1 Yesu akahumaje na kuwuka mu Nyumba ya Mulungu, ho avaga an'wuka, vadahitswa vake vakabitaje na kwantsa kulongana nayo ndongwa tsa nyumba tsinji tso tsipilime mulubali fyo tsitsentsilwe. 2 Yesu akavaputsaje, "Mbe, mungugawona iga geka? Ntsinguvalonjela wukweli kuta, kuduhu nambe liganga limwe lyo likusigala hano mwilanga mwa liganga linji, geka gano gakubomolwa."

3 Yesu hoavaga ichite ha chidunda cha mitseyituni, vadahitswa vake vakamutsilaje hono iho kwa wufiho na kumuputsa, "Utulonjele ndongwa itso tsikuhumila hanili, na ndajilo yachi yo yikulajila kutsa kwako na ndajilo ya wudugo wa inyi?" 4 Yesu akavajibulaje, "Mwiyangalilaje, munu alekaje kuvayatsa. 5 Kwasawuli vanu wolofu vakutsa kwa Litawa lyangu na kulonga kuta, heni yo Chilisito, nawo vakuvadeteletsa vanu wolofu. 6 Mukuhulika ndongwa magalu, na mwepweletsi tsa ligalu, lechelelo mulekaje kutinuswa, kwasawuli ndongwa itso tseka tsin'ganika tsihumile, lechelelo wula wudugo wung'ali. 7 Vanu va inyi yimwe vakwitova na vanu va inyi yinji, na vanu va wuntsajila wumwe wukwitova na vanu va wuntsajila wunji. Kukuva na ntsala na mikakamo ja inyi chila hono. 8 Ifyo fyeka fikuva kota wulongolo wa wusungu wa kulela mwana."

9 "Kaha vakuvabata na kuvakoda, na vamwe vakukopolwa. Mukuvipilwa na inyi tseka kwasawuli henye munumbila heni. 10 Luvala ulo vanu wolofu wo van'numba vakundeka kunumba, vakipituka na kivipila. 11 Vakuhumila valoli wolofu va wudesi na vakuvayatsa vanu wolofu. 12 Kwasawuli ya kulutila kwa ndongwa ntsibi, wugano wa vanu wolofu wukupunguka. 13 Lechelelo munu yoyuve yo akwikangatsa mbaka ha wudugo uyo yo akukuluka. 14 Lechelelo wudugo howukuva wung'ali kufika, Ndongwa Nofu tsa Wuntsajila wa Mulungu tsikuvikulwa ku inyi tseka, ili vanu veka vahuliche."

15 "Ihyo ho mukuwona, chinu chibi cho chinleta wananjifu cho alontsile Danyeli muloli va Mulungu chivisilwe ha Nyumba ya Mulungu, yo ansoma an'ganika atsele, 16 iho vanu veka wo vali ku inyi ya Yudeya vachimbililaje kufidunda. 17 Munu yoyuve yo ali mwilanga kwa nyumba alekaje kwika ili ategule chinu chochive cho chili mu nyumba yake. 18 Munu yoyuve yo ali kumugunda alekaje kuwuya kukaye kutegula mwenda gwake. 19 Vakukodeka ndalahela vadala vanya wubofu na wo vankosa fyali siku itso. 20 Mumusukaje Mulungu ili kubilima kwenyu kulekaje kuva siku tsa chisisima awu ha Siku ya Weselo. 21 Kwasawuli luvala ulo kukuva na ng'odeko ngomi yo siyavaga yiwoniche kuhuma ha wulongolo wa inyi mbaka sambi, na kaha si yalatsa yihumile kaha. 22 Manyi siku itso tsika sitsilapungutswa kuduhu munu yoyuve yo akakukuluka ave mumi. Lechelelo Mulungu atsipungutse siku itso kwasawuli ya vala vanu vake vahagulwa."

23 "Ino lelo manyi munu avalonjele kuta, Chilisito ali hano awu Ali kula, Mulekaje kumutumba. 24 Kwasawuli vakuhumila valoli va wudesi na vanu wo vakulonga kuta vene yo machilisito. Vakudita ndajilo ngomi na ndajilo myolofu ili kuvayatsa nambe vala vahagulwa va Mulungu. 25 Mwiyangalile henye, heni mwanga ndongwe kuvalonjela luvala luno mwanga ndongwa itso tsing'acha kuhumila. 26 Kwasawuli iyo manyi munu yoyuve avalonjele kuta, mulave Chilisito ali kula ku mbuga, mulekaje kubita, awu kuta, ali mu nyumba, mulekaje kumutumba. 27 Kwasawuli kota hila lwenje lwa liladu fyo lwangatsaga kuhuma lubali lwa kuwuhumilo wa litsuva na kuwoneka mbaka kuwusotelo lya litsuva, ho hihyo fyo yikuva kutsa kwake Mwana va Munu. 28 Kwasawuli hala ho lifwilye linyama, ho baho ho jikong'anaga migungule."

29 "Hala ho tsikuva tsilutye ng'odeko tsa siku tsila, litsuva likugubikwa na jitsa, nago mwetsi si gukuvala, natso nyenyetsi tsikugwa kuhuma kilanga, na ngufu tsa ku lulanga tsikutigasika. 30 Iho ho yikuhumila ndajilo ya Mwana va Munu yikuwoneka kululanga na kabila tseka tsikulomboketsa. Nawo vakumuwona Mwana va Munu ankutsa mwilanga mwa mafuluka munya mamulaka na wumelemo wukomi. 31 Litsi likomi lya litalumbeta likuhulikwa, nayo akuvatuma vatantsi vake va Kilanga ili vavakong'ase vahagulwa vake kuhuma mbali tseka tsitayi tsa inyi, kuhuma wudugo wumwe wa kilanga mbaka wudugo wunji wa kilanga."

32 "Mwidahitsaje muhwano guno kukolela kwa mubichi gwa mutini. Manyi muguwone miputi jake jantsitse kuva mideche na mahamba kudedemula, mun'tsela kuta ndonya yilihabehi. 33 Ho hihyo manyi mutsiwone ndongwa itso tsinhumila mutselaje kuta mwana va munu alihabehi ndalahela. 34 Ntsinguvalonjela wukweli kuta, chilelo chino sichikulutila mbaka ndongwa itso tseka tsihumile. 35 Kilanga na inyi fikulutila, lechelelo ndongwa tsa heni sitsikulutila ndaya."

36 "Lechelelo kwa ndongwa tsa siku iyo awu sala iyo, kuhudu munu yo antsela, nambe vatantsi va Kilanga va Mulungu, nambe Mwana va Munu, ila Dada aliyeka. 37 Kota fyo yavaga chipindi cha Nuhu, hihyo fyo kukuva kutsa kwake Mwana va Munu. 38 Luvala lula hoyavaga ying'ali kuhumila yila ng'uka ngomi, vanu vavaga vankulya na kung'wa, vatolaga na kutoleka, mbaka siku yila Nuwu avaga kwinjila mugati mwa litumbwi likomi lyo linchemwa Safina, 39 vanu sivatselaga chinu chochive cho chikuhumila, na ndonya ngomi yikatonyaje kwa siku ntsolofu na vanu vakafwaje kwa lulenga. Ihyo fyo yikuva ho akutsa Mwana va Munu. 40 Luvala ulo vanu vavili vakuva kumugunda, yumwe akutegulwa na yunji akulekwa. 41 Vadala vavili vakuva vanhalula wuhemba hamwe, yumwe akutegulwa na yumwe akulekwa."

42 "Ino lelo mwilangalilaje, kwasawuli simuyitsele siku yo akutsa Mutwa venyu. 43 Lechelelo mutselaje lulongwa luno kuta, manyi munya nyumba aka atsele kuta luvala lwachi lo akutsa muhitsi akakikala miho, na si akakuyileka nyumba yake yigumulwe. 44 Ihyo lelo na henye nanye mun'ganika mwivikaje chang'ani, kwasawuli Mwana va Munu akutsa sala yo sinambe muyitsele."

45 Yesu akawilaje kulonga kuta, "Nani yo mutantsi muwuya na munya luhala yo muntsajila vake akumuvika avimilile vanu vake na kuvapela filyo kwa muda go gun'ganika? 46 Akuhechelela mutantsi yula, manyi mutwa vake ho akuva kutsa akumufika an'dita ihyo. 47 Ntsinguvalonjela wukweli kuta, akumuvika mutantsi uyo ave mwimilitsi wa finu fyake yeka. 48 Lechelelo manyi mutantsi uyo ave siyo muwuya, na manyi ilonjele munumbula yake kuta, Mutwa vangu akuchelewa kuwuya, 49 na antse kuvatova vatantsi vayage na kulya na kung'wa hamwe na vagatsi, 50 muvina vake akutsa siku yo sinambe ayitsele mutantsi uyo. 51 Uyo muvina vake akumutova ndalahela na kumuvika hamwe na vanu wo sinambe vamuhulikitse, hono ho hakuva na chivembo na kugwegwetsula mino."