1 Hoyavaga kulutila Siku ya Weselo, hamilawu ya siku ya wulongolo wa wichi, Maliya va ku muji gwa Magidalena na Yula Maliya yunji vakabitaje kuyilava kabuli. 2 Simusika kukavaje na likakamo likomi lya inyi, Mutantsi va kilanga va Mutwa, akikaje kuhuma kilanga na kulihetsa lila liganga lyo lyavaga ligubiche likabuli na kulivika halubali, akikalilaje. 3 Mutatsi uyo va kilanga kumiho kwake kwavalaga kota wumeme na mwenda gwake gwavaga mwelu tswee! Kota nyiwi. 4 Vala vimilitsi va kabuli vakavaje na muloto ndalahela, vakavaje kota vafweye. 5 Lechelelo yula mutantsi va Kilanga va Mulungu akavalonjelaje vadala vala kuta, "Mulekaje kuva na muloto, kwasawuli ntsin'tsela kuta mungumusaka Yesu yo avambitwe mumusalaba. 6 Alihaduhu hano kwasawuli atsilipuche kota fyo alontsile, mutse mulole hono ho aka avasise. 7 Lelo mwangufitse mubite mukavalonjele vadahitswa vake kuta, Atsilipuche, na sambi avalongwe kula ku muji gwa Galilaya. Uko ko mukumuwona, Ale, heni mwanga ntsivalonje." 8 Ihyo vala vadala vakawukaje hala ha kabuli kuno vana muloto na wuhechelelo, vakabilimaje ili kuvalonjela vadahitswa vake. 9 Luvala lulo Yesu akitang'anaje nawo na kuvasamusa, "Kamwene!" Vala vadala vakamuhejelelaje vakamubataje magulu gake, vakamufugamilaje. 10 Kaha Yesu akavalonjelaje, "Muleche kuva na muloto, Mubite mukavalonjele vang'olo tsangu vabite ku Galilaya, uko ko vakumbona."

11 Vala vadala hovavaga vam'bita, vimilitsi vamwe va kabuli yila vakabitaje ku muji kuvalonjela vavina va vatawula nambiko ndongwa tseka tsotsihumye. 12 Lelo vakakong'anaje hamwe na vavina, na hovavaga valongine vakavapelaje vala vimilitsi va kabuli magobole molofu 13 na kuvalonjela kuta, "Henye mukulonga kuta vadahitswa vake vakatsitse hachilo na kumuhitsa hala hetwe ho twavavaga tuvasise. 14 Manyi lulongwa luno lufiche kwa mutavala venyu, hetwe tukulongana nayo na kuvahetsela muhwehwe na henye simukupata lulongwa lubi loluve." 15 Lelo vala vimilitsi vakategulaje gala magobole na kudita kota hila fyo vavaga valajitswe. Lulongwa ulo lutagalye kwa Vayawudi mbaka sambi.

16 Vala vahidatswa kumi na yumwe vakafikaje ku Galilaya na kubita ku chila chidunda cho ali avalajitse Yesu. 17 Hovavaga kumuwona vakamufugamilaje, na lechelelo vanji vavaga na muhwehwe. 18 Yesu akahejelelaje habehi na kuvalonjela, "Melitwe wuvina weka wa kutavala Kilanga na mu inyi. 19 Kwasawuli yino, mubite kwa vanu va inyi tseka mukavadite vave vadahitswa vangu, kuno mukuvabatitsa kwa Litawa lya Dada, na Mwana, na lya Muhe va Mulungu. 20 Muvadahitse kibata ndongwa tseka tso ntsivalajitse henye. Heni nguva hamwe na henye siku tseka mbaka hawudugo gwa fipindi."