1 Chipindi icho Yesu alutilaga mu migunda ja ngano Siku ya Kwesela. Vadahitswa vake vavaga na ntsala, vakantsaje kubena maho ga wuhemba na kwantsa kulya ndete. 2 Vafwalisayo hovavaga kuwona ihyo, vakamulonjelaje Yesu, "Lave vadahitswa vako van'dita ndongwa tsotsin'ganika tsiditwe ha Siku ya Kwesela." 3 Yesu akavalonjelaje, "Mbe, simwasomile cho adisile muntsajila Daudi hamwe na vayage hala hovavaga na ntsala?" 4 Mwene inje mu Nyumba ya Mulungu na kulya hamwe na vayage mabumunda gogavisilwe kwasawuli ya Mulungu, go sigaganikaga galiwe na munu yoyuve ila na vatawula nambiko ng'ani? 5 Mbe, kaha simwasomile mu fitabu fya malajitso ga Musa kuta, chila Siku ya Kwesela vatawula nambiko vayanangaga Siku ya Kwesela mu Nyumba ya Mulungu, lechelelo sinambe vahotselwe kuta vana nongwa yoyive? 6 Lechelelo ntsinguvalonjelani kuta, hono iha hoyoli muvina kulutila Nyumba ya Mulungu. 7 Manyi muka muntsele mana ya ndongwa itsi kuta, ntsin'gana lusungu, na sinambengane nambiko, simuka kuvahiga vanu wo valihela nongwa yoyive. 8 Kwasawuli Mwana va Munu yo Mutwa va Siku ya Kwesela.

9 Yesu akawukaje hono iho, akabitaje mu nyumba ya kitang'anila Vayawudi. 10 Mumo mwavaga na munu yumwe yo apotsile liwoko, nawo Vafwalisayo vanji vakamuputsaje Yesu, "Mbe, yiganikaga kumuponetsa munu Siku ya Kwesela?" Vamuputsitse ihyo ili vapate chambutso cha kumuhiga. 11 Yesu akavalonjelaje, "Mbe, kuna munu yumwe hagati henyu munya ng'olo yo yinje mu likombo ha Siku ya Kwesela, yoafuluche ayileche kuyibata na kuyihumya kivala Siku ya Kwesela?" 12 Lechelelo ntsinguvalonjelani kuta, munu yo va mana kulutila ng'olo, ihyo tun'ganika kudita ndongwa nofu Siku ya Kwesela 13 Ihyo Yesu akamulonjelaje munu yula kuta,

"Golole liwoko lyako." Nayo akagololaje, nalyo likavaje lyumi nachene kota liyake. 14 Ihyo Vafwalisayo vakahumaje kivala, na kwantsa kulongana hila fyo vakumukopola Yesu.

15 Yesu hoaveye kuhulika kuta Vafwalisayo van'gana kumukopola akawukaje hono iho, vanu wolofu vakamufwataje, nayo akavaponetsaje vatamwa veka, 16 na akavalemetsaje valeche kuvalonjela vanu vanji ndongwa tsake. 17 Yesu avalemitse ili lukwile lulongwa lo alontsile Isaya muloli va Mulungu kuta,

18 "Mulave mutantsi vangu yo ntsimuhagwe, na yontsimuganile, na yo anganitsa numbula yangu.

Ihyo nguvika Muhe gwangu kwake, nayo akuvikula ndongwa tsa wuhigo wa heni kwa vanu veka.

19 Siakupungana awu kuyova, na kaha litsi lyake silikuhulikwa mung'asi.

20 Siakulubena ludenje lolubibinde, na kaha si akuyitsimya koloboyi yo yilihabehi na kutsima,

Mbaka ho akudita wuwuya wusume. 21 Vanu va inyi tseka vakuva na lihuvilo kwa mwene."

22 Kahi vanu vakamuletelaje Yesu munu chibubwi na kaha avaga chibofu kwasawuli avaga na misoka. Yesu akamuponetsaje munu yula akavetsaje kulonga na kulola. 23 Vanu veka vakapomokaje na kiputsa kuta, "Mbe, uyu afuluche ave Mwana va wilaho va Dawudi?"

24 Lechelelo Mafwalisayo hovavaga kuhulika ihyo vakalongaje, "Munu uyu anvinga misoka kwa wuvetso woampelwa na muvina va misoka yo anchemwa Belitsebuli." 25 Yesu akagatselaje mahotso gawo na kuvalonjela kuta, "Manyi wuntsajila wowuve wusumwane na kigava fipingafipinga, na kwitova siwufuluche wime, na nyumba yoyive awu vanu wovave wo vansumwine na kigava fipingafipinga sivafuluche vadite lulongwa loluve. 26 Manyi Lihoka lingulivinga lihoka liyage, likuva ligavise lyene mu fipingafipinga. Mbe, wuntsajila wake wukwima chinya ndawuli? 27 Henye munlonga ntsimvinga misoka kwa wuvetso wa Belitsebuli. Lelo manyi heni ntsive tsin'dita ihyo, na vanu yovanguvafwata henye, vakuva vangujivinga misoka kwa wuvetso wa nani? Kwasawuli iyo vene yo vakuvahiga henye. 28 Lechelelo manyi heni ntsimvinga misoka kwa wuvetso wa Muhe va Mulungu, ihyo mutselaje kuta Wuntsajila wa Mulungu wufisile kwenyu.

29 "Kuduhu munu yo afuluche injile mu nyumba ya munu munya ludali na kusukula finu fyake bila kumuwopa tandi. An'ganika amuwope tandi, na iho ho akuvetsa kumusukula finu fyake.

30 "Munu yoyuve yo sinambe andichile alitebe na heni, na munu yoyuve yo sinambe akong'ase hamwe na heni uyo antagalitsa. 31 Lelo ntsinguvalonjela wukweli kuta, Mulungu afuluche amuhulumile munu ndongwa ntsibi tsotsive tso akudita, lechelelo munu yo akumuliga Muhe va Mulungu, uyo siafuluche ahulumilwe." 32 Munu yoyuve yo akulonga lulongwa lubi loluve kwa Mwana va Munu akuhulumilwa, lechelelo munu yo akulonga lulongwa lwa kumuliga Muhe va Mulungu siakuhulumilwa sambi na siku tseka tsotsigaya wudugo.

33 Mubichi munofu gulelaga mibawo minofu, na mubichi mubi gulelaga mibawo mibi. Chila mubichi gutselanikaga kwa mibawo jake. 34 Henye yo mulivabi kota ntsoka tso tsina sumu, chinya ndawuli mufuluche mulonje ndongwa nofu na kuno henye mun'dita ndongwa ntsibi? Kwasawuli munu alongaga chila chochinhuma mu numbula yake. 35 Munu munofu ahumyaga ndongwa nofu kuhuma mu numbula yake, na munu mubi ahumyaga ndongwa ntsibi kuhuma mu numbula yake. 36 "Duve ntsinguvalonjelani, chila lulongwa lubi lovanlonga vanu, lukuvalilwa mu siku yila ya wuhigo 37 Kwasawuli kwa ndonga yako ukuvalilwa kuta muwuya, na kaha kwa ndonga yako ukulajilwa kuta uli mubi."

38 Siku yimwe kaha vadahitsi va malajitso ga Musa hamwe na Vafwalisayo vakamulonjelaje Yesu, "Mudahitsi tun'gana utulajile ndajilo." 39 Nayo Yesu akavajibulaje, "Chilelo cha waafu mun'gana ndajilo, simukupelwa ndajilo yoyive ila ndajilo ya Yona muloli va Mulungu. 40 Kota hila Yoha fyo ichite siku tsidatu mu lileme lya lisomba likomi, ho hihyo nayo Mwana va Munu fyo akikala hanyi siku tsidatu hamunyi na hachilo. 41 Siku yila ya wuhigo vanu va muji gwa Ninavi vakuvasongeletsa vanu va chilelo chino kuta vadisile ndongwa ntsibi. Kwasawuli vanu va muji gwa Ninavi vakamupituchilaje Mulungu na kuleka ndongwa tsawo ntsibi, lechelelo iha hana muvina kumulutila muloli Yona. 42 Muntsajila mudala va inyi ya Seba akwima hamwe na vanu va chilelo chino, nayo akuvasongeletsa kuta vadisile ndongwa ntsibi. Kwasawuli mwene akatsitse kuhuma ku inyi ya kutali ili ahulikitse tselo tsa muntsajila Selemani, na iha hana muvina kulutila muntsajila Selemani.

43 "Manyi lisoka livingwe kuhuma kwa munu, liyambaga yambaga hono hagaya malenga ili kusaka hono ha kwesela. Manyi lilemwe kuhawona, 44 lilongaga kuta, ngupiluchila mu nyumba yangu yo ngikalaga. Nalyo holikuva lifisile na kuyiwona nyumba yila yifyajilwe na kupambwa finofu, 45 nalyo libitaga kujitegula jiyage jinji saba mibi kulutila lyene, jeka jitsaga kwinjila na kikala mugati mwa munu. Munu uyo avaga mubi kulutila hala hamutalo. Ihyo fyo yikuva kwa vanu va chilelo chino wovan'dita ndongwa ntsibi."

46 Yesu hoavaga ang'acha anlonga na lilugu lya vanu, yuve hamwe na vang'olotse vakafikaje kivala na vakaganaga kulongana nayo. 47 Munu yumwe akamulonjelaje Yesu, "Yuwo hamwe na vang'olotso vali kivala van'gana kulongana na heve." 48 Yesu akamulonjelaje munu uyo, "Yuva vangu yo nani? Vang'olotsangu wo vanani?" 49 Kaha akavasonelaje chala vadahitswa vake na kulonga, "Iva wo yuva vangu na wo vang'olotsangu! 50 Kwasawuli munu yoyuve yoan'dita ndongwa kota fyo an'ganaga Dada vangu va Kilanga, uyo yo mung'olotsangu, na yo muhatsa vangu, na kaha uyo yo yuva vangu."