1 Kaha Yesu akavalonjelaje vadahitswa vake hamwe na vanu vala wolofu kuta, 2 "Vadahitsi va malajitso ga Musa na Vafwalisayo wo vanago mamulaka ga kudadambula malajitso ga Musa. 3 Ihyo mun'ganika kibata na kudita chila cho vakuvalonjela, lechelelo mwalahogola kwiga fyo van'dita, kwasawuli sivaditaga chila cho vanguvavikulila. 4 Vawopaga mijamanda na kuvatwika vanu mu mayega, lechelelo vene valemaga kuvatanga nambe kitwika hela. 5 Vene vaditaga ndongwa tsawo itso kwasawuli ya kuwoneka kwa vanu. Vafwalaga fisipi fya nyingo mumawoko gawo na mufihanga fyawo fyo fyandikwe Mandiko ga malajitso ga Musa, na kufwala myenda jinya fifundo finya filebeto fitali. 6 Kaha vaganaga kikalisa mu mawungo mu figoda fya kutalo fya vanu vatambulwa, na mu nyumba tsa kwitang'anila Vayawudi. 7 Vaganaga kusamuswa na vanu kwa kukakamilwa hono ha kugutsila finu, na kugana kuchemwa, vadahitsi. 8 Lechelelo henye mulekaje kuchemwa kuta vadahitsi! Kwasawuli mudahitsi venu yumwe hela, na henye nyeka muli lukolo. 9 Kaha mulekaje kumuchema munu yoyuve kuta dada mu inyi, kwasawuli Dada venyu yo yumwe hela, yo ali Kilanga. 10 Mulekaje kuchemwa, filongotsi! Kwasawuli chilongotsi venyu yo yumwe hela nayo yo Chilisito. 11 Munu yo akuva muvina hagati henyu uyo yo an'ganika ave mutantsi venyu. 12 Munu yo angidutsa akwiswa, nayo yo angiyisa akukwinitswa."

13 Mukudutsa henye vadahitsi va malajitso ga Musa na Vafwalisayo vapunganitsi! Kwasawuli mun'dinda lwitsi lwa Wuntsajila wa Mulungu halutalo ha miho ga vanu. Henye vene sinambe mwinjile mugati, na kaha nambe muvaleche wo van'gana kwinjila vinjile. 14 Mukudutsa henye vadahitsi va malajitso na Vafwalisayo vapunganitsi! Yo muntegula finu fya vafwile na kilajila kuta muli vanu vawuya na kusala suko nali. Ihyo kwa lulongwa ulo mukuhigwa wuhigo wukomi ndalahela!

15 "Mukudutsa henye vadahitsi va malajitso ga Musa na Vafwalisayo vapunganitsi! Henye yo mun'jnda ku bahali na ku inyi ng'afu ili mumudite munu yumwe agaluche na kuvafwata henye. Lechelelo manyi mumupate, mumuditaga ave mwana va ku Jehanamu ndalahela kuvalutila henye."

16 "Mukudutsa henye filongotsi fibofu! Henye yo munlonga kuta, manyi munu ilahe kwa Nyumba ya Mulungu, wilaho uwo si chinu ndaya, Lechelelo manyi munu ilahe kwa tsahabu yo yitawulwe mu Nyumba ya Mulungu, wulaho uwo wukumubata. 17 Henye fibofu muvapufi! Chinu chachi cho china mana kulutila chinji, yila tsahabu awu yila Nyumba ya Mulungu yo yinguyidita tsahabu iyo yive nyagulwa na Mulungu? 18 Lechelelo kaha mulongaga kuta, manyi munu ilahe kwa hono ha kutawulila nambiko, wulaho uwo siwuli chinu ndaya. Lechelelo manyi munu ilahe kwa nambiko yo yili hono ha kutawulila nambiko, wilaho uwo wukumubata. 19 Henye fibofu! Chinu chachi cho china mana ndalahela, yila nambiko awu hala hono ha kutawulila nambiko ho hanguyidita yila nambiko yive nyagulwa na Mulungu? 20 Ho ihyo lelo manyi munu ilahe kwa iho hono ha kutawulila nambiko, ilahaga kwa hono iho ha kutawulila nambiko na kwa finu fyeka fyo fili mwilanga mwake. 21 Nayo munu yo akilaha kwa Nyumba ya Mulungu, angilaha kwa iyo Nyumba ya Mulungu na kwa uyo Mulungu yo angikala mugati. 22 Nayo yo akilaha kwa Kilanga kwa Mulungu, akuva angilaha kwa chigoda cha Wuntsajila cha Mulungu na kwa mwene yo angikala mu chigoda icho."

23 "Mukudutsa henye vadahitsi va malajitso ga Musa na Vafwalisayo vapunganitsi! Kwasawuli muntawula chimwe mu finu kumi hata kwa nyadikwa tsa mboga, na bintsali na wufuta, lechelelo mulema kudita ndongwa tso angutsigana Mulungu, kota hila kudita wuwuya kwa Mulungu, na kuva na lusungu na kuva vanu vakihuvilwa kwa Mulungu na kwa vanu. Mun'ganika kugadita geka makomi na madodo, na mulekaje kusemwa na gala ganji. 24 Henye filongotsi fibofu! Mun'jlula finu fidodo kota ntsuguni mu malenga, lechelelo mummila finu fikomi kota linyama lyo linchemwa ngamiya!"

25 "Mukudutsa henye vadahitsi va malajitso ga Musa na Vafwalisayo henye muva punganitsi! Kwasawuli munhofuga fikombe na bakuli mwivala, lechelelo munleka mugati mumemile finu fyo muvasukwe vanu kota fyo mun'gana henye. 26 Henye Vafwalisayo fibofu! Muhofugaje chikombe mugati tandi na kivala nako ho chikuva chelu."

27 "Mukudutsa henye vadahitsiva malajitso ya Musa vapunganitsi, Munakota makabuli go gabasilwe chokaha kwa kivala go gan'woneka kuta manofu, lechelelo mugati fimemile fitseje na kuwola. 28 Hihila na henye kwa kivala mun'woneka na chila vanu kuta mun'dita kota fyo an'gana Mulungu, lechelelo kwa mugati mumemile wupunganitsi na ndongwa ntsibi."

29 "Mukudutsa henye vadahitsi va malajitso ga Musa na Mafwaliyo vapunganitsi! Mun'tsenga makabuli ga valoli va Mulungu, na kuganotsa makabuli ga vanu wo van'dita kota fyo an'gana Mulungu. 30 Na henye munlonga kuta, manyi hetwe tuka twikale luvala lula vakukwetu ho vavaga wumi, si tukakihantsa nawo kwa kuvakopola valoli va Mulungu. 31 Ihyo munlajila kuta henye yo muli vana va vanu vala wo vavakopwe valoli va Mulungu! 32 Lelo mukwitsaje ndongwa ntsibi tsa vakukwenyu. 33 Henye yo munakota ntsoka, na lulelo lwa ntsoka tso tsina sumu! Mukukuluka chinya ndawuli wuhigo wa moto gwa Jehanamu? 34 Kwasawuli yino heni ntsinguvaletela valoli va Mulungu na vanya ntselo, na vadahitsi. Vamwe mukuvakopola na kuvavamba mu musalaba, na vamwe mukuvatova kwa mikotya mu nyumba tsenyu tsa kitang'anila na mukuvasaka chijiji kwa chijiji kovali. 35 Ihyo yila ng'otolo yo yambutswe na vakukwenyu yo vavakopwe vala wo vaditaga kota fyo an'gana Mulungu, kuhuma kukopolwa kwa Abeli yo avaga alihela nongwa yoyive, mbaka kukopolwa kwa Tsekaliya mwana va Belachiya, yo vamukopwe hagati ha Nyumba ya Mulungu na hono ha kutawulila nambiko. 36 Ntsinguvalonjela wukweli kuta, ndongwa itso tseka tsikuhigwa mu chilelo chino."

37 "Yelusalemu! Bee, Yelusalemu! Munguvakopola valoli va Mulungu na kuvatova na maganga vala wo vatumilwe kwako. Kalinga ntsiwiniwe kuvakong'asa vanago kota hila ng'uku fyo yikong'asaga fitswiya fyake mumabava gake, lechelelo ukalemile. 38 Lelo nyumba yako yikulekwa mahame. 39 Ntsingukulonjela kuta, si mukumbona kaha mbaka hala ho ukulonga kuta,

Aditilwe wuwuya na Mulungu mwene yo ankutsa kwa litawa lya Mutwa."