1 Yesu akalongaje, "Wuntsajila wa Mulungu wihwana na munu munya mugunda yo ilafile hamilawu ili kuvapela vanu katsi ya kulima mu mugunda gwake gwa mitsabibu. 2 Vakapatanaje kuhombwa mahombo ga siku yimwe, ihyo akavasindikaje ku mugunda gwake gwa mitsabibu. 3 Akabitaje kaha lisala lya kadatu hamilawu akavafikaje vanu vamwe vimile hono hovagutsilaga finu valihela katsi." 4 Akavalonjelaje, "Henye nanye mubite mukakole katsi ku mugunda gwangu gwa mitsabibu, na heni kuvahomba chochin'ganika." 5 Yula munya mugunda akahumaje kaha sala sita na sala tisa, akaditaje hihila. 6 Yavaga kufika sala ya kumi na yimwe mumihe akahumaje kaha, akavafikaje vanu vanji vang'acha vimile valihela katsi. Akavaputsaje, kwasawuli yachi mwimile hono hano munyi yeka bila kukola katsi yoyive? 7 Vala vanu vakamujibulaje, twimile hano kwasawuli kuduhu munu yoyuve yo atupelye katsi. Nayo munya mugunda akavalonjelaje, "Henye nanye mubite mukakole katsi ku mugunda gwangu gwa mitsabibu."

8 "Hoyavaga kufika hamihe, yula munya mugunda gwa mitsabibu akamulonjelaje mwimilitsi vake va mugunda kuta avacheme vala vakola katsi ili uvahombe mahombo gawo, wantsilaje kwa wo vatsitse hamihe na usinde na vala va hamilawu. 9 Vala vakola katsi wo vavisilwe muda gwa sala kumi na yimwe, vakatsaje na chila yumwe akanuchilaje mahombo ga siku yimwe. 10 Hambele vakatsaje vala va hamilawu, na hovavaga kufika vahotsaga kuta vakuhombwa kuvalutila vala wo vavisilwe katsi mumihe. Lechelelo chila yumwe akahombwaje mahombo ga siku yimwe. 11 Hovavaga kuhombwa, vakantsaje kumukalalila yula munya mugunda" 12 Vakamulonjelaje, "Vanu vano wo vavisilwe katsi hamihe vakwete katsi kwa muda gwa lisala limwe hela, na heve uvahombite kota hetwe yo twikangitse na munyi yeka?" 13 Yula munya mugunda akamujibulaje muyawo yumwe kuta, "Bee, muyangu, singutsulumwe ndaya. Mbe, situkatupatine kuta ngukuhomba mahombo ga siku yimwe? 14 Tegule mahombo gako ubite. Heni ndamwe kumuhomba munu yuno yo ntsimuvisile katsi hamihe kota fyo nguhombite heve. 15 Mbe, sindisile kota fyo ntsin'gana kwa mali tsangu? Awu un'wona mbafya kwasawuli mbeye na lusungu?" 16 Kahi Yesu akalongaje, "Ho hihyo fyoyikuva, vanu va hawudugo vakuva valongola na valongola vakuva va kuwudugo."

17 Yesu hoavaga ankwina kubita ku muji gwa Yelusalemu, akabitaje halubali hawiyeka na vadahitswa vake kumi na vavili na kuvalonjela, 18 "Muhulikitse, tunkwina kubita ku Yelusalemu, nayo Mwana va Munu vakumubata na kumusindika kwa vavina na vatawula nambiko na vadahitsi va malajitso ga Musa, nawo vakumuhiga akopolwe, 19 na kumusindika kwa vanu wosi Vayawudi ili vam'bedale na kumutova mikotya na akukopolwa kwa kuvambwa mu musalaba, lechelelo siku ya kadatu akutsilipuka."

20 Kaha yuvawo va vana va Tsebedayo akabitaje kwa Yesu hamwe na vanage, nayo akafugamaje halutalo hake na kuvasuchila vanage lulongwa kwa Yesu. 21 Yesu akamuputsaje, "Un'gana chinu chachi?" Yula mudala akamujibulaje, "Ntsingukugongola undichile kuta iva vanangu, yumwe akikale lubali lwa kwililo na yunji lubali lwa kwichiji ku Wuntsajila wako." 22 Yesu akamulonjelaje, "Henye simuchitsele cho munsuka. Mbe, henye mufuluche muching'wele chikombe cha ng'odeko kota chongung'wela heni?" Vakamujibulaje, "Tunvetsa." 23 Yesu akavalonjelaje, "Ena mufuluche muching'wele chikombe cho ngung'wela heni, lechelelo lulongwa lwa kwikala lubali lwangu lwa kwililo awu lwa kwichiji si katsi yangu kuvapela. Ila vakupelwa vala yovavichilwe chang'ani na Dada vangu." 24 Vala vadahitswa vanji kumi hovavaga kuhulika ihyo, vakavavipilaje iwo vayawo vavili. 25 Lechelelo Yesu akavachemaje na kuvalonjela, "Muntsela kuta vantsajila va vanu wosi Vayawudi, vavatavalaga vanu kwa ludali, nawo vavina valajilaga mamulaka gawo. 26 Henye mulekaje kudita ihyo, lechelelo munu yo an'gana kuva muvina kwa henye, an'ganika ave mutantsi venyu. 27 Nayo munu yoan'gana kuva mulongola hagati henyu ing'anika ave mutantsi venyu, 28 kota hila Mwana va Munu siatsitse ili atumichilwe, lechelelo atsitse kutumichila na kuwutawula wumi wake ili kuvagombola vanu vanji."

29 Yesu hamwe na vadahitswa vake hovavaga van'wuka ku muji gwa Yeliko, vanu wolofu wakamufwataje. 30 Fibofu vavili vavaga vichite halubali lwa ng'asi, na hovavaga kuhulika kuta Yesu anlutila hono iho, vakakolaje kuta, "Mutwa Mwana va Dawudi utuwonele lusungu." 31 Lila lilugu lya vanu likavang'anulilaje na kuvalonjela mukatuche, lechelelo vene vakalutitsaje kulonga fikami, "Mutwa Mwana va Dawudi utuwonele lusungu." 32 Yesu akimaje na kuvachema, akavaputsaje, "Mun'gana ntsivaditile chinu chachi?" 33 Vala fibofu vakamujibulaje, "Mutwa tun'gana kulola!" 34 Yesu akavawonelaje lusungu na kuvadometsa miho gawo, na luvala lulo vakalolaje na kumufwata.