1 Hambele siku yiyila Yesu akahumaje mu nyumba yila na kubita kikala halubali lwa lilamba lya Galilaya. 2 Lilugu likomi ndalahela lya vanu likamupilimaje mbaka Yesu akakwinaje mu mutumbwi, na luvalalulo vanu vakimaje mu lubali lwa lilamba ili vamuhulikitse. 3 Akavadahitsaje ndongwa ntsolofu kwa mihwano. Akavalonjelaje, "Munu yumwe avaga ahele kumitsa nyadikwa. 4 Nayo hoavaga am'mitsa nyadikwa, tsinji tsikagwaje mu ng'asi, fideje fikatsaje na kudobola. 5 Nyadikwa tsinji tsikagwaje mu matalawe kosikwavaga na lilongo lyolofu na simusika tsikawonekaje kota, kwasawuli lilongo lyavaga lidodo, 6 lechelelo hala litsuva ho lyavaga kuvala, tsikakalaje kwasawuli ndela tsavaga muchanyamuchanya hela. 7 Nyadikwa tsinji tsikagwaje hagati ha mifwa tsikakalagasaje, hambele mifwa ijo hojavaga kukalagala ndalahela, jikatsisumaje. 8 Nyadikwa tsiji tsikagwaje mu lilongo linofu, tsikotaje na kulela, tsinji tsikalelaje nyadikwa mya, na tsinji sitini, na tsinji salasini!" 9 Yesu akasindaje kwa kuvalonjela kuta, munu munya mapulichilo ga kuhulichila na ahuliche.

10 Hambele vakatsaje vadahitswa va Yesu na kumuputsa, "Kwajili ya chichi un'dahitsa kwa mihwano?" 11 Yesu akavalonjelaje, Mulungu avagavye henye nyala tsa kutsitsela ndongwa tsa Wuntsajila wa Mulungu tso tsing'acha kugubulwa. Lechelelo wo valikivala vanlonjelwa chila chinu kwa mihwano, kwasawuli vene valihela ntselo. 12 Kwasawuli yula munya chinu akuwilwa finu finji, lechelelo yula yoalihela chinu akusukulwa mbaka chila chinu cho anacho. 13 Iyo yo ntsambutso ya kulonga nawo kwa mihwano. Kwasawuli vana miho, lechelelo sinambe valole na vana mapulichilo lechelelo sinambe vahuliche, na kaha sinambe vatsele. 14 Ihyo tsikwilye ndongwa tso alontsile Isaya muloli va Mulungu kuta, "Vanu iva vakuhulika na kuhulika lechelelo si vakwelewa, na kaha vakulava na kulava, lechelelo si vakuwona."

15 "Kwasawuli numbula tsa vanu vano tsiveye nalamu kudaha, kwa mapulichilo gawo sinambe vahuliche na kwa miho gawo nambe valole, Muntsajila anlonga hino,"

"Manyi valole kwa miho gawo na kuhulika kwa mapulichilo gawo na kutsela kwa nyala tsawo na kumiluchila heni nguvaponetsa."

16 "Lechelelo mutambichilwe henye kwasawuli miho genyu ganlola na mapulichilo genyu ganhulika." 17 Yesu aendelelaje kulonga kuta, "Ntsinguvalonjelani wukweli kuta, valoli wolofu hamwe na vanu yo van'dita kota fyo an'gana Mulungu, vakiwiniwaga kutsiwona ndongwa itsi tso mungutsiwona. Lechelelo sivatsiwene, na kaha vaganaga kutsihulika lechelelo sivatsihuliche."

