelelo ntsinguvalonjela, kuhuma sambi mukumuwona Mwana va Munu ichite lubali lwa kwililo lwa Mutwa munya wuvetso, fyo ankutsa kuhuma kilanga mu mafuluka." 65 Ihyo Muvina va vatawula nambiko, akademulaje myenda jake kulajila kuta avifile na kulonga kuta, "Angumuliga Mulungu, lelo tun'gana wusahidi wachi kaha? Sambi muhuliche fyo amulitsile Mulungu. 66 Henye mun'wona ndawuli?" Vene vakalongaje, "An'ganika kukopolwa!" 67 Kaha vakamufunyilaje mati ku miho, na kumutova makofi, 68 na kumulonjela kuta, "Ulagule, nani yo akutofile?"

69 Petulo ho avaga ichite hivala mu luvigo. Duve mutantsi yumwe mudala akabitaje kwa Petulo na kumulonjela kuta, "Heve nave uka hamwe na Yesu va ku Galilaya." 70 Lechelo Petulo akakanaje halutalo ha veka akalongaje, "Sinambe ntsele cho unlonga." 71 Hoavaga anhuma kivala, halwitsi lwa luvigo akitang'anaje na mutantsi yunji muhintsa akamuwonaje, akavalonjelaje vanu wovavaga hala kuta, "Uyuno nayo aka hamwe na Yesu va ku Natsaleti." 72 Petulo akakanaje kaha kwa kilaha na kulonga, "Heni sintsimutsele munu uyo." 73 Luvala lulo vanu wo vavaga vimile hono hala vakabitaje hoali Petulo na kumulonjela, "Nachene heve nave uli yumwe vawo, mana nambe ndonga yako yingukutambutsa." 74 Iho Petulo akantsaje kwikotola na kwilaha akalongaje kuta, "Sintsimutsele munu uyo!" Luvala lulo ntsogolo yikavikaje. 75 Petulo akiwukaje ndongwa tso avaga alontsilwe na Yesu kuta, "Hala ntsogolo hoying'acha kuvika ukung'ana kadatu." Duve akahumaje kivala, akavembaje ndalahela kwa wusungu.