1 Luvala lulo vadahitswa vake vakabitaje kwa Yesu vakamuputsaje kuta, "Nani yo muvina ku Wuntsajila wa Mulungu?" 2 Yesu akamuchemaje mwana yumwe na kumuvika hagati hao akalongaje, 3 "Ntsinkuvalonjela wukweli kuta, manyi muleche kugaluka kuhuma mu ndongwa tsenyu ntsibi, na kuva kota vana vadodo, nachene simukwinjila ku Wuntsajila wa Mulungu. 4 Munu yoyuve yo akwika kota mwana yuno, yo akuva muvina kulutila veka ku Wuntsajila wa Mulungu. 5 Munu yoyuve yo akumulibulitsa mwana mudodo kota yuno kwasawuli yangu, akuva andibulitse heni."

6 Manyi munu yoyuve amwambutse yumwe va vadodo vano vanya litumbilo adite ndongwa ntsibi, yika kuva chiba awopelwe lwala lukomi lwa kuhalulila mu singo yake na kutotswa ha ndimbo nali ya malenga. 7 Vakudutsa vanu va muinyi kwasawuli ya kudita ndongwa tso tsinkwambutsa vanu yo vangumutumbila Chilisito vadite ndongwa ntsibi. Ndongwa tso tsinkwambutsa vanu vadite ndongwa ntsibi tsin'ganika tsihumile, lechelelo akudutsa yula yo akwambutsa vanu vadite ndongwa ntsibi. 8 Manyi liwoko awu ligulu lyako lingukwambutsa udite ndongwa ntsibi, udumule na utotse kutali. Yikuva chiba kwaheve kwinjila ku wumi kuno ulihela liwoko awu ligulu limwe, kuliko uve na mawoko awu magulu geka na kutagwa ku moto mukali go sigutsimikaga siku tseka. 9 Manyi liho lyako lingukwambutsa udite ndongwa ntsibi, likolopole na kulidibula kutali. Yikuva chiba kwaheve kwinjila ku wumi kuno ulihela liho limwe, kuliko kuva na miho gega gavili na ukatagwe ku moto mukali go sigutsimikaga siku tseka.

10 Mwiyangalilaje, muleche kumubedala nambe yumwe va vadodo vano, kwasawuli ntsinguvalonjela kuta, "Vatantsi va Kilanga kwa Mulungu siku tseka valihamwe na Mulungu. 11 Kwasawuli Mwana va Munu akatsitse kuvakulusa vala veka wo vangikala kota vayatsile. 12 Mun'wona ndawuli? Manyi munu ave na ng'olo mya moja lechelelo ng'olo yimwe yiyaje, siakutsileka tsila tisini na tisa kuchidunda na kubita kuyisaka ng'olo yimwe yoyiyatsile? 13 Ntsinguvalonjela wukweli kuta, manyi ayipate akuhechelela kwasawuli ya ng'olo yimwe kulutila tsila tisini na tisa tso tsivayatsile. 14 Hohihyo na Dada venyu va Kilanga si aganaga nambe yumwe va vadodo vano ayaje."

15 "Manyi mung'olotso akuditile lulongwa lubi, ubite ukamulonjele wubi wake homuvavili heve na mwene. Manyi akuhulikitse ukuva umupasile mung'olotso. 16 Lechelelo manyi aleche kukuhulikitsa, utegule munu yumwe awu vavili, kwasawuli kota fyo yandikwe mu Mandiko ga Mulungu kuta, lulongwa ludichilwaga kwa wusahidi wa vanu vavili awu vadatu nongwa yilamulwaga. 17 Manyi aleme kuvahulikitsa ivo, uchilonjele chikundi cha vanu vanya litumbilo, nayo manyi aleme kuvahulikitsa, duve munu uyo mumuvalile kota munu mugaya litumbilo awu mukongotsa kodi."

18 "Ntsinguvalonjela wukweli kuta, chinu cho chive cho mukulemetsa mu inyi, icho chikuva chilemitswe na Kilanga kwa Mulungu, na chinu cho chive cho mukuchidichila mu inyi chikuva chidichilwe na Kilanga kwa Mulungu."

19 "Kahi ntsinguvalonjela, manyi vanu vavili vakulagana mu inyi kwasawuli ya lulongwa loluve lo van'gana kusuka, Dada vangu va Kilanga akuvaditila lulongwa ulo. 20 Kwasawuli hala ho vakukong'ana vanu vavili awu vadatu kwasawuli yangu, na heni nguva baho hamwe nawo."

21 Kahi Petulo akabitaje kwa Yesu na kumuputsa, "Mutwa, manyi mung'olotsangu ankwendelela kunditila wubi, ntsin'ganika ntsimuhulumile mala kalinga? Mbe nambe mala saba?" 22 Yesu akamujibulaje, "Sintsingukulonjela kuta mala saba hela, lechelelo muhulumilaje nambe saba mala sabini." 23 "Ihyo Wuntsajila wa Mulungu wufuluche wiganitswe na muntsajila yumwe yo aganaga kuvala hisabu tsake na vatantsi vake. 24 Hoavaga ankwantsa kuvala nawo hisabu tsake, vakamuletelaje munu yumwe yo adayilwaga magobole mongofu. 25 Munu uyo avaga alihela cha kuhomba lideni ilyo, muntsajila vake akalajitsaje kuta agutswe mwene hamwe na mudala vake, na vanage, na finu fyeka fyo avaga nafyo ili kulihomba lideni ilyo. 26 Yula mutantsi akafugamaje halutalo ha muntsajila uyo na kumugongola kuta, ntsinsuka dedede untsinde tandi, hambele ngukuhomba lideni lyako lyeka. 27 Yula muntsajila va mutantsi yula akamuwonelaje lusungu, akamuhulumilaje lideni lyeka na kumuleka abite." 28 "Lechelelo yula mutantsi, hoavaga anhuma kivala akamuwonaje mutantsi muyage yoavaga angumudaya magobole machefu hela. Ino mwene akamudingaje kusingo na kumulonjela, unyombe magobole gangu go ntsingukudaya! 29 Yula mutantsi muyage akamufugamilaje na kumugongoletsa na kumulonjela kuta, ntsingukugongola dedede untsinde, hambele ngukuhomba lideni lyako. 30 Lechelelo mwene akalemaje, akamutegulaje na kumudindila mu nyumba ya vawopwa mbaka hala ho akulihomba ilyo lideni lyeka. 31 Vatantsi vayage hovavaga kutsiwona ndongwa tso tsihumye vakavipaje ndalahela, na kubita kumulonjela muntsajila ndongwa itso. 32 Yula muntsajila akamuchemaje yula mutantsi na kumulonjela, heve uli mutantsi munya wubi! Heni ngakuwon'ye lusungu lideni lyako ho ukangongolitse. 33 Mbe, na heve si uganikije kumuwonela lusungu mutantsi muyago kota heni fyo ngakuwun'ye lusungu? 34 Duve kwa lilakali likomi, muntsajila yula akamusindikaje kwa vimilitsi va nyumba ya vawopwa ili akodwe mbaka hala ho akuhomba lideni lyeka lyo adayilwaga." 35 Yesu akasindaje kwa kulonga kuta, "Ho hihyo Dada vangu va Kilanga fyo akuvaditilani henye, manyi muleche kuvahulumila vanu wo vakuvaditila ndongwa ntsibi."