18 "Lelo muhulikitse mana ya muhwano gula gwa mumitsi. 19 Munu yoyuve yo anhulika lulongwa lwa Mulungu na kaha aleche kulutsela, ihwana na nyadikwa tso tsigweye mu ng'asi, nalyo Lihoka litsaga kutegula chila chochili mu numbula yake. 20 Nyadikwa tsila tso tsamitsitswe mu matalawe, tsihwana na munu yo ahuliche lulongwa lwa Mulungu na kwanuchila kwa wuhechelelo. 21 Lechelelo kwasawuli Ndongwa Nofu tsa Mulungu sitsikalaga mugati mwa numbula, tsikalaga chipindi chidodo hela, manyi kuhumile ng'odeko awu chinu chibi chochive valekaga kumutumbila Mulungu. 22 Nyadikwa tso tsamitsitswe mumisati ja mifwa tsinhwana na munu yo ahuliche lulongwa lwa Mulungu, lechelelo muhwehwe na mbwiniwo tsa kugana mali, na mbwiniwo tsinjitsinji tsa finu fya mu inyi tsanangaga ndongwa tsa Mulungu, na ihyo munu anlemwa kudita ndongwa tso an'gana Mulungu. 23 Nyadikwa yila yo yamitsitswe mu lilongo linofu, yinhwana na munu yo anhulika lulongwa lwa Mulungu na kulutsela nayo ankuva kota wuhemba wowunlela maho, wumwe wunlela maho mya, na wunji wunlela sitini na wunji wunlela salasini."

24 Yesu akavalonjelaje vanu muhwano gunji kuta, "Wuntsajila wa kilanga wihwana na munu yo apandite nyadikwa nofu mu mugunda gwake gwa wuhemba."

25 "Lechelelo hachilo vanu hovavaga vavasise mutelani vake akatsaje na kuyala mihembahemba hagati ha wuhemba na kuwuka. 26 Ihyo lelo hambele wuhemba howavaga kukalagala na kwantsa kwalula, mihembahemba najo jikatselanikaje. 27 Vatantsi va munya mugunda vakabitaje kumuputsa munya mugunda kuta Mutwa, si tukali tumitsitse nyadikwa nofu mu mugunda gwako, ino lelo mihembahemba jihumye kwiya?" 28 Nayo munya mugunda akavalonjelaje, "Mutelani yo ayatsile mihembahemba. Ihyo lelo vatatsi vake vakawilaje kumuputsa kuta un'gana tubite tukajing'ule? 29 Nayo akavajibulaje kuta, mujileche kwasawuli manyi mujing'ule mukung'ula mihembahemba na filyo. 30 Mujileche jikalagale hohamwe mbaka chipindi cha kubeta, iho ho nguvalonjela mujikunje tandi mihembahemba na kujinyanya. Kaha musogole wuhemba na kuwuvika mukano yangu."

31 Yesu akawilaje kulonga nawo kwa mihwano jinji kuta, "Wuntsajila wa Mulungu wihwanite na munu yo ategwe nyadikwa ndodo yoyinchemwa haladali na kubita kuyala mu mugunda gwake. 32 Nyadikwa iyo ya muhaladali nayivaje ndodo kulutila nyadikwa tseka, lechelelo manyi yote na kukalagala yivaga ngomi kulutila mboga tseka, na kuva mubichi mukomi mbaka fideje fya kululanga fitsengaga fifulya mu miputi jake."

33 Kaha Yesu akavalonjelaje muhwano gunji kuta, "Wuntsajila wa Mulungu wihwanite na mudala yumwe yo atweye hamila na kuyihantsa mu madebe gadatu ga wuse wa ngano, na wuse weka wukatunaje."

34 Yesu avadahitsaga vanu veka kwa mihwano, na siavadahitsaga chinu chochive bila muhwano. 35 Adisile ihyo ili lukwile lulongwa loalontsile muloli va Mulungu kuta,

"Ngulongana nawo kwa mihwano, nguvika helu ndongwa tsotsifihilwe kuhuma inyi fyo yawumbitwe."

36 Hambele Yesu akavalagaje vanu na kwinjila mu nyumba, vadahitswa vake vakamufwataje na kumuputsa, "Utudadambulile gula muhwano gwa mihembahemba ja kumugunda." 37 Yesu akavalonjelaje, "Muyali va tsila nyadikwa nofu yo Mwana va Munu. 38 Gula mugunda yo inyi. Nyadikwa nofu wo vanu vala va Wuntsajila wa Mulungu. Lechelelo mihembahemba wo vanu vala va Lihoka 39 Yula mutelani yoayatsile mihembahemba lyo Lihoka. Chipindi cha kubeta cho chipindi cha wudugo wa inyi, na vala vabetaji wo vatantsi va Kilanga va Mulungu. 40 Kota hila mihembahemba fyo jikungwaga na kunyanywa mumoto, ho hihyo fyo yikuva hachipindi cha wudugo wa inyi. 41 Mwana va Munu akuvalajitsa vatantsi vake va kilanga, nawo vakuvakong'asa kuhuma mu Wuntsajila wake vanu vala wovanguvambutsa vanu vadite ndongwa ntsibi, hamwe na vala veka wovan'dita ndongwa ntsibi. 42 Nawo vakutagwa mumoto mukali gwa siku tseka go sigutsimikaga, uko ko vakuvemba na kugwegwetsula mino. 43 Ihyo, vala wo van'dita kota fyo an'gana Mulungu wakuvala kota litsuva mu Wuntsajila wa Dada vawo." Yesu akasindaje kwa kuvalonjela kuta, munya mapulichilo ga kuhulichila na ahuliche.

44 Wuntsajila wa Mulungu wihwana na chinu cha galama ngomi chochifilwe mu mugunda. Munu yumwe akachiwonaje chinu icho akahechelelaje ndala hela na kuchifiha, akabitaje kugutsa finu fyeka fyoavaga nafyo ili akagule mugunda gula.

45 Kaha Wuntsajila wa Mulungu wihwana na munu yumwe yo asakaga chinu cha galama ngomi cho chinchemwa lulu.

46 Hoavaga kuyipata lulu yimwe ya galama ngomi, akagutsaje chila chinu cho avaga nacho akabitaje kuyigula.

47 Kaha Wuntsajila wa Mulungu wihwana na waafu wo wutotsitswe mu lilamba na wukagwilitsaje somba tsa chila ayina. 48 Wafu howavaga kumema valovi vakawukwejelaje kulubali, vakikalisaje na kuhagula somba nofu vakatsisopaje mu mutumbwi gwawo, na jila mitsumbuli vakajidibulaje.

49 Hohihyo fyo yikuva ha wudugo wa inyi. Vatantsi va Kilanga va Mulungu ho vakutsa kuvabagula vanu wovan'dita ndongwa ntsibi na wovan'dita ndongwa tsa Mulungu. 50 Nawo vanu wovan'dita ndongwa ntsibi vakavatagaje mulitanuli lya mumoto mukali gwa siku tseka go sigutsimikaga, uko kovakuvemba na kugwegwetsula mino.

51 Yesu akavaputsaje vadahitswa vake kuta, "Mbe, mungutselewa ndongwa itsi tseka?" Vakamujibulaje kuta, "Ena tungutselewa."

52 Yesu akavalonjelaje kaha, "Ihyo lelo, chila mudahitsi va malajitso ga Musa yo ampituka kuva mudahitswa va Wuntsajila wa Mulungu, ihwana na munya nyumba yo antola muhachiba yake finu fipya na fya katali."

53 Yesu hoavaga kusinda kulonga ndongwa itso kwa mihwano ijo, akawukaje hono iho, 54 akabitaje ku Natsaleti uko kogwavaga muji go akalagalye. Uko akavadahitsaje vanu mu kaye ya kitang'anila Vayawudi, chila munu akapomokaje na kulonga hino, "Yuno apasile kwiya luhala luno na wuvetso wa kudita ndongwa tsino tsa ndajilo?" 55 "Mbe, yuno si yoyula mwana va Muselemala yo tumutsele? Yuve si yoyula yo anchemwa Maliyamu? Mung'olotsawo va Yakobo, na Yusufu, na Simoni hamwe na Yuda? 56 Mbe, vahatsave si tulihamwe nawo bahanago? Lelo apasile kwiya ndongwa tsino tseka?" 57 Ihyo vakavaje tebe nayo na kuleka kumutumba.

Lechelelo Yesu akavalonjelaje, "Muloli va Mulungu ahesimilwaga chila hono, lechelelo abedalwaga na vanu va mu kaye yake hamwe na vang'olotse." 58 Ihyo, si adisile ndajilo myolofu uko, kwasawuli valemile kumutumba.