1 Yesu hoavaga ankwika kuhuma ku chidunda, lilugu likomi lya vanu likamufwataje. 2 Munu yumwe munya wutamwa wa wububa akamutsilaje Yesu, akafugamaje halutalo ha Yesu na kulonga, "Mutwa manyi ugane ufuluche umonetse ili tsindichilwe mu ntsovelo tsa kumufugamila Mulungu!" 3 Yesu akagololaje liwoko lyake, akamubataje na kumulonjela, "Ntsin'gana upone ili widichilwe mu ntsovelo tsa kumufugamila Mulungu!" Baho baho yula mutamwa munya wububa akaponaje. 4 Kaha Yesu akamulonjelaje, "Walahogola kumulonjela munu yoyuve lulongwa luno, lechelelo ubite ukilajile kwa vatawula nambiko vakuwone kuta uponile na ukatawule sadaka kota fyo alajitse Musa."

5 Siku yimwe Yesu ho avaga ankwinjila mu muji gwa Kapelinawumu, muvina yumwe va vimilitsi akatsaje, 6 na kumugongola kuta, "Mutwa, mutantsi vangu avasise kukaye, antamika wutamwa wa kupola muvili gweka, na kaha avaga atache ndalahela."

7 Yesu akamulonjelaje, "Ngutsa kumuponetsa."

8 Lechelelo yula muvina va vimilitsi akamulonjelaje kuta, "Mutwa, heni sinambe fwaye heve winjile mu nyumba yangu, lechelelo ulonje lulongwa hela na mutantsi vangu akupona. 9 Kwasawuli heni ntsili mu wutavala, na kaha heni ntsi muvina va vatova ligalu, manyi ntsimulonjele yumwe, bite kula, nayo am'bita, na kaha manyi ntsimulonjele mutantsi vangu kuta, utse, atsaga, na manyi ntsimulonjele kuta, dite hino, nayo aditaga." 10 Yesu hoavaga kuhulika ndongwa itso, akapomokaje na kuvalonjela vala wo vamufwataga, Ntsinguvalonjela wukweli kuta, "Ntsing'ali kumuwona munu munya litumbilo likomi kota lino kwa vanu va mu inyi ya Isilaheli." 11 Ntsinguvalonjela kuta, "Vanu wolofu vakutsa kuhuma lubali lwa kulihumilo lwa litsuva na kulisotelo lwa litsuva, nawo vakikala hamwe na Ibulahimu, na Yisaka, na Yakobo muliwungo lya kulya na kung'wa ku Wuntsajila wa Mulungu, 12 lechelelo vana va Wuntsajila, vakutotswa mu lijitsa la kivala, ko kukuva na chivembo na kugwegwetsula mino." 13 Kaha Yesu akamulonjelaje yula muvina, "Ubite na yivaje ihyo kota fyo witumbye. Mutantsi va yula muvina akaponaje luvala lulo."

14 Yesu hoavaga kufika ha nyumba ya Petulo, akamufikaje yuve va mudala va Petulo antamika mbungo na avasise mulusaga. 15 Akamubataje liwoko lyake nayo akaponaje namwa yake, akinukaje na kwantsa kumuwuyapila Yesu chilyo. 16 Hokwavaga kuva hamihe, vanu vakamuletelaje Yesu vanu wolofu vanya misoka na namwa, nayo akajihetsaje misoka na kuvaponetsa vatamwa veka. 17 Ndongwa itsi tsihumye ili lukwile lulongwa lo ali alontsile Isaya muloli va Mulungu kuta.

"Mwene atuhetsye ng'odeko tsetu, hamwe na namwa tsetu."

18 Yesu hoavaga kuwona vanu wolofu vamupilime, akavalajitsaje vadahitswa vake valowoche kumwambu gwa lilamba lya Galilaya. 19 Mudahitsi yumwe va malajitso ga Musa akabitaje kwa Yesu na kumulonjela, "Mudahitsi, kokuve ko um'bita heni ngukufwata,"

20 Yesu akamulonjelaje, "Micheve jina malika, na fideje fina fifulya, lechelelo heni Mwana va Munu, ntsihela hono ha wuvaso." 21 Mudahitswa vake yumwe akamulonjelaje Yesu, "Mutwa, mele luhusa mbite ngamutsiche dada vangu." 22 Lechelelo Yesu akamulonjelaje, "Ufwate heni! Valeche vanu wo vanakota vafweye vavatsiche vanu vawo wo vafweye."

23 Kaha Yesu akakwinaje mu mutumbwi hamwe na vadahitswa vake. 24 Simusika, kukahumilaje ng'ala ngomi na mavimbi gakantsaje kugukunujitsa mutumbwi, na mutumbwi gula gukantsaje kugubikitswa na malenga, lechelelo Yesu avaga avasise tulo. 25 Vadahitswa vake vakabitaje kumulamusa na kumulonjela kuta, "Mutwa, utukuluse, tunkufwa!" 26 Yesu akavalonjelaje, "Henye vanya litumbilo lidodo munkogopa chinu chachi?" Akinukaje na akayikatukitsaje yila ng'ala na bahali, kukasichimalaje. 27 Vadahitswa va Yesu vakavaje na muloto ndalahela na vakiputsaje, "Mbe, yuno munu vachi mbaka ng'ala ngomi na mavimbi fingumuhulikitsa?"

28 Yesu ho avaga kulowoka kumwambu gwa lilamba lya Galilaya, akafikaje ku inyi ya Vajelasi, akitang'anaje na valume vavili vanya misoka wo vavaga vangikala ku makabuli. Vanu iva vavaga vakali ndala hela, sikwavaga na munu yo avetsaga kulutila mu ng'asi iyo. 29 Nawo vayovaga na kulonga, "Tuna chichi na heve Mwana va Mulungu? Mbe, utsitse kutukoda gung'acha kufika chipindi cha wuhigo?" 30 Habehi na hono iho, kwavaga na chipinga cha migubi jo jadimwaga. 31 Duve misoka jila jikamugongoletsaje Yesu kwa kulonga, "Manyi utuhetse kwa vanu iva, utuleche twinjile mu chipinga chila cha migubi." 32 Yesu akajilonjelaje jila misoka, "Ale mubite!" Ihyo misoka jikavahumaje vanu vala na kujinjila migubi jila, chipinga cheka cha migubi chikikaje mu lweta luvilo na kwinjila mu lilamba, jikafwaje. 33 Vanu wo vajidimaga migubi jila vakabilimaje, na kubita ku muji na kuvalonjela vanu ndongwa tso tsihumye kwa vala valume vavili vanya misoka. 34 Kaha vanu veka va muji gula vakabitaje kitang'ana na Yesu. Nawo hovavaga kumuwona Yesu, vakamugongolaje awuche ku muji gwawo.