1 Yesu akalongaje nawo kaha kwa mihwano. 2 "Wuntsajila wa Mulungu wihwana na muntsajila yo amuvichye chang'ani mwanage chilyo cha litsenjele. 3 Akavatumaje vatantsi vake vakavalibulitse vanu mu liwungo, lechelelo vala wo valibulitswe vakalemaje. 4 Kaha akavatumaje vatantsi vanji, na kuvalonjela kuta muvalonjele vala wo valibulitswe kuta, mutse mulitsenjele lyangu lilichang'ani kwasawuli ya henye, mwanga sintsitse senga tsangu ng'ambaku na tsinji tsotsinonile na chila chinu chili chang'ani, ihyo mutse mwitsenjele. 5 Lechelelo vene vakabedalaje lulongwa ulo, na chila munu akabitaje ku lulongwa lwake, yumwe akabitaje kumugunda gwake, na yunji ku katsi tsake, 6 na vamwe vakavabataje vala vatantsi vake kwa lilakali, vakavatovaje na kuvakopola. 7 Duve yula muntsajila akavipaje ndalahela, ihyo akavatumaje vatova ligalu vake vakavakopole vala wo vavakopwe vatantsi vake na kugunyanya moto muji gwawo. 8 Hambele akavalonjelaje vatantsi vake kuta, liwungo lya litsenjele lili chang'ani, lechelelo vala wo tuvalibulitse sivaganikije kutsa ndaya. 9 Ino lelo mubite mu mitava ja vanu wolofu mukamulibulitse chila munu yo yuve yo mu kumuwona atse mulitsenjele, 10 Vala vatantsi vakabitaje mu mitava ja vanu wolofu vakavakong'asaje vanu veka wo vavawene, vawuya na vabi. Hala ha lidama ho lyakolekaga litsenjele hakamemaje vajentsi."

11 "Lechelelo muntsajila ho avaga kwinjila mugati ili avawone vajentsi, akamuwonaje munu yumwe yo avaga sialafwala mwenda gwa litsenjele lila. 12 Muntsajila akamuputsaje, muyangu, winje muno chinyandawuli na kuno siufwite mwenda gwa litsenjele lino? Lechelelo mwene akagayaje cha kulonga. 13 Iho yula muntsajila akavalonjelaje vatantsi vake, ale mumuwope mawoko na magulu mukamutotse kivala ko kuna jitsa. Uko ko kukuva na chivembo na kugwegwetsula mino." 14 Yesu akasindikitsaje kwa kulonga kuta, "Kwasawuli wo vachemilwe wolofu, lechelelo wo vahagulwe vadodo."

15 Ihyo vala Vafwalisayo vakawukaje hono hala ho avaga Yesu, na vakabitaje kulongana hila fyo vakumudaditsa Yesu kwa ndongwa tsake. 16 Vakavatumaje vatantsi vawo hamwe na Vahelode, vakamulonjelaje Yesu kuta, "Mudahitsi tun'tsela kuta heve uli munu yo an'dita kota fyo an'gana Mulungu na un'dahitsa ndongwa tsa Mulungu kwa wugolofu, siumogopaga munu yoyuve, na kaha siumukakamilaga munu yoyuve munya chewo. 17 Ino utulonjele chinu cho un'hotsa heve, Mbe, hetwe tun'ganika awu sinambe tuganiche kuhomba kodi kwa muntsajila va Loma?"

18 Lechelelo Yesu akatselaje wubi wawo, akavalonjelaje, "Henye vapunganitsi mbona munsaka kundaditsa? 19 Mundajile ligobole ilyo lyo muhombaga kodi." Nawo vakamuletelaje lindolosi! 20 Lelo Yesu akavaputsaje, "Sula iyi na litawa ili fya nani?" 21 Vakamujibulaje, "Muntsajila va inyi ya Loma?" Iho Yesu akavalonjelaje, "Finu fya muntsajila muvina va Loma mumupele muntsajila va Loma, na finu fya Mulungu mumupele Mulungu." 22 Hovavaga kuhulika ihyo vakapomokaje, vakamulekaje na kuwuka.

23 Siku yiyo Vasadukayo vamwe wo valongaga kuta kuduhu wutsilipuko wa vanu, vakabitaje kwa Yesu. 24 Vakamulonjelaje kuta, "Mudahitsi, Musa avaga atulonje kuta munu yo atweye mudala manyi afwe bila kuva na mwana, yin'ganika mung'olotse amuhale mufwile uyo, ili amulelele vana mung'olotse yo afweye. 25 Lelo iha hetu havaga na vanu saba va lukolo lumwe. Mulongola akatolaje mudala, hambele yula akafwaje kuno alihela vana, ihyo mung'olotse yunji akamuhalaje mufwile yula. 26 Lulongwa ulo lukavaje hihyo kwa yula va kavili, na va kadatu, na mbaka veka vala saba. 27 Ho vavaga kufwa veka, hambele na mudala yula nayo akafwaje. 28 Lelo siku yila ya wutsilipuko uyo mudala akuva mchina va nani kwa vala valume saba? Kwasawuli veka vavaga vamutweye."

29 Yesu akavalonjelaje vala Vasadukayo kuta, "Henye mun'yaga kwasawuli sinambe mugatsele Mandiko ga Mulungu wala wuvetso wake. 30 Kwasawuli vanu wo vafweye ho vakutsilipuka sivakutola awu kutoleka, kwasawuli vakuva kota vatantsi va Kilanga va Mulungu. 31 Ino lelo kwa ndongwa tsa wutsilipuko, mbe, simukasomile hila fyo avaga alontsile Mulungu? Hila fyo avalonje kuta, 32 Heni yo Mulungu va Ibulamu, na Yisaka, na Yakobo! Ihyo mwene siyo Mulungu va vanu wo vafweye, mwene yo Mulungu va vanu wo vali wumi."

33 Vala vanu wolofu hovavaga kuhulika lulongwa ulo, vakapomokaje kwa madahitso gake.

34 Vafwalisayo hovavaga kuhulika kuta Yesu avakatukitse Vasadukayo, vakakong'anaje hamwe. 35 Yumwe va mudahitsi va malajitso ga Musa akamuputsaje Yesu kwa kumujela, 36 "Mudahitsi, ndajitso yachi yo ngomi mu malajitso?"

37 Yesu akamujibulaje kuta "Umugane Mutwa Mulungu vako kwa numbula yako yeka, na kwa muhe gwako gweka, na kwa luhala lwako lweka. 38 Iyi yo ndajitso ngomi na yo ndajitso ndongola. 39 Ndajitso ya kavili yinhwana na yiyo kuta umugane munu va habehi kota fyo ungwigana heve. 40 Malajitso geka ga Musa na madahitso geka ga valoli va Mulungu, gahumye mu malajitso iga gavili."

41 Vafwalisayo ho vavaga vang'acha vakong'ine bahalaga, Yesu akavaputsaje kuta, 42 "Henye munguluhotsa ndawuli lulongwa lwa Chilisito Muhagulwa? Mbe, mwana va nani?"

Vakamujibulaje kuta, "Mwana va Dawudi."

43 Kaha Yesu akavalonjelaje, "Lelo yiveye ndawuli Dawudi kwa kulongotswa na Muhe va Mulungu angumuchema mwene Mutwa? Kwasawuli alontsile hino,"

44 "Mutwa akamulonjelaje Mutwa vangu kuta,

wikale lubali lwa liwoko lyangu lililo mbaka

ntsivaviche vatelani vako hasi ha magulu gako."

45 "Lelo manyi Dawudi angumuchema Chilisito, Mutwa, yikuva ndawuli ave mwanage?"

46 Kuduhuli munu yo yuve yo awoniche kumujibula chinu. Luhuma siku iyo kuduhuli munu yo ajetsitse kumuputsa chinu.