1 Hokwavaga kufika hamilawu, vavina va vatawula nambiko veka hamwe na vavina va Vayawudi, vakalonganaje ili vamukopole Yesu. 2 Vakamuwopaje pingu na kumutegula, vakamusindikaje kwa Pilato, yo avaga muvina va muji.

3 Ihyo Yuda yo avaga amugaluche Yesu, hoavaga kuwona kuta Yesu mwanga vamuhijite kukopolwa, numbula yake yikamuhigaje akapilulaje fila fipande salasini fya madini ga fwetsa kwa vavina va vatawula nambiko na vavina va Vayawudi. 4 Akavalonjelaje, "Ndisile lulongwa lubi kwa kumutawula munu yo alihela lukani loluve." Lechelelo vene vakalongaje, "Lulongwa ulo lukututanga chichi hetwe? Ukudaha heve" 5 Mwene Yuda akafidibulaje fila fipande fya fwetsa mugati mwa Nyumba ya Mulungu, akahumaje kivala, akabitaje kikopola kwa kitumbika. 6 Vavina va vatawula nambiko vakategulaje fila fipande fya madini ga fyetsa, vakalongaje kuta, "Siyo finofu ndaya kuhantsa fwetsa tsino hamwe na sadaka tsinji, kwasawuli ifi fipande fya kumukopola munu." 7 Lelo vakapatanaje na kulamula kuta vakagule mugunda gwa munu muwufi na go guna lilongo lya kuwufila fiya, guve hono ha kutsichila vanu vajentsi. 8 Icho cho chivalo cha mugunda gula kuchemwa mbaka sambi mugunda gwa danda. 9 Ihyo ndongwa tsa muloli Yelemiya tsikakwilaje kuta, "Vategwe fipande salasini fya madini ga fwetsa, kota hila fyo vavaga vapatine na munu yula kumuhomba." 10 Nago magobole igo vakagulilaje mugunda gunya lilongo lya kuwufila fiya.

11 Vakamwimyaje Yesu halutalo ha muvina va muji. Yula muvina akamuputsaje, "Heve yo Muntsajila va Vayawudi?" Yesu akamujibulaje, "Heve yo ulontsile ihyo." 12 Lechelelo vavina va vatawula nambiko hovavaga kumuhiga siakalontsile lulongwa loluve. 13 Ihyo Pilato akamuwutsaje kuta, "Mbe, sinambe uhuliche ndongwa tso vangukuhiga?" 14 Lechelelo Yesu siakalontsile nambe lulongwa lumwe, mbaka muvina yula nayo akapomokaje ndalahela.

15 Lelo kwavaga na ntsovelo tsa kumudindulila muwopwa yumwe yo akuhagulwa na vanu chipindi cha liwungo lya Pasaka. 16 Luvala ulo kwavaga na muwopwa yumwe yo avaga mutambulwa ndalahela kwasawuli ya ndongwa ntsibi tso aditaga, yo achemwaga Balaba. 17 Ihyo vanu ho vakakong'ine hamwe, Pilato akavaputsaje, "Mun'gana ntsimudindulile nani, mungumugana Balaba awu Yesu yo anchemwa Chilisito?" 18 Pilato alontsile ihyo kwasawuli atselaga kuta, vamuletite kwa mwene kwasawuli ya mbafya hela. 19 Pilato hoavaga ichite mu chigoda cha kuhijila, mudala vake akamusindichilaje wujumbe kuta, "Uleche kumudita lulogwa lubi loluve munu yuno, kwasawuli hachilo ng'odiche ndalahela mu mbilo kwasawuli yake. 20 Lechelelo vatawula nambiko vavina na vavina va Vayawudi vakavakokaje vanu kuta, vamusuche Pilato amudindulile Balaba, na Yesu an'ganika akopolwe. 21 Nayo Pilato akavaputsaje, Mun'gana ntsivadindulile nani?" Vakalongaje, "Balaba!" 22 Pilato akavalonjelaje, "Ntsimudite ndawuli Yesu yo anchemwa Chilisito?" Vanu veka vakalongaje, "Avambwe mumusalaba!" 23 Pilato akawilaje kuvaputsa, "Kwasawuli ya chichi? Adisile wubi wachi?" Lechelelo vene vakendelelaje kuyova kuta, "Umuvambe mumusalaba!"

24 Pilato hoavaga kulemwa kudita lulongwa loluve, lechelelo ho chavaga chin'kwantsa chitika hela, akategulaje malenga na kukalava mawoko halutalo ha vanu na kulonga kuta, "Manyi henye, heni ntsili muduhu kwa lulongwa lwa kumukopola munu yuno!" 25 Vanu veka vakalongaje, "Nongwa yino ya kumukopola Yesu yivaje kwa hetwe na kwa vana vetu!" 26 Lelo Pilato akamudindulilaje Balaba, na akalajitsaje vimilitsi vake vamutove Yesu mikotya, akumutawulaje kwa vanu vamuvambe mumusalaba.

27 Ihyo vimilitsi vala va Pilato akamutegulaje Yesu mbaka mu luvigo lwa nyumba ya muvina va Chilumi yo yinchemwa Pulayitoliyo, chipinga cheka cha vimilitsi chikamukong'asichilaje Yesu. 28 Vakamuwopolaje myenda jake na kumufwika mwenda mudung'u. 29 Kaha vakabotaje kofiya ya mifwa na kumufwika kumutwi. Vakamupelaje ng'weku muliwoko lyake lililo na kufugama halutalo hake kwa mbedatsi kuno vanlonga, "Kamwene be, Muntsajila va Vayahudi!" 30 Vakamufunyilaje mati vakategulaje yila ng'weku na kumutova tova nayo kumutwi. 31 Hovavaga kumubedala, vakamuwopolaje mwenda gula mudung'u na kumufwika myenda jake. Ihyo vakamusindikaje ili vamuvambe mumusalaba.

32 Hovavaga vam'bita, vakitang'anaje na munu yumwe va Kulene yo achemwaga Simoni, nawo vakamulatsimitsaje itwiche musalaba gula gwa Yesu. 33 Vakafikaje hono ho hanchemwa Goligota, chinya kutijila "Hono ha lipala lya mutwi." 34 Vakamupelaje Yesu difwayi yo yihahile. Lechelelo Yesu ho avaga kuyijela, akalemaje kung'wa. 35 Hovavaga kumuvamba mumusalaba, hambele vakagavanaje myenda jake kwa kutova simbi. 36 Kaha vakikalaje kumwimilila iho ha musalaba. 37 Hilanga ha musalaba gula havaga handikwe ndongwa tsa kumuhiga kuta, "UYU YO YESU MUNTSAJILA VA VAYAWUDI." 38 Vawumiyani vavili vavaga vavambitwe hamwe na Yesu. Yumwe musalaba gwa lubali lwa ichiji na yumwe musalaba gwa lubali lwa ililo. 39 Vanu wo vavaga vanlutila hono iho vamuligaga Yesu na kuno vatsuntsa mitwi jawo na kulonga kuta, 40 "Heve siwavaga ungidutsa kuta ukuyigumulanga Nyumba ya Mulungu na kuyitsenga kwa siku tsidatu? Lelo wikuluse! Lelo manyi heve uli Mwana va Mulungu, wiche mumusalaba!"

41 Hihyo nawo vavina va vatawula nambiko na vadahitsi va malajitso ga Musa hamwe na vavina va Vayawudi nawo vakamubedelaje kuta, 42 "Avakuluse vanji, lechelelo anlemwa kwikulusa mwene! Mwene yo Muntsajila va Vayawudi? Lelo iche mu musalaba na hetwe tukumutumba. 43 Amutumbilaga Mulungu lelo Mulungu amukuluse manyi kweli angumugana, kwasawuli avaga alontsile kuta, Heni yo Mwana va Mulungu." 44 Hihila nawo wo vavaga vavambitwe hamwe na Yesu vakamuligaje.

45 Kuhuma sasita ya hamunyi jitsa likayigubikaje inyi yeka. 46 Hoyavaga kufika satisa akakolaje fikami, "Eloyi Eloyi lama Sabachitani?" Chinya kutijila "Mulungu vangu, Mulungu vangu, mbona undesile?" 47 Lechelelo vanu vanji wo vavaga vimile hono hala, hovavaga kuhulika ihyo vakalongaje kuta, "Angumuchema muloli Eliya." 48 Muyawo yumwe akabilimaje kuleta siponji na kuyitsabika mu sichi, akayivikaje mu lidenje na kumupela ang'we. 49 Vanu vanji vakalongaje, "Leche tulole manyi Eliya akutsa kumukulusa." 50 Ihyo Yesu akavembaje kaha kwa litsi likomi, akafwaje. 51 Luvala lulo lipantsila lya Nyumba ya Mulungu likatulikaje kavili luhuma kuchanya mbaka hasi, 52 makabuli gakagubukaje na vanu wo vafweye kuno vangumutumbila Mulungu vakatsilipulwaje. 53 Vakahumaje mu makabuli, na hoavaga kutsilipuka Yesu vakinjilaje ku Muji Muhagulwa na Mulungu na vakavahumilaje vanu wolofu.

54 Yula muvina va vimilitsi hamwe na vala wo vavaga hono hala hoavaga kufiwona fyo fihumye, akamutsumitsaje Mulungu na kulonga, "Wukweli munu yuno aditaga kota fyo an'gana Mulungu." 55 Hono iho havaga na vadala wolofu yo valolaga kwa kutali. Iwo wo vakavamufwatite Yesu kuhuma ku muji gwa Galilaya nawo vamutangaga. 56 Yumwe vawo avaga Maliya va ku Magidalena, na Maliya yuvawo Yakobo na Yosefu, hamwe na yuvawo va Tsebedayo.

57 Hoyavaga kufika hamihe, akatsaje munu yumwe mufuchifu yo achemwaga Yusufu va ku muji gwa Alimataya, uyo nayo avaga mudahitswa va Yesu. 58 Akabitaje kwa Pilato kugusuka muvili gwa Yesu, na Pilato akalajitsaje vamupele. 59 Ihyo Yusufu akagutegulaje muvili, akagupilingitsaje sanda ya galama ngomi ntselu tswee! 60 Akagutsikaje mu kabuli yo avaga ahongwe mwene mu litalave. Kaha akavikaje liganga likomi halutalo ha lwitsi lwa kabuli, akawukaje. 61 Maliya va kuhuma muji gwa Magidalena, na yula Maliya yunji vavaga vichite habehi na hono iho vanlava kabuli.

62 Hamilawu iyage yo yavaga siku ya Weselo, vavina va vatawula nambiko, na Vafwalisayo vakabitaje kwa Pilato, 63 na kumulonjela "Muvina, twiwuche kuta yula mudesi hoavaga mumi avaga alontsile kuta, Hoyikufika siku ya kadatu ngutsilipuka. 64 Lelo ulajitse kuta kabuli yimililwe mbaka siku tsidatu, ili vadahitswa vake vafuluche vatse vaguhitse muvili gwake na kuvalonjela vanu kuta atsilipwiche. Wudesi uwo wa wudugo wukuva wubi ndalahela kulutila wula wa wulongola."

65 Pilato akavalonjelaje, "Henye munawo vimilitsi, ale mubite mukimilile fyo mukuvetsa henye." 66 Ihyo vakabitaje na vimilitsi ili kwimilila nachene kabuli, vakalitovaje muhuli liganga lya mu mulango gwa kabuli, na vakalekaje baho vimilitsi.