1 Kaha Vafwalisayo vamwe hamwe na vadahitsi va malagitso ga Musa kuhuma ku muji gwa Yelusalemu, vakabitaje kwa Yesu na kumulonjela, 2 "Mbe, kwasawuli yachi vadahitswa vako sinambe vafwate ntsovelo tsa vavina, kwakuva vankulya bila kukalava mawoko kota fyo yin'ganika?" 3 Yesu akavajibulaje, "Kwasawuli yachi na henye mungugabedala madahitso ga Mulungu na kibata madahitso genyu? 4 Kwasawuli Mulungu alontsile kuta, walahogola kuvabedala dado na yuwo, na munu yoyuve yoakumuliga dade na yuve ang'anika akopolwe. 5 Lechelelo henye mudahitsaga vanu kuta, manyi munu ana chinu chochive choagana kumutanga dade awu yuve chinu cho uganije kumupela Mulungu, 6 henye mun'dahitsa munu uyo sian'ganika kumuhesimila dade na yuve ihyo ho munguwubedala lulongwa lwa Mulungu. 7 Henye vapunganitsi, Isaya muloli va Mulungu mwanga ali alagwe ndongwa tsenyu kuta"

8 Mulungu anlonga, "Vanu vano vanyesimilaga kumilomo hela, lechelelo numbula tsawo tsilikutali na heni.

9 Kufugamila kwawo kuli bule hela, natso ndongwa tsawo tso malajitso ga vanu hela."

10 Yesu akagachemaje gala malugu ga vanu na kuvalonjela, "Munyulikitse na muntselewe. 11 Ndongwa tsotsifuluche tsimudite munu aleche kidichilwa na Mulungu sindongwa tso tsinjilaga kumulomo gwake, lechelelo ndongwa tso tsihumaga kumulomo gwake, itso tso tsimuditaga munu aleche kidichilwa na Mulungu." 12 Ihyo vadahitswa vake vakamubitilaje na kumulonjela, "Un'tsela kuta Vafwalisayo vakavifile ndalahela hovavaga kuhulika hila fyo ukalontsile lulongwa lula?" 13 Yesu akavajibulaje, "Chinu chochive manyi chive sichayatsilwe na Dada vangu va Kilanga, chikukulwa! 14 Muvaleche, iwo filongotsi fibofu wo vanlongotsa fibofu, ihyo chibofu manyi amulongotse chibofu muyage, iwo veka vakwinjila mu lyowo." 15 Petulo akalongaje, "Utulonjele muhwano ugo guna mana yachi." 16 Yesu akavaputsaje, "Mbe, na henye si nambe mutsele lulongwa luno? 17 Mbe, sinambe mutsele chila chinu cho chinkola mumulomo chibitaga mwileme na hambele chihumaga na kubita kucholo? 18 Lechelelo ndongwa tso tsinhuma kumulomo, itso tsihumaga kunumbula na igo go gamuditaga munu aleche kidichilwa na Mulungu. 19 Kwasawuli mu numbula gahumaga mahotso mabi kota hila, kukopola, na waafu, na mbwiniwo tsa waafu, na wuhitsi, na wudesi, na wusongeletsi. 20 Ndongwa itso tsimuditaga munu ave mwaafu, lechelelo kulya bila kukalava, si kumuditaga munu aleche kidichilwa na Mulungu."

21 Hambele Yesu akawukaje hono hala, akabitaje ku miji ja Tilo na Sidoni. 22 Mudala yumwe yo ikalaga hono iho na yosiavaga Muyawudi akakolaje kwa litsi likomi kuta, "Mutwa, Mwana va Dawudi, unyulumile! Kwasawuli muhintsa vangu ankodwa ndalahela na misoka." 23 Lechelelo Yesu siakamujibwe lulongwa loluve, ihyo vadahitswa vake vakabitaje na kumugongola ndalahela vakalongaje, "Mulonjele abite, kwasawuli angututifya kwa chiyove" 24 Yesu akavalonjelaje, "Mulungu si anumile kokuve, ila kwa vanu va Isilaheli wovayatsile kota ng'olo tsotsiyatsile." 25 Lechelelo yula mudala akatsaje, akafugalaje halutalo ha Yesu na kulonga, "Mutwa dedede, ntsinsuka unanje!" 26 Yesu akamujibulaje, "Si finofu ndaya kutegula chilyo cha vana na kujitotsela mibwa." 27 Mudala yula akamujibulaje Yesu kuta, "Nachene Mutwa, lechelelo nambe mibwa jilyaga filyo fyofigwaga hametsa ya muvina vawo." 28 Ihyo Yesu akamulonjelaje yula mudala, "Litumbilo lyako likomi, na yivaje hihyo kwako kota fyo un'gana." Luvalalulo yula muhintsa akaponaje.

29 Yesu akawukaje hala na kubita habehi na lilamba lya Galilaya, akakwinaje kuchidunda na akikalisaje kuko. 30 Vanu wolofu vakamufwataje, na kumusindichila vanu filema, na fivete, na fibofu, na vatamwa vanji wolofu, vakavavikaje halutalo hake, nayo Yesu akavaponetsaje. 31 Vanu vala vakapomokaje ndalahela, hala hovavaga kuvawona vabubwi vanlonga, na filema vamponetswa, na fiteve van'jenda na fibofu vanlola, vakamutsumitsaje Mulungu va Isilaheli.

32 Kaha Yesu akavachemaje vadahitswa vake na kuvalonjela, "Ntsinguvawonela lusungu vanu vano kwasawuli vaveye hamwe na heni kwa siku tsidatu, na sambi valihela chilyo chochive cha kulya. Ndema kuvalaga na kuno vana ntsala, vafuluche vatowe na mbupulu mu ng'asi." 33 Vadahitswa vake vakamulonjelaje, "Tukupata kwiya chilyo cha kuvakwila vanu vano veka na hono hano tuli ha mbuga?" 34 Yesu akavaputsaje, "Muna mabumunda galinga?" Nawo vakamulonjelaje, "Mabumunda saba na tusomba tutunga hela." 35 Lelo Yesu akavalonjelaje vanu veka vikalise hasi. 36 Akategulaje mabumunda gala na somba tsila, akamulumbaje Mulungu, hoavaga kusinda, akavapelaje vadahitswa vake nawo vakavagavasilaje vanu. 37 Vanu veka vakalyaje na kiguta, hambele vadahitswa vake vakakong'osaje fyo fisije vakafimemyaje fitangula saba. 38 Veka wovalyeye vavaga valume elfu tsitayi, bila kuvavalila vadala na vana. 39 Yesu akavalagaje vanu na kukwina mu mutumbwi akabitaje hono ho hanchemwa Magadani